No töra 400 fakhe me no aefa mufuli muhaogö zui göli Yeruzalema. So samösa gere sotöi Zakharia ba foʼomonia Elizabe si toröi ba mbanua sahatö ba daʼö. No ara mangowalu ira hizaʼi lö manö hadöi khöra iraono. Samuza maʼökhö, möi Zakharia ba naha niʼamoniʼö ba gosali wameʼe sumange somuhua. Ba zi lö mudöna-döna, tohare malaʼika Gaberieli. Ataʼu Zakharia hizaʼi imane Gaberieli, ’Böi ataʼufi. So duria si sökhi moroi khö Yehowa. Foʼomomö andrö Elizabe, tumbu khönia dania nono matua. Mifotöi nono daʼö Yohane. Yaʼia nifili Yehowa ba wamalua halöwö si tohude.’ Imane Zakharia, ’Hewisa wa tola ufaduhusi tödö ndraʼugö? No atua ndraʼaga daruaga foʼomogu, ba lö hadöi onoma.’ Imane Gaberieli, ’Lowalangi zamatenge yaʼo ba wamaʼema daʼa. Hizaʼi, börö me lö faduhu dödömö, tobali ndraʼugö si lö hede irege tumbu nono daʼö.’

Ara sibai Zakharia ba naha niʼamoniʼö. Me möi ia baero, labalo-baloi ia niha sato ba omasi ira laʼila hadia zalua. Hizaʼi, lö iʼila fahuhuo Zakharia. Ha tangania ifaliwa-liwa. Aboto ba dödö niha sato wa so goroisa Lowalangi nitema Zakharia.

Ba gafuriata, manabina Gelizabe ba tumbu khönia nono matua simane niwaʼö malaʼika. Tohare zi fahuwu hegöi ira talifusönia ba wamaigi ono daʼö. Omuso sibai dödöra. Imane Elizabe, ’Töinia Yohane.’ Lamane, ’Lö hadöi sotöi Yohane ba nösi nomou. Fotöi ia Zakharia simane bapania.’ Hizaʼi, isura Zakharia, ’Töinia Yohane.’ Ba ginötö daʼö, iʼanemaiʼö tola fahuhuo Zakharia! Tehöngö misa ba zi sagörö Yudea duria sanandrösa khö nono daʼa ba lamane niha sato, ’Tobali hadia dania nono daʼa?’

Lö ara, itema Zakharia waʼabölö moroi ba geheha niʼamoniʼö imane, ’Nisuno Yehowa. No fazazi ia khö Gaberahamo wa ifatenge samösa zangefaʼö yaʼia daʼö  Mesia ba wangorifi yaʼita. Tobali samaʼeleʼö Yohane ba yaʼia zangehenaigö lala khö Mesia.’

Alua göi zahöli-höli dödö khö Maria talifusö Gelizabe. Databaso nidunö-dunönia aefa daʼa.