Me baŵa si Öfa döfi 30 M, möi Yesu ba Yeruzalema. Ato niha zi möi ba mbanua daʼö börö wangowasaini Fasa. Ba gowasa daʼö, labeʼe gurifö tobali sumange ba gosali. So zi no molohe urifö, so göi zawena mowöli ba Yeruzalema.

Me möi Yesu ba gosali, iʼila niha sato samawa urifö. Mangalui kefe ira ba nahia wamosumange Yehowa! Mofönu sibai Yesu. Ifazökhi mbözi-bözi moroi ba zinali, aefa daʼö itaboi mbiri-biri hegöi nambi moroi ba gosali. Ibaliʼö meza zanukari kefe ba ifazawili tou ba danö gefe loga khöra. Imane Yesu khö ndra samawa marafadi, ’Miʼohe baero fefu daʼa! Böi mibaliʼö naha wogale nomo Namagu!’

 Ahöli-höli dödö niha nifalua Yesu ba gosali. Iʼanemaiʼö itörö tödö ndra nifahaʼönia wehede zi samösa samaʼeleʼö sanandrösa khö Mesia, ’Omasido sibai nomo Yehowa.’

Aefa daʼö, me döfi 33 M, ifuli zui ifofanö zogale moroi ba gosali Yesu. Lö omasi ia na so zangoʼaya omo Namania.