So zi fahatö khö Gelizabe töinia Maria si toröi ba mbanua Nazareta ba Galilaia. No famatua Maria khö Yosefo, tuka geu. Me önö waŵa dabina Gelizabe, tohare malaʼika Gaberieli ifalukhaisi Maria. Imane Gaberieli, ’Yaʼahowu Maria. Omuso sibai dödö Yehowa khöu.’ Lö aboto ba dödö Maria geluaha niwaʼö Gaberieli. Aefa daʼö, imane khönia Gaberieli, ’Manabina dania ndraʼugö, ba tumbu khöu nono matua. Ba öbeʼe töi nono daʼö Yesu. Tobali ia Razo ba Famatörönia sagötö faʼara.’

Imane Maria, ’Hewisa daʼö, ono alawe nasa ndraʼo. Hewisa wa tola so nonogu?’ Imane Gaberieli, ’Tola ifalua gofu hadia manö Yehowa. So nonomö börö me ötema waʼabölö geheha niʼamoniʼö. Iadaʼa, no manabina dalifusöu Elizabe.’ Aefa daʼö imane Maria, ’Yaʼodo andre sawuyu Yehowa. Yaʼitörö khögu niwaʼömö andrö.’

 Aefa daʼö, mofanö Maria ba mbanua sebua ba hili ba wamalukhaisi Elizabe. Me ofeta Maria ba mangowai ia, irasoi Elizabe wa maliwa nono si so ba dalunia. Itema waʼabölö geheha niʼamoniʼö Elizabe ba imane, ’Yaʼifahowuʼö ndraʼugö Yehowa, Maria. Töi sebua khögu me no möi ba nomogu nina Mesia.’ Imane Maria, ’Usuno Yehowa soroi ba dödö.’ Toröi Maria ba nomo Gelizabe tölu waŵa waʼara. Aefa daʼö, mangawuli ia ba Nazareta.

Me irongo Yosefo wa no manabina Maria, lö omasi ia saʼae itohugö hewaʼae no famatua ira. Hizaʼi, fahuhuo khönia malaʼika ba wangifi, ’Angowalu manö khö Maria. Böi busi dödöu. Lö nifaluania sala.’ Börö daʼö, mangowalu Yosefo khö Maria ba iʼohe ba nomonia.