Ifahaʼö Aberahamo nononia Izaʼaki ba wangomasiʼö Yehowa hegöi enaʼö faduhu dödönia fefu zi no ifabuʼu Yehowa. Me irugi mato 25 fakhe ndröfi Gizaʼaki, so niʼandrö Yehowa khö Gaberahamo sabua sibai. Hadia daʼö?

Imane Lowalangi khö Gaberahamo, ’Ohe nonomö andrö si ha sambua ba danö hili Moria baliʼö ia sumange.’ Lö aboto ba dödö Gaberahamo hana wa iʼandrö khönia Yehowa wamalua daʼö. Hizaʼi, iʼoʼö manö niwaʼö Yehowa.

Sihulö wongi sibai, iʼohe Gizaʼaki Aberahamo awö darua zangai halöwö khönia ba mofanö ira ba hili Moria. Tölu hari aefa daʼö, oroma khöra hili daʼö moroi ba zaröu. Iʼandrö Aberahamo ba zohalöwö khönia si darua andrö enaʼö labaloi, ba mofanö ira ononia Izaʼaki ba wameʼe sumange. Iwaʼö Aberahamo khö Gizaʼaki ba wolohe eu galitö, ba iʼohe sara rosö Aberahamo. Manofu Gizaʼaki khö namania, ’Hezo mbiri-biri nibeʼeda sumange?’ Imane Aberahamo, ’Yehowa zohenaigö daʼö nogu.’

Me no larugi hili, lafazökhi naha wameʼe sumange. Aefa daʼö, iböbö Aberahamo danga hegöi ahe Gizaʼaki ba ifadölö yawa ba naha wameʼe sumange.

Ihalö rosönia Aberahamo. Hizaʼi, mohede malaʼika Yehowa moroi ba zorugo, ’He Aberahamo! Böi babaya ia! Aboto ba dödögu iadaʼa wa mamati ndraʼugö khö Lowalangi  börö me ötehegö tobali sumange nonomö.’ Aefa daʼö, iʼila Aberahamo sageu mbiri-biri si matua si no tokhai tandru ba wewe. Iʼanemaiʼö itotoʼö mböbö Gizaʼaki ba ibaliʼö sumange mbiri-biri daʼö.

Iʼotarai daʼö, iwaʼö Yehowa wa si fahuwu khönia Gaberahamo. Öʼila hadia mbörö? Börö me ifalua Aberahamo niwaʼö Yehowa hewaʼae lö aboto ba dödönia hadia mbörö wa iwaʼö khönia Yehowa wamalua daʼö.

Aefa daʼö, ifuli zui iwaʼö mbuʼusa linia Yehowa khö Gaberahamo, ’Ufahowuʼö ndraʼugö hegöi ngaʼötömö mazui onou ba uʼoyaʼö ira.’ Eluahania, moroi ba ngaʼötö Gaberahamo dania ifahowuʼö Yehowa fefu niha si sökhi.