Me no aefa tebayagö idanö Yesu, iʼogunaʼö gehehania Lowalangi ba wanuturu lala khö Yesu enaʼö möi ia ba danö si mate. Lö si manga Yesu 40 hari ba olofo sibai ia. Lö ara, tohare Gafökha ba wanandraigö Yesu imane, ’Na sindruhu Ono Lowalangi ndraʼugö, baliʼö roti gara daʼa.’ Hizaʼi, itötöi Yesu nösi Mbuku Niʼamoniʼö, ’So ayati sangumaʼö wa tenga ha ba gönia auri niha. Lö tola löʼö taʼoʼö göi niwaʼö Yehowa.’

Aefa daʼö, itohugö nasa Afökha wanandraigö Yesu, ’Na sindruhu Ono Lowalangi ndraʼugö, fanaokaʼö si tou moroi ba mbumbu gosali börö me so ayati sangumaʼö ifatenge dania malaʼikania Lowalangi ba wanaya yaʼugö.’ Hizaʼi, ifuli zui itötöi Yesu nösi Mbuku Niʼamoniʼö, ’So ayati sangumaʼö wa tebai tatandraigö Yehowa.’

Lö ara, iforomaʼö fefu Satana wamatörö gulidanö awö waʼakayo ba faʼamolakhöminia. Imane Satana, ’Ubeʼe khöu fefu wamatörö daʼa awö lakhöminia asala öfosumange ndraʼo sakali manö.’ Hizaʼi, imane Yesu, ’Ofanö Satana! So ayati sangumaʼö ha Yehowa zinangea mufosumange.’

Mofanö Gafökha, ba tohare ndra malaʼika ba wameʼe gö Yesu. Me no aefa daʼö, ibörögö ituriaigö duria somuso dödö Yesu sanandrösa ba Wamatörö Lowalangi. Daʼö halöwö si lö tola löʼö ifalua ba gulidanö. Omasi fefu niha ba wamahaʼö Yesu andrö. Laʼoʼö ia gofu hezo möi ia.