Lafaʼema goroisa Lowalangi andre ira Moze hegöi Aʼaroni khö Waraʼo: ’Na lö ötehegö mofanö nono mbanuagu, uʼasogö ndri mböhö ba danö daʼa.’ Lö ara, kalua ndri mböhö soya lahawui nomo niha Miserai, he si kayo hegöi si numana. Afönu soi daʼö di mböhö. Hizaʼi ba nahia ndraono Gizaraʼeli ba danö Gosena, lö hadöi di mböhö. Tebörögö moroi ba wamakao si öfa andre, ha niha Miserai zi göna. Imane Faraʼo, ’Andrö khö Yehowa enaʼö iheta ndri mböhö daʼa, ba tola mofanö ndraono Gizaraʼeli.’ Hizaʼi me no aefa iheta ndri mböhö andrö Yehowa, ifuli zui faböʼö wangera-ngera Waraʼo. Hawaʼara awena ibato Faraʼo?

Imane Yehowa, ’Na lö iʼefasi nono mbanuagu Faraʼo, fefu gurifö niha Miserai, mofökhö ba mate.’ Mahemolunia, alua daʼö. Hizaʼi lö mate gurifö ndraono Gizaraʼeli. Hewaʼae simanö, lö tebulö waʼabeʼe högö Waraʼo. Lö mangala ia.

Aefa daʼö iwaʼö Yehowa khö Moze ba wamalukhaisi Faraʼo enaʼö ifazaumba gawu-gawu ba dalu mbanua. Mozawili gawu-gawu andrö ba fakitö ba niha Miserai, irege tobali faosa sagafökhö ba nösi niha Miserai hegöi uriföra. Hewaʼae simanö lö itehegö Faraʼo mofanö ndraono Gizaraʼeli.

Ifuli zui ifatenge Moze Yehowa ba wamalukhaisi Faraʼo wamaʼema fehede daʼa: ’Hadia lö omasiʼö nasa ötehegö mofanö nono  mbanuagu? Mahemolu, alua deu esi ba soi daʼa.’ Mahemolunia, iʼasogö deu esi Yehowa, fao gari mbanua ba alitö. Lö irai laʼila ira niha Miserai waʼabölö-bölö deu esi awö gari mbanua andrö. Tekiko fefu geu awö zinanö. Hizaʼi, lö hadia ia salua ba Gosena. Imane Faraʼo, ’Andrö khö Yehowa enaʼö iböhöli daʼa! Aefa daʼö, tola mofanö ami.’ Hizaʼi me no tebato deu esi, faböʼö zui wangera-ngera Waraʼo.

Imane Moze, ’Iadaʼa, sinanö si lö tekiko ba deu esi, tamo zi manga yaʼia.’ Tohare damo, zuta waʼoya. Laʼa fefu zi toröi ba nowi hegöi ba döla geu. Imane Faraʼo, ’Andrö khö Yehowa enaʼö iheta fefu damo daʼa.’ Hizaʼi me no iböhöli fefu daʼa Yehowa, lö tebulö waʼabeʼe högö Waraʼo.

Imane Yehowa khö Moze, ’Fazawa dangamö ba dalu mbanua.’ Ba ogömi fefu dalu mbanua tölu ngaluo waʼara. Lö laʼila hadia ia ira niha Miserai. Ha iraono Gizaraʼeli zi tola mangila haga moroi ba nomora.

Aefa daʼö imane Faraʼo khö Moze, ’Yaʼugö hegöi iraono Gizaraʼeli tanö böʼö, tola mofanö ami. Hizaʼi böi miʼohe gurifömi.’ Imane Moze, ’Hasambalö maʼohe guriföma enaʼö tola mabeʼe sumange khö Lowalangi.’ Mofönu sibai Waraʼo. Muʼao ia, ’Ofanö! Na uʼilaʼö sakali tö, ba hasambalö ubunuʼö.’