Mato 70 fakhe me no tetehegö mangawuli ndraono Gizaraʼeli ba Yeruzalema, so nasa ndraono Gizaraʼeli si toröi ba mbanua Wamatörö Weresia. Samösa gere sotöi Esera, samahaʼö Oroisa Yehowa. Me iʼila ato niha si lö moloʼö Oroisa Lowalangi ba Yeruzalema, möi ia ba daʼö ba wanolo yaʼira. Imane khönia Aretazasa razo Weresia, ’Lowalangi zamofaʼatua-tua yaʼugö irege tola öfahaʼö Goroisania. Ofanö, ba ohe nawöu haniha zomasiʼö.’ Iʼowuloi Esera niha somasi mangawuli ba Yeruzalema. Mangandrö ira khö Yehowa enaʼö irorogö ira ba lala, aefa daʼö mofanö ira.

Öfa waŵa aefa daʼö, larugi Yeruzalema. Lafatunö khö Gesera ira sondröniaʼö, ’Lö laʼoʼö goroisa Yehowa iraono Gizaraʼeli ba mangowalu ira khö ndra alawe sanömba adu.’ Hadia nifalua Gesera? Ituhi danö ba wangandrö föna niha sato imane, ’He Yehowa, oya zi no öfalua khöma, hizaʼi fasala ndraʼaga khöu.’ Börö daʼö, lafalalini gera-erara niha sato, hizaʼi moguna khöra wanolo ba wamalua satulö. Ifili ösa Esera ndra sondröniaʼö hegöi sanguhuku ba wangasiwai abula dödö andre. Lafalua daʼö tölu waŵa waʼara, ba lafofanö niha si lö omasi mamosumange Yehowa.

Felendrua fakhe aefa daʼö, me no awai lafazökhi göli Yeruzalema, iʼandrö Esera ba niha sato enaʼö owulo ira ba golayama. Omasi ia wombaso Oroisa Lowalangi khöra. Me ibokai mbuku Goroisa andrö, mosindro ira. Isuno Yehowa Esera ba lafazawa dangara. Daʼö dandra wa fao dödöra. Aefa daʼö, ibaso Goroisa andrö Esera ba ifatunö geluaha. Fefu ira lahaogö wamondrondrongo. Aboto ba dödöra wa no faröi ira khö Yehowa, aefa daʼö lalau meʼe. Mahemolunia, ifuli zui ibaso Goroisa andrö Esera. Aboto ba dödöra wa lö ara tö lafalua Gowasa Nose Ndraha Geu. Börö daʼö, lafaʼanö-anö ira ba wamalua owasa andrö.

Sagötö zi fitu hari wamaluara owasa andrö, omuso-muso dödö ndraono Gizaraʼeli ba mangandrö saohagölö ira khö Yehowa börö me oya mbua nowira.  Iʼotarai ba götö Yosua, lö irai lafalua Gowasa Nose Ndraha Geu simane daʼö. Me no aefa lafalua gowasa, owulo ira ba lalau mangandrö, ’He Yehowa, no öʼefaʼö ndraʼaga moroi ba wangosawuyu, no öbeʼe göma me so ndraʼaga ba danö si mate, ba no öbeʼe khöma danö si sökhi. Hizaʼi, hauga kali masawö goroisamö. Öfatenge ndra samaʼeleʼö ba wamangelama yaʼaga, hizaʼi lö ba dödöma. Hewaʼae simanö, lö tebulö waʼebolo dödöu khöma. Hasambalö öfalua zi no öfabuʼu khö Gaberahamo. Iadaʼa, mafabuʼu khöu wa maʼoʼö ndraʼugö.’ Lasura mbuʼusa lira andrö, ba lafaduhuʼö ira sondröniaʼö, niha Lewi, hegöi ira ere.