1-3. Hezo teʼefaʼö niha gulidanö, ba hadia nifabuʼu Yehowa khöda?

KHALAIGÖ atö na lakuru ndraʼugö ba zi tenga horöu. Lö lala wa tola aefa ndraʼugö. Ba lö fanötöna khöu, lö öʼila hadia nifaluau. Me no aetu wanötönau, falukha ami niha sebua kuaso sangumaʼö khöu wa hasambalö itolo ndraʼugö! Hewisa dödöu?

² Fefu niha gulidanö hasambalö mate, lö si tola mangefaʼö yaʼita. Hizaʼi, so kuaso khö Yehowa ba wangefaʼö yaʼita moroi ba waʼamate. No ifabuʼu khöda, ”Safuria zi faʼudu, niheta, ba yaʼia waʼamate andrö.”​—I Korindro 15:26.

³ Khalaigö hewisa waʼomuso dödöu na samuza inötö lö hadöi faʼamate! Hizaʼi, tenga ha faʼamate niheta Yehowa. Fefu niha si no mate ifuli isusugi. Angeraigö hawaʼebua gunania khöu daʼö. No ifabuʼu, ”Si no mörö nibalugö tanö” ifuli auri. (Yesaya 26:19) Daʼö nifotöi fanusugi zi no mate ba Zura Niʼamoniʼö.

4. (a) Hadia wondrara dödöda na mate nösi nomoda mazui si fahuwu khöda? (b) Haniha manö zi fahuwu khö Yesu?

⁴ Tatu manö abu sibai dödöda na mate nösi nomoda mazui si fahuwu khöda. Aetu wanötönada, lö taʼila taʼorifi ira. Hizaʼi, so wondrara  dödö moroi ba Zura Niʼamoniʼö. (Baso II Korindro 1:3, 4.) Datafatunö sambua duma-duma sangoromaʼö wa omasi sibai Yehowa ba Yesu ba wanusugi niha si no mate. Me so Yesu ba gulidanö, asese ifalukhaisi Lazaro, Marata ba Maria. Yaʼira andre si fahuwu khö Yesu. Imane Sura Niʼamoniʼö, ”Ba no omasi Yesu Marata andrö ba talifusönia ba Lazaro andrö.”​—Yohane 11:3-5.

5, 6. (a) Hadia nifalua Yesu me iʼila abu dödö nösi nomo Lazaro hegöi si fahuwu khönia? (b) Hana wa terara dödöda me taʼila hewisa dödö Yesu ba niha si no mate?

⁵ Samuza maʼökhö, mate Lazaro. Möi Yesu ba wondrara tödö Maria ba Marata. Me irongo Marata no tohare Yesu, möi ia ifaondragö. Omuso dödönia, ba imane khö Yesu, ”Enaʼö na ho so ndraʼugö ba daʼe, ba lö mate menaʼö dalifusögu andrö.” Ba dödö Marata, ahou weʼaso Yesu. Aefa daʼö, iʼila Yesu meʼe Maria. Me iʼila asöndru sibai dödöra, ba meʼe göi ia. (Yohane 11:21, 33, 35) Afökhö sibai dödö Yesu na mate niha niʼomasiʼöda.

⁶ Terara dödöda me taʼila afökhö dödö Yesu ba Amania na mate niha niʼomasiʼöda. (Yohane 14:9) So khö Yehowa waʼabölö ba wangeheta faʼamate, ba lö aratö ifalua daʼö.

7, 8. Hana wa lö omasi Marata na lafazawa gowe balu-balu lewatö Lazaro, ba hadia nifalua Yesu?

⁷ Me irugi Yesu lewatö Lazaro, no labalugö gowe lewatö andrö. Imane Yesu, ”Mifazawa gowe  andrö.” Lö omasi Marata na lafazawa gowe andrö, börö no öfa bongi saʼae me no lakoʼo Lazaro. (Yohane 11:39) Lö iʼila hadia nifalua Yesu khö dalifusönia andrö.

⁸ Imane Yesu khö Lazaro, ”Ae baero!” Hadia niʼila Maria ba Marata no sahöli-höli dödö. ”Möi baero zi mate, no muʼolohuni gahenia ba tangania lembe.” (Yohane 11:43, 44) No ifuli auri Lazaro! Falukha ia khö zi fahuwu khönia ba ba nösi nomonia. Latalagui ia ba fahuhuo ira khönia. Sindruhu-ndruhu tandra sahöli-höli dödö! No tesusugi Lazaro.

9, 10. (a) Haniha zameʼe faʼabölö khö Yesu ba wanusugi niha si no mate? (b) Hana wa moguna taʼila waö-waö niha nisusugi?

⁹ Hadia börö waʼabölö Yesu wa tola isusugi zi no mate? Tenga. Fatua lö isusugi Lazaro, mangandrö ia khö Yehowa, ba ibeʼe khönia waʼabölö. (Baso Yohane 11:41, 42.) Tenga ha Lazaro zi no irai tesusugi moroi ba ngai zi mate. Ifatunö khöda Sura Niʼamoniʼö, so nono alawe si 12 fakhe mate börö wökhö. Aetu wanötöna khö namania Yaʼiro, iʼandrö khö Yesu enaʼö ifadöhö nononia andrö. Ha sambu-sambua nononia. Me fahuhuo Yaʼiro khö Yesu, so zangumaʼö khönia, ”No mate nonou; hadia wa öfakao na Zamahaʼö andrö?” Imane Yesu khö Yaʼiro, ”Böi ataʼufi, amati manö, ba auri ia dania.” Aefa daʼö momöi ba nomo Yaʼiro.  Me lö aratö larugi, iʼila Yesu wa ato niha sege-ege. Imane khöra Yesu, ”Böi miʼege-ege; tenga si mate, si mörö.” Lö aboto ba dödö Yaʼiro hegöi foʼomonia hadia geluaha niwaʼö Yesu. Ifofanö niha sato Yesu, ba toröi Yaʼiro faoma foʼomonia. Igogohe danga nono alawe andrö Yesu, imane, ”Faoso ono alawe, uwaʼö khöu!” Khalaigö hewisa waʼomuso dödö zatuania me maoso nono andrö ba mowaö-waö! No isusugi nono alawe andrö Yesu. (Mareko 5:22-24, 35-42; Luka 8:49-56) Iʼotarai daʼö, ero laʼila nono alawe andrö, itörö tödöra hadia nifalua Yehowa khöra niʼodelania khö Yesu. *

¹⁰ Ifuli mate niha si no isusugi Yesu. Hizaʼi, salua andre zameʼe khöda fanötöna wa omasi sibai Yehowa isusugi niha si no mate, ba hasambalö ifalua daʼö.

11. Moloʼö sura Zangombakha 9:5, hadia zalua khö Lazaro?

¹¹ Imane Sura Niʼamoniʼö, niha ”si no mate, ba lö hadia ia laʼila”. Daʼö zalua khö Lazaro. (Zangombakha 9:5) Simane niwaʼö Yesu, Lazaro andrö ha si mörö. (Yohane 11:11) Me ba lewatö so Lazaro, ”lö hadia ia iʼila”.

12. Hana wa faduhu dödöda wa sindruhu-ndruhu no tesusugi Lazaro?

 ¹² Ato niha sangila me isusugi Lazaro Yesu. Laʼila göi si faʼudu khö Yesu dandra sahöli-höli dödö nifaluania. No ifuli auri Lazaro. Daʼö dandra wa sindruhu-ndruhu so wemaoso zi mate. (Yohane 11:47) Ato niha si möi mamaigi Lazaro ba faduhu dödöra wa Yesu andre nifatenge Lowalangi. Hizaʼi, si faʼudu khö Yesu, laʼalui lala wamunu Yesu hegöi Lazaro.​—Yohane 11:53; 12:9-11.

13. Hana wa faduhu dödöda wa ifuli isusugi niha si no mate Yehowa?

¹³ Imane Yesu, ”dozi si so ba lewatö” hasambalö tesusugi. (Yohane 5:28) Eluahania gofu haniha nitörö tödö Yehowa hasambalö isusugi, ba lö olifu ia khala-khala niha nisusuginia. Hadia tola itörö tödönia fefu? Imane Sura Niʼamoniʼö, miliaran ndröfi ba dalu mbanua, ba ahori iʼila döira fefu Yehowa. (Baso Yesaya 40:26.) Na ahori iʼila döi ndröfi Yehowa, tatu manö tenga sabua khönia wanörö tödö fefu waö-waö niha nisusuginia dania. Börö me Yehowa zamazökhi fefu hadia ia, faduhu dödöda wa so khönia waʼabölö ba wanusugi niha si no mate.

14, 15. Hadia zi tobali famahaʼö khöda ba wehede Yobi sanandrösa ba wanusugi?

¹⁴ Faduhu dödö Yobi wa so wemaoso zi mate. Manofu ia, ”Hadia na mate niha, hadia, ifuli auri?” Imane khö Yehowa, ”Ba muʼao enaʼö ndraʼugö, ba utema liu; humulu enaʼö dödöu ba gomböila  dangau andre.” Aboto ba dödö Yobi wa isusugi zi no mate Yehowa ba ginötö si no ihonogöi.​—Yobi 14:14, 15.

¹⁵ Hewisa dödöu me so wanötöna ba niha si no mate? Te manofu ndraʼugö, ’Hadia tesusugi dania nösi nomogu si no mate, mazui si fahuwu khögu?’ Terara dödöda me omasi sibai Yehowa wanusugi niha si no mate. Datafaigi hadia niwaʼö Zura Niʼamoniʼö, haniha manö nisusugi ba hezo tesusugi ira.

16. Hewisa dania waʼauri niha nisusugi ba gulidanö?

¹⁶ Niha nisusugi meföna, falukha ia ba nösi nomonia ba khö zi fahuwu khönia ba gulidanö. Töra moroi ba daʼö zalua ba zi so föna. Hadia mbörö? Börö me auri ira ba gulidanö sagötö faʼara, si lö hadöi fökhö ba faʼalösökhi, fasuwöta, ba lö latörö waʼamate.

17. Haniha manö nisusugi?

¹⁷ Haniha manö nisusugi andrö? Imane Yesu, ”Ba larongo linia dozi si so ba lewatö, ba möi ira yawa.” (Yohane 5:28, 29) Imane ba zura Wamaʼeleʼö 20:13, ”Ba ibeʼe baero asi zi mate andrö khönia, ba faʼamate andrö, ba Banua Tou, ba labeʼe baero zi mate andrö, khöra.” Miliaran niha nisusugi dania. Hizaʼi, imane sinenge sotöi Faulo, nisusugi dania ha niha ’satulö, ba si lö atulö’. (Baso Halöwö Zinenge 24:15.) Hadia geluahania daʼö?

18. Haniha ”niha satulö” nisusugi?

 ¹⁸ Niha ”satulö” yaʼia daʼö soloʼö khö Yehowa fatua lö möi Yesu ba gulidanö. Simane Noakhi, Aberahamo, Saraʼi, Moze, Ruti, Gesitera tesusugi ira ba gulidanö. Tola öbaso waö-waö waʼaurira ba Heberaiʼo faza 11. Hewisa niha soloʼö khö Yehowa si no  mate ba ginötöda andre? Lafotöi ira niha ”satulö”, ba tesusugi dania.

19. Haniha ”niha si lö atulö” andrö? Ba hadia ginötö nibeʼe Yehowa khöra na tesusugi ira?

¹⁹ ”Niha si lö atulö” yaʼia daʼö miliaran niha si lö fakhamö aboto ba dödöra Yehowa. Hewaʼae no mate ira, lö olifu Yehowa khöra. Na tesusugi ira, ibeʼe khöra ginötö enaʼö tefahaʼö ba waʼaboto ba dödö sanandrösa khö Yehowa ba möi ira enoninia.

20. Haniha zi lö tesusugi dania?

²⁰ Hadia fefu niha si no mate tesusugi dania? Löʼö, imane Yesu, so ösa zi lö tesusugi. (Luka 12:5) Haniha nisusugi ba si lö mususugi? Yehowa zotatugöi, yaʼia Zanguhuku, hizaʼi no ibeʼe kuaso khö Yesu ’ba wanguhuku niha sauri awö zi no mate’. (Halöwö Zinenge 10:42) Niha si lö sökhi si lö mamalalini era-era, lö tesusugi.​—Faigi Gonönöta 19.

21, 22. (a) Hewisa mboto niha nisusugi ba zorugo? (b) Haniha zi oföna mususugi ba zorugo?

²¹ Imane Sura Niʼamoniʼö, so ösa zauri ba zorugo, tesusugi ira ba mboto eheha. Lö tebeʼe khöra mboto waʼaniha, hulö malaʼika ira ba zorugo.

²² Yesu zi oföna tesusugi ba mboto eheha. (Yohane 3:13) Tölu ngaluo me no mate Yesu, isusugi ia Yehowa. (Zinunö 16:10; Halöwö Zinenge 13:34, 35) Tenga ba mboto waʼaniha tesusugi Yesu. Imane sinenge sotöi Fetero wa Yesu andrö ”nibunu  sa na dali mboto, ba niʼorifi dali geheha”. (I Fetero 3:18) Tesusugi Yesu ba mboto eheha si so faʼabölö! (I Korindro 15:3-6) Ifatunö khöda Sura Niʼamoniʼö wa tenga ha yaʼia nisusugi ba mboto eheha.

23, 24. Haniha ”rorogöfö gubalo, si lö atoto”, ba hadauga ira?

²³ Imane Yesu khö ndra nifahaʼönia fatua lö mate ia, ”Möido sa muhaogö naha khömi.” (Yohane 14:2) Eluahania, so ösa zoloʼö khö Yesu nisusugi si fao khönia ba zorugo. Hawaʼatora? Ifotöi ira Yesu ”rorogöfö gubalo, si lö atoto”. (Luka 12:32) Ifatunö sinenge sotöi Yohane hawaʼatora, me iʼila muzizio Yesu ba Hili Ziona [sorugo], ”ba 144.000 nawönia”.​—Famaʼeleʼö 14:1.

²⁴ Hamega tebörögö wanusugi niha Keriso si 144.000 andrö? Imane Sura Niʼamoniʼö, iʼotarai me mamatörö Keriso ba zorugo. (I Korindro 15:23) No so ita ba ginötö wamatörö Keriso iadaʼa, ba no so ösa ba gotalua zi 144.000 zi no tesusugi ba zorugo. Yaʼira nasa si toröi ba gulidanö, na mate ira, iʼanemai numalö ba zorugo. Hewaʼae simanö, ato niha nisusugi dania ba gulidanö Faradaiso.

25. Hadia nifatunöda ba faza aefa daʼa?

²⁵ Lö aratö iʼefaʼö niha gulidanö Yehowa moroi ba horö ba ba waʼamate! (Baso Yesaya 25:8.) Hadia halöwö niha si möi ba zorugo? Imane Sura Niʼamoniʼö wa tobali ira samatörö awö Yesu. Ba faza aefa daʼa, tafahaʼö ita sanandrösa ba wamatörö Lowalangi.