Me no irongo Faraʼo mofanö ndraono Gizaraʼeli, tebulö zui wangera-ngerania. Iwaʼö khö ndra saradadunia, ’Mifaʼanö gureta wanuwö. Datagohi ira! Sindruhunia lö tatehe mofanö ira.’ Börö daʼö igohi ndraono Gizaraʼeli Faraʼo awö zaradadunia.

Ituturu lala ndraono Gizaraʼeli Yehowa faoma lawuo ba zi maʼökhö, alitö na ba zi bongi. Iʼohe ira ba Nasi Soyo, aefa daʼö iʼandrö khöra Yehowa enaʼö lataruʼö nosera ba daʼö.

Lö ara, laʼila iraono Gizaraʼeli Waraʼo faoma saradadunia. No teʼuʼu ira ba gotalua nasi faoma saradadu Miserai. Lamane khö Moze, ’Si mate ita! Si bagania, böi heta menaʼö ndraʼaga ba danö Miserai.’ Hizaʼi imane Moze, ’Böi miʼataʼufi, Yehowa zangefaʼö yaʼita.’ Sindruhu-ndruhu wa faduhu dödö Moze khö Yehowa.

Iwaʼö Yehowa ba ndraono Gizaraʼeli enaʼö lafaʼanö ira wofanö. Bongi daʼö ifawuʼa lawuo andrö Yehowa, ibeʼe ba gotalua ndraono Gizaraʼeli faoma niha Miserai. Tobali faʼogömi-gömi ba niha Miserai, hizaʼi tobali haga ba ndraono Gizaraʼeli.

 Iwaʼö Yehowa khö Moze enaʼö ifazawa ziʼonia tanö ba nasi. Aefa daʼö iʼasogö Yehowa nangi sabölö-bölö ba zi sara wongi daʼö. Lua-luania fabali nasi ba so lala ba gotaluania. Zuta ndraono Gizaraʼeli latörö danö sabeʼe. Tobali towa khöra nidanö nasi ba gambölö hegöi ba gabera.

Lagoʼö ndraono Gizaraʼeli ira saradadu Waraʼo ba danö sabeʼe andrö. Aefa daʼö, ifawukaisi Yehowa ndra saradadu Waraʼo. Agaheta gaolo-gaolo guretara. Muʼao ndra saradadu andrö lamane, ’Miʼoloi! Yehowa zi fasuwö salahira.’

Imane Yehowa khö Moze, ’Fazawa ziʼomö tanö ba nasi.’ Izumaigö fahalö nasi andrö ihawui zaradadu Miserai. Mate fefu zaradadu hegöi Faraʼo. Samösa lö sauri.

Tanö yefo, manunö fefu niha ba wanuno Lowalangi, ’Miʼanunö khö Yehowa börö me no möna ia si fao faʼahöli-höli dödö. Itiboʼö ba nasi kudo awö zi fakudo andrö khönia.’ Manari ndra alawe ba labözi damburu. Omuso dödö niha sato börö me no teʼefaʼö ira.