No izazi Yehowa, ’Dania, lö hadöi saʼae sege-ege, sofökhö, mazui si mate. Uʼosi dania dawa höröra. Fefu ngawalö zi lö sökhi si no alua mböröta, lö saʼae itörö tödö.’

Ifazökhi Yehowa kabu Edena enaʼö ba daʼö toröi Gadamo faoma Khawa ba lasöndra waʼauri si sökhi ba somuso dödö. Enaʼö lafosumange Nama si so ba zorugo ba moʼono ira lafönui gulidanö. Hizaʼi, lö laʼoʼö niwaʼö Yehowa ira Adamo ba Khawa. Hewaʼae simanö, lö tebulö gohitö dödönia. Ba mbuku daʼa, taʼila wa hasambalö ifalua zi no izazi Lowalangi. Simane zazinia khö Gaberahamo, Famatörö Lowalangi zangaʼasogö ngawalö zi sökhi ba gulidanö maʼasagörö.

Ba zi lö ara tö, tehori Zatana, awö ndra malaʼikania hegöi niha si lö sökhi. Fefu niha niʼorifi lafosumange Yehowa. Ba daʼö dania, lö saʼae mofökhö ita mazui mate. Ero moluo maoso ita si fao faʼomuso dödö ba lö mangarö-ngarö. Tobali faradaiso gulidanö. Ahori so gö si sökhi ba niha hegöi omo si baga. Sökhi gamuata niha fefu, lö hadöi samuʼi. Lö ataʼu gurifö ba niha ba lö göi ataʼu ita khöra.

Na inötö isusugi Yehowa dania niha si no mate, tatu omuso dödöda fefu. Tatemaʼö niha me föna simane Habeli, Noakhi, Aberahamo, Sara, Moze, Ruti, Esitera, ba Dawido. Fao ira ba wombaliʼö Ulidanö tobali faradaiso. Lö aetu halöwö si sökhi ba sadöni dödö.

Omasi Yehowa na so ndraʼugö ba daʼö. Awena dania aboto ba dödöu haniha ia sindruhunia hewaʼae lö irai ökhalaigö iadaʼa. Dataʼodödögö wahuwusa khö Yehowa ero maʼökhö, iʼotarai iadaʼa irugi zi lö aetu!