Me no aefa ifili ndra sinengenia si 12 Yesu, möi ia tou moroi ba hili ba isawa zi sambua nahia. Ato niha si no owulo ba daʼö. So ira zi otarai Galilaia, Yudea, Diro, Sidona, Siria ba tanö yefo Yoridano. Laʼohe niha sofökhö hegöi niha nifakao mbekhu. Ahori ifadöhö ira fefu Yesu. Aefa daʼö, mudadao ia ba gahe hili ibörögö wamahaʼö. Ihaogö wamatunö hadia zi tola tafalua enaʼö tobali ita si fahuwu khö Lowalangi. Böi olifu ita wa moguna khöda wanuturu lala moroi khö Yehowa ba taʼodödögö wangomasiʼö yaʼia. Hizaʼi, lö taʼila taʼomasiʼö Yehowa na lö taʼomasiʼö niha böʼö. Tafalua zi sökhi ba niha ba böi ebua zambuana dödöda, fao ba daʼö niha soʼuduni yaʼita.

Imane Yesu, ’Böi ha si fahuwu khömi miʼomasiʼö, miʼomasiʼö göi niha si lö baga amuata khömi, ba bologö dödöu ba niha böʼö soroi ba dödö. Na so zofönu khömi, ondrasi ia ba andrö khönia waʼebolo dödö. Falua ba niha böʼö zomasiʼö lafalua khöu.’

 Ibeʼe göi mene-mene si sökhi Yesu sanandrösa ba harato. Imane, ’Tobali si fahuwu khö Yehowa andrö abölö sökhi moroi ba gefe sebua. Kefe tola latagö, hizaʼi fahuwusa khö Yehowa tebai latagö. Böi miʼabusi tödö hadia niʼa awö nibadu hegöi niʼonukha. Mifaigi atö wofo. Hasambalö ibönökhi zoguna khöra Lowalangi. Na abu dödömi, lö monönö waʼanau nosomi. Böi olifu ami wa iʼila Yehowa hadia zoguna khömi.’

Lö irai larongo ira niha daʼö zi fahuhuo simane Yesu. Lö irai lafahaʼö zimane daʼö ira sondröniaʼö ba agama yaʼia daʼö ira Farizaiʼo ba Sangila Amakhoita. Hana wa tobali samahaʼö sebua Yesu? Börö me fefu nifahaʼönia si otarai Yehowa.