Saulo andrö niha Roma si tumbu ba Dareso. Yaʼia samösa Farizaiʼo sonekhe ba Huku niha Yahudi, ba fatuwu sibai ia niha Keriso. Idöni ira baero moroi ba nomora ba ibeʼe ba gurunga. Fao ia wamaigi-maigi me mofönu niha sato ba latebu kara Zitefano irege mate.

Hizaʼi, lö ahono dödö Zaulo na ha ndrege iraʼu niha Keriso ba Yeruzalema. Iʼandrö khö gere sebua enaʼö tetehegö khönia weʼamöi ba mbanua sebua ba Ndramaseko ba wondraʼu niha Keriso si so ba daʼö. Me arakhagö ofeta Zaulo ba mbanua daʼö, lö idöna-döna tohare haga samasui yaʼia ba alabu ia tou ba danö. Irongo li si hede khönia sangumaʼö, ’He Saulo, hana wa öfakao ndraʼo?’ Manofu Zaulo, ’Haniha ndraʼugö?’ Imane si hede andrö, ’Yaʼodo Yesu. Aeʼe ba Ndramaseko, ba daʼö öʼila hadia zinangea öfalua.’ Izumaigö balunö Zaulo, ba lagogohe dangania weʼamöi ba mbanua sebua andrö.

Ba Ndramaseko, so samösa niha Keriso si lö faröi sotöi Anania. Imane khönia Yesu ba gangilata, ’Aeʼe ba nomo Yuda ba Lala Sadölö ba alui niha sotöi Saulo.’ Imane Anania, ’He Soʼaya, no urongo sanandrösa khö niha daʼö! Ato ndra nifahaʼö nibeʼenia ba gurunga!’ Hizaʼi imane Yesu, ’Falukhaisi manö ia. No ufili Zaulo tobali sanuriaigö turia somuso dödö ba ngawalö soi.’

Börö daʼö, mofanö Anania wamalukhaisi Saulo imane, ’He talifusögu Saulo, Yesu zamatenge yaʼo ba daʼa ba wamokai höröu.’ Iʼanemaiʼö iʼila niha Saulo. Aefa daʼö, ifahaʼö ia ba tobali soloʼö khö Yesu. Me no tebayagö ia idanö tobali niha Keriso, möi manuriaigö turia somuso dödö Zaulo ba nahia waʼowulo fao ia ba niha Keriso tanö böʼö. Hadia tola ökhalaigö hawaʼatokea dödö niha Yahudi me  laʼila ia ifahaʼö sanandrösa khö Yesu? Lamane, ’Hadia tenga yaʼia andre zondraʼu nifahaʼö Yesu mböröta?’

Tölu fakhe waʼara manuriaigö turia somuso dödö Zaulo ba Ndramaseko. Fatuwu niha Yahudi khö Zaulo ba laʼalui lala wamunu yaʼia. Hizaʼi, no larongo daʼö ira talifusö tanö böʼö, andrö latolo Zaulo wofanö ba mbanua daʼö. Ladada ia si tou ba raga-raga sebua lafatörö ba dowa göli mbanua si no latölaʼö.

Me möi Zaulo ba Yeruzalema, omasi ia fao khö ndra talifusö si so ba daʼö. Hizaʼi ataʼu ira khönia. Lö ara tohare samösa nifahaʼö sotöi Baranaba si sökhi tödö iʼohe Zaulo khö ndra sinenge. Ifaduhuʼö khöra wa no ifalalini gera-erania Saulo. Ibörögö owölö-ölö Zaulo wangombakha turia somuso dödö ba Yeruzalema si fao banua niha Keriso ba Yeruzalema. Ba gafuriata, lafotöi ia Faulo.