Lö ara me no aefa tebayagö idanö Yesu, ibörögö wanuriaigö, ’No ahatö Wamatörö Lowalangi.’ Laʼoʼö ia ira nifahaʼönia ba zi sagörö Galilaia faoma Yudea. Me mangawuli Yesu ba Nazareta banua si tumbu yaʼia, möi ia ba nahia waʼowulo aefa daʼö ibokai ngaʼölu zura Yesaya. Mombaso ia, ’Yehowa zameʼe khögu eheha niʼamoniʼö enaʼö tola uturiaigö duria somuso dödö.’ Hadia geluahania? Omasi niha sato na ifalua dandra sahöli dödö Yesu. Hizaʼi, iwaʼö ba ayati daʼö, fanuriaigö turia somuso dödö daʼö mbörö wa tebeʼe khö Yesu geheha niʼamoniʼö. Aefa daʼö, imane ba niha sato si so ba daʼö, ’Maʼökhö andre, alua niwaʼö ayati daʼa.’

Aefa daʼö, möi Yesu ba Nasi Galilaia. Ba daʼö, falukha ia daöfa zi fagai si tobali nifahaʼönia ba gafuriata. Yaʼia daʼö Fetero, Andrea, Yakobo ba Yohane. Ikaoni ira imane, ’Mifao khögu, ba ubaliʼö ami samaʼuʼu niha.’ Laʼanemaiʼö laröi halöwöra wangalui kefe ba laʼoʼö ia. Laʼanöröi zi sagörö tanö Galilaia ba wanuriaigö Famatörö Yehowa. Laturiaigö ba nahia waʼowulo, ba fasa, hegöi ba lala. Gofu hezo möi ira, ato zoloʼö yaʼira. Tehöngö misa duria sanandrösa khö Yesu irugi Ziria.

Aefa daʼö, ibeʼe Yesu khö ndra nifahaʼönia waʼabölö ba wamofanö malaʼika si lö sökhi hegöi ba wamadöhö niha. Tanö böʼönia fao ira wanuriaigö turia somuso dödö ero-ero sambua banua sebua hegöi banua side-ide. So ösa ndra alawe soloʼö yaʼia simane Maria Magadala, Yohana, Susana, ba tanö böʼönia sombambaya soguna khö Yesu hegöi soloʼö khönia.

Me no aefa ifahaʼö ndra nifahaʼönia, ifatenge ira Yesu ba wanuriaigö. Möi ira ba Galilaia, ato niha tobali nifahaʼö Yesu ba labayagö ira idanö. Ato sibai zi tobali nifahaʼönia irege ifagölösi ira Yesu simane nowi si lö ara tö mubasi. Imane, ’Miʼangandrö khö Yehowa enaʼö ato ifatenge zohalöwö ba wamasi.’ Aefa daʼö, ifili nifahaʼönia si 70 ba ifatenge ira daru-darua ba wanuriaigö turia  somuso dödö ba Yudea. Lafahaʼö fefu niha sanandrösa ba Wamatörö Lowalangi. Me mangawuli ira, omuso sibai dödöra wamatunö khö Yesu hadia zi no lafalua. Itugu tehöngö wanuriaigö turia somuso dödö ba tebai ibatogö Afökha.

Omasi Yesu na latohugö ira nifahaʼönia wamalua halöwö sabölö moguna andre na no mangawuli ia ba zorugo. Börö daʼö imane khöra, ’Mituriaigö duria somuso dödö ba zi sagörö ulidanö. Mifahaʼö niha ba Daromali Lowalangi, ba mibayagö ira idanö.’