So samösa zaradadu Romawi sebua faka ba Kaisarea töinia Konelio. Yaʼia tenga niha Yahudi hizaʼi lafosumange ia ira niha Yahudi. Omasi ia itolo niha si numana ba si tosasa. Faduhu dödö Konelio khö Yehowa ba asese mangandrö ia. Samuza maʼökhö, ifalukhaisi ia malaʼika imane, ’No ifondrondrongo wangandröu Lowalangi. Iadaʼa, fatenge niha ba mbanua sebua ba Yofe, banua si toröi Wetero. Waʼö khönia enaʼö möi ia ba daʼa.’ Lö ara, ifatenge datölu ndra matua Konelio si möi ba Yofe. So mato 50 kilometer moroi ba daʼö.

Gasa-gasa daʼö ba Yafo, alua gangilata khö Wetero. Iʼila gurifö si tebai laʼa ira niha Yahudi. Aefa daʼö irongo li sangumaʼö khönia wemanga daʼö. Lö omasi Wetero ba imane, ’Lö irai uʼa gurifö salakha.’ Imane khönia si hede andrö, ’Böi baliʼö salakha daʼa. No ihaogö Lowalangi.’ Lafatunö göi khö Wetero, ’So datölu ndra matua föna nomomö. Ofanö fao khöra.’ Möi Wetero föna nomonia ba manofu ia khö ndra matua daʼö hadia mbörö wa tohare ira. Lamane, ’Nifatenge Gonelio ndraʼaga saradadu Romawi sebua faka ba wogaoni yaʼugö enaʼö möiʼö ba nomonia ba Kaisarea.’ Iwaʼö khöra Fetero enaʼö ba daʼö  mörö ira ba zi sara wongi. Mahemolunia, mofanö ira ba Kaisarea ba so ösa niha Keriso moroi ba Yafo zi fao khöra.

Me falukha ira Wetero, iʼanemaiʼö ituhi danö Konelio. Imane khönia Fetero, ’Ozizio! Niha göi ndraʼo simane yaʼugö. Lowalangi zamatenge yaʼo ba nomomö hewaʼae na si toʼölönia tebai möi niha Yahudi ba nomo Niha Baero. Iadaʼa, fatunö khögu hana wa öfakaoniʼö ndraʼo ba daʼa.’

Imane Konelio khö Wetero, ’Öfa hari silalö me mangandrö ndraʼo, so malaʼika si hede khögu ba wogaoni yaʼugö. Maʼandrö khöu fahaʼö ndraʼaga ba daromali Yehowa.’ Imane Fetero, ’Aboto ba dödögu iadaʼa wa lö ifaigi mbawa niha Lowalangi. Omasi itemaʼö gofu haniha manö zomasi mamosumange yaʼia.’ Oya zanandrösa khö Yesu nifahaʼö Wetero khöra. Aefa daʼö, itema geheha niʼamoniʼö Konelio hegöi si sambua omo khönia ba labayagö ira idanö fefu.