Me itugu ara ginötö, itugu ato niha ba gulidanö. Ato ba gotaluara zi lö sökhi. Mendrua manö me so ösa malaʼika si lö sökhi. Laröi nahiara ba zorugo ba möi ira ba gulidanö. Öʼila hadia mbörö wa lafalua daʼö? Omasi ira tobali niha ba mangowalu ba ndra alawe.

Moʼono ndra alawe andrö me no orudu khöra ndra malaʼika. Iraonora tobali niha sagabölö ba samakao-kao niha. Lö itehegö manö alua daʼö Yehowa. Börö daʼö, iʼasogö waʼanönö danö idanö ba wangohori niha si lö sökhi.

Hizaʼi, so samösa niha si faböʼö moroi khöra. Iʼomasiʼö Yehowa. Töinia Noakhi. So woʼomonia ira alawe ba datölu ndraononia, yaʼia daʼö Semi, Khamo, ba Yafeti. Yaʼira si datölu andrö, no so woʼomora zamösana. Iwaʼö Yehowa khö Noakhi ba wamazökhi owo sebua, enaʼö tola teʼorifi ia hegöi ösi nomonia moroi ba Waʼanönö Danö Idanö. Owo yaʼia daʼö kota-kota sebua moroi ba geu si tola molangi ba nidanö. Iwaʼö göi Yehowa khö Noakhi enaʼö oya iʼohe gurifö ba nowo faböi mate ira.

Ifazökhi nowo Noakhi. Mato 50 fakhe waʼara Noakhi hegöi ösi nomonia ba wamazökhi owo andrö. Lafazökhi ia tefaudu simane niwaʼö Yehowa khöra. Ba ginötö daʼö göi, ifatunö Noakhi misa ba niha sanandrösa ba Waʼanönö Danö Idanö. Hizaʼi samösa lö somasi mamondrondrongo yaʼia.

Irugi inötö khöra weʼamöi ba nowo. Dataʼalui hadia zalua aefa daʼö.