Me no ituriaigö duria somuso dödö ba zi döfi amatonga, ihalö gangetula sabölö moguna Yesu. Ifili niha si falulu fohalöwö khönia tobali sondröniaʼö ba mbanua niha Keriso. Fatua lö ihalö gangetula, iʼandrö wanuturu lala khö Yehowa. Möi ia mangandrö ba hili ha yaʼia sara wongi waʼara. Sihulö wongi daʼö, ikaoni ndra nifahaʼönia Yesu ba ifili zi 12 ndra sinengenia. Haniha döi zinenge Yesu si 12? Hadia lö olifuʼö? Yaʼia daʼö Fetero, Andrea, Yakobo, Yohane, Filifo, Batolomaiʼo, Toma, Mataiʼo, Yakobo ono Galifaiʼo, Tadaiʼo, Simoni, ba Yuda Kariota.

Ira sinengenia si Felendrua laʼoʼö ia gofu hezo so. Me no ifahaʼö, ifatenge ira wanuriaigö turia somuso dödö. Ibeʼe khöra kuaso Yehowa ba wamadöhö niha sofökhö hegöi ba wamofanö malaʼika si lö sökhi.

Ba wamaigi Yesu ira sinengenia si Felendrua, si fahuwu si tola ifaduhusi tödö. Moloʼö ira Farizaiʼo, ira sinenge andrö niha  si lö sekola ba niha si toʼölö manö. Hizaʼi, tenga simane daʼö Yesu, ifahaʼö ira. Fao ira khö Yesu ba ginötö waʼamoguna, duma-dumania fatua lö mate ia ba me no ifuli tesusugi. Moroi ba Galilaia zinenge si Felendrua andrö simane Yesu, ba so zi no mangowalu.

Lö moʼahonoa ira ba tola manö lafalua zala. Itaria lö laʼangeragö na mohede ira ba lahalö gangetula si fasala. Itaria lö khöra faʼebolo dödö. Samuza inötö faʼudu ira wamadöni haniha zabölö pade ba gotaluara. Hizaʼi, yaʼira niha sangomasiʼö Yehowa. Me no mangawuli Yesu ba zorugo, yaʼira ziföföna tobali ösi mbanua niha Keriso ba tebeʼe khöra halöwö sebua.