Esitera andrö ono alawe Yahudi si toröi ba mbanua Zusa ba Weresia. Morodokhai zangebuaʼö yaʼia si fasambua ama khönia sangai halöwö khö Ahasiwero razo Weresia.

Omasi Razo Ahasiwero ifili ratu si bohou. Laʼohe khönia ba daʼö fefu ira sohalöwö nono alawe si baga-baga, fao samösa Gesitera. Ba gafuriata, Esitera nifili razo tobali ratu. Aefa daʼö, iwaʼö khönia Morodokhai enaʼö lö ifatunö wa niha Yahudi ia.

Samösa ndra matua sebua faʼasiliyawa sotöi Hamano samatörö niha sohalöwö sebua faka ba mbanua daʼö. Omasi ia na khönia mangalulu fefu niha. Hizaʼi, lö omasi Morodokhai. Mofönu sibai Hamano ba edöna ibunu Morodokhai. Me no iʼila Hamano wa niha Yahudi Morodokhai andrö, iʼalui lala ba wamunu niha Yahudi fefu ba wamatörö daʼö. Imane khö razo, ’Tobali famaʼalada niha Yahudi. Baga na öhori ira Tua.’ Imane Ahasiwero, ’Falua hadia manö zomasiʼö.’ Börö daʼö, ibeʼe khönia kuaso razo ba wamazökhi amakhoita. Aefa daʼö, ibeʼe gamakhoita Hamano ba ifaretakö enaʼö labunu fefu niha Yahudi ba ngaluo si 13 mbaŵa Adara. Iʼila Yehowa nifaluania.

Lö aboto ba dödö Gesitera daʼö. Andrö ifaʼoheʼö khönia gamakhoita daʼö Morodokhai, sura gamakhoita si bohou ba imane, ’Aeʼe ba fahuhuo khö razo.’ Imane Esitera, ’Niha samalukhaisi razo si lö mukaoni hasambalö nibunu. No 30 hari lö nikaoni razo ndraʼo! Hizaʼi, ufalukhaisi manö ia. Na iʼoroʼö ziʼonia, ba sauri ndraʼo. Na löʼö, ba si mate ndraʼo.’

Mofanö Gesitera ba golayama gödo razo. Me iʼila ia razo, iʼoroʼö ziʼonia. Me ifahatö ia Esitera, manofu khönia razo, ’Hadia zomasiʼö Esitera?’ Imane,  ’Omasido ukaoni ndraʼugö Tua hegöi Hamano ba gowasa.’ Ba gowasa daʼö, ifuli zui ikaoni ira Esitera ba gowasa si mendrua nifaluania mahemolu. Ba gowasa si mendrua andrö manofu zui razo, ’Hadia zomasiʼö Esitera?’ Imane Esitera, ’So zedöna mamunu yaʼo hegöi soigu. Uʼandrö khöu efaʼö ndraʼaga.’ Manofu razo, ’Haniha niha daʼö?’ Imane Esitera, ’Niha si lö sökhi andrö Tua, Hamano.’ Mofönu sibai Ahasiwero ba ifaretakö enaʼö labunu Hamano.

Hizaʼi, lö hadöi si tola manaha fareta Hamano hewaʼae na razo ia. Börö daʼö, ifataro Morodokhai tobali samatörö ira sohalöwö sebua faka ba itehegö khönia razo ba wamazökhi amakhoita si bohou. Ibeʼe gamakhoita Morodokhai sanehegö ira niha Yahudi ba wolawa na so zanuwö yaʼira. Ba ngaluo si 13 mbaŵa Adara, ba daʼö lakalaisi zi faʼudu khöra ira niha Yahudi. Iʼotarai daʼö, lafalua wanörö tödö faʼamönara andrö ero röfi.