Yohane, ono Zakharia faoma Elizabe tobali samaʼeleʼö me no ebua ia. Iʼogunaʼö ia Yehowa ba wamatunö ba niha wa lö ara tö tohare Mesia. Hizaʼi, ba danö si mate mamahaʼö ia, tenga ba nahia waʼowulo mazui ba mbanua sebua. Tohare niha moroi ba Yeruzalema hegöi Yudea ba lafahaʼö ira khönia. Ifahaʼö ira hewisa wangomusoiʼö tödö Lowalangi, yaʼia daʼö moguna labato wamalua si lö sökhi. Ato zamalalini era-era me no aefa lafondrondrongo ia ba ibayagö ira idanö ba Nungo Nidanö Yoridano.

Si toʼölö manö waʼauri Yohane. Barunia moroi ba mbu gondra, tamo gönia awö wewani. Omasi laʼila niha haniha zindruhunia Yohane andrö. Möi ndra Farizaiʼo hegöi Sadukaiʼo sasiliyawa ba wamalukhaisi yaʼia. Imane khöra Yohane, ’Mibulöʼö waʼaurimi ba mifalalini gera-erami. Böi mangosipade ami ha börö me miwaʼö wa ono Gaberahamo ami. Tenga daʼö geluahania wa ono Lowalangi ami.’

Ato niha zangondrasi Yohane ba lasofu, ’Hadia zinangea mafalua enaʼö omuso dödö Lowalangi?’ Imane Yohane khöra, ’Na so dua görö mbarumi, beʼe zi sagörö ba niha böʼö.’ Öʼila hadia mbörö wa iwaʼö daʼö? Omasi ia enaʼö laʼila wa ba wangomusoiʼö tödö Lowalangi moguna laʼomasiʼö niha böʼö.

Imane Yohane khö zanugi pajak, ’Mitörö zindruhu, böi milimo niha.’ Imane khö zaradadu, ’Böi mitema zölö-sölö mazui falimo ami.’

 Möi ndra ere hegöi niha Lewi ba wamalukhaisi Yohane ba lasofu, ’Sindruhunia, haniha ndraʼugö andre? Fefu niha omasi ira laʼila.’ Imane Yohane, ’Yaʼo ziʼao ba danö si mate, solohe niha khö Yehowa simane niwaʼö Yesaya samaʼeleʼö.’

Omasi niha wamahaʼö nifalua Yohane. Ato zanofu-nofu hadia yaʼia andrö Mesia. Hizaʼi, imane Yohane, ’Niha sabölö ebua kuaso moroi khögu lö ara tö tohare ia. Tenga sinangea ndraʼo wangeheta sandralania. Ubayagö idanö niha faoma idanö, hizaʼi ibayagö niha faoma eheha niʼamoniʼö.’