Timoteo andrö ono matua si bohou ebua ba mbanua niha Keriso ba Lisitera. Bapania niha Yunani, ba mamania niha Yahudi. Iʼotarai ba waʼide-ide no ifahaʼö ia mamania Oinike hegöi nenenia Loise sanandrösa khö Yehowa.

Möi Waulo ba Lisitera ba wofanönia si mendrua. Iʼila wa omasi sibai Dimoteo ndra talifusö ba mbanua niha Keriso si so yaʼia ba omasi ia wanolo yaʼira. Iwaʼö Faulo khö Dimoteo enaʼö fao ira wofanö. Ifahaʼö Dimoteo enaʼö onekhe ia ba wanuriaigö hegöi ba wamomaha niha ba duria somuso dödö.

Gofu hezo möi Waulo faoma Timoteo, lö tebulö geheha niʼamoniʼö wanuturu lalara. Samuza inötö me bongi, alua khö Waulo gangilata. Samösa ndra matua sangandrö khönia weʼamöi ba Makedonia ba wanolo yaʼira. Börö daʼö, mofanö Waulo, Timoteo, Sila hegöi Luka möi ira manuriaigö turia somuso dödö ba daʼö ba lafasindro mbanua niha Keriso.

Ba mbanua Desalonika ba Makedonia, ato ndra matua hegöi ira alawe tobali ira niha Keriso. Hizaʼi, so ösa niha Yahudi safökhö tödö khö Waulo hegöi ira awönia. Laʼowuloi niha, aefa daʼö laʼohe Waulo hegöi ira awönia khö zamatörö ba mbanua. Muʼao ira, ’Tobali udu zamatörö Romawi ndra niha daʼa!’ Moloi Waulo faoma Timoteo ba zi bongi numalö ba Mberea enaʼö lö labunu ira.

Omasi sibai niha Mberea lafahaʼö ira ba duria somuso dödö. Niha Yunani faoma niha Yahudi ba daʼö, tobali ira niha Keriso. Me tohare ndra niha Yahudi moroi ba Desalonika ba laʼasogö gabula dödö, mofanö Waulo ba Atena. Toröi nasa Dimoteo faoma Sila ba Mberea ba wamarou tödö niha Keriso ba daʼö. Furi daʼö, iʼandrö Faulo khö Dimoteo enaʼö mangawuli ia ba Desalonika ba wanolo niha Keriso si  göna famakao. Aefa daʼö, iʼandrö Faulo khö Dimoteo weʼamöi ba mbanua niha Keriso tanö böʼö ba wamarou tödöra.

Imane Faulo khö Dimoteo, ’Niha somasi mangai halöwö khö Yehowa ba göna famakao.’ Lafakao ba labeʼe ba gurunga Dimoteo börö zi no ifaduhusi tödö. Omuso dödönia me tola iʼoromaʼö waʼalöfaröinia khö Yehowa.

Imane Faulo ba niha Wilifi, ’Ufatenge khömi Dimoteo. Yaʼia zamahaʼö yaʼami hewisa waʼauri niha si tobali enoni Yehowa, ba ifahaʼö ami hewisa lala wanuriaigö.’ Faduhu dödö Waulo wa tola ifalua daʼö Timoteo. Tobali ira si fahuwu ba zi hauga fakhe falulu fohalöwö ira.