Laʼohe Yesu ira kafalo gere ba nomo gubernur. Manofu khöra Wilato, ’Hadia niböbögömi khö niha daʼa?’ Lamane, ’Razo ia iwaʼö!’ Manofu Wilato khö Yesu, ”Hadia, Razo Niha Yahudi ndraʼugö?” Imane Yesu, ”Tenga moroi ba gulidanö andre Wamatörögu.”

Aefa daʼö, iwaʼö Filato ba niha enaʼö laʼohe Yesu khö Herode, samatörö ba Galilaia. Omasi iʼila Filato hadia tola isöndra Herode zala nifalua Yesu. Hizaʼi, maʼifu lö hadöi sala nisöndra Herode. Börö daʼö, ifangawuli Yesu khö Wilato. Aefa daʼö, imane Filato ba niha sato, ’Yaʼodo hegöi Herode, maʼifu na masöndra zala ba niha daʼa. Uʼefasi ia.’ Muʼao niha sato, ’Bunu ia! Bunu ia!’ Laböbözi Yesu ira saradadu, ladiloi ia, ba lafalisi. Labeʼe dakula doi ba högönia ba laʼoʼaya ia, ’Yaʼahowu Razo Niha Yahudi.’ Imane zui Filato ba niha sato, ’Lö hadöi si sala ba niha daʼa.’ Hizaʼi, muʼao ira, ”Osö ia ba döla geu!” Börö daʼö, isarakö Filato ba dangara Yesu enaʼö labunu ia.

Laʼohe Yesu ira saradadu ba nahia nifotöi Gologata. Laʼosö ia ba döla geu nifasindro. Mangandrö Yesu, ’He Ama, efaʼö khöra zalara, börö me lö aboto ba dödöra hadia nifaluara.’ Laʼoʼaya-aya Yesu, ’Na Ono Lowalangi ndraʼugö, ae tou moroi ba döla geu andrö! Orifiʼö!’

Samösa niha si lö sökhi niʼosö ba zinga Yesu imane, ”Törö tödöu ndraʼo na möiʼö ba Wamatöröu.” Fazazi khönia Yesu, ”Awögu ndraʼugö ba Waradaiso.” Ba zi maʼökhö daʼö, ogömi fefu mbanua daʼö tölu za waʼara. So ösa nifahaʼö Yesu sozizio sahatö ba döla geu andrö fao ninania Maria. Iʼandrö Yesu khö Yohane enaʼö irorogö Maria simane inania samösa.

Ba gafuriata imane Yesu, ”No awai!” Aefa daʼö teköu högönia ba mate. Ba zi lö mudöna-döna, alua ndruru danö sabölö-bölö. Asika ba tebagi dua nukha mbaʼa-baʼa ba gosali, oto-oto Naha Niʼamoniʼö faoma Nahia Wondrege Niʼamoniʼö. Samösa zaradadu imane, ’Sindruhu wa Ono Lowalangi ia.’