Yosefo andrö samösa moroi ba gotalua nono Yakobo sabölö awuyu-wuyu. Laʼila ira gaʼania wa Yosefo andre ono fondrege niʼomasiʼö namara. Moloʼö yaʼugö hewisa dödö ndra gaʼania? Afökhö dödöra ba fatuwu ira khö Yosefo. Me mangifi Yosefo, itutunö wangifinia khö ndra gaʼania. Eluaha wangifinia andrö, samuza inötö dania latuhi danö fönania. Daʼö mbörö wa fatuwu sibai ira khö Yosefo!

Samuza maʼökhö, no möi ba mbanua sahatö ba Zikhema ndra gaʼania ba wanaro biri-biri. Ifatenge Yakobo nononia Yosefo ba wamaigi ira gaʼania. Me laʼila Yosefo moroi ba zaröu, faoma lamane, ’Hiza tuka zangifi. Databunu ia!’ Ladöni ia ba lafazaumba ba dögi sabakha. Hizaʼi samösa moroi ba gotalua ndra gaʼania sotöi Yehuda, imane, ’Böi tabunu ia! Tafamawa manö ia tobali sawuyu.’ Börö daʼö, lafamawa Yosefo ba niha sogale Midiano si möi ba Miserai, ha 20 rufia firö.

Aefa daʼö laʼungugö mbaru Yosefo ba ndro nambi ba lafaʼoheʼö khö namara lamane, ’Faigi atö, hadia baru nonomö daʼa mazui tenga?’ Tobali, si so ba dödö Yakobo, no mate Yosefo börö gurifö samuʼi. Abu sibai dödö Yakobo, ba lö hadöi si tola mondrara tödönia.

Ba Miserai, ba daʼö tefamawa Yosefo tobali sawuyu khö pejabat sebua faka sotöi Fotifa. Hizaʼi lö iböhöli Yehowa wanolo Yosefo. Iʼila Fotifa wa sökhi na mohalöwö Yosefo, ba tola nifaduhusi tödö. Daʼö mbörö wa iwaʼö Fotifa khö Yosefo enaʼö yaʼia zondrorogö fefu haratonia.

Iʼila foʼomo Wotifa wa no siga-siga Yosefo. Ero maʼökhö iʼandrö khö Yosefo enaʼö fao ira wemörö. Hadia nifalua Yosefo? Itimbagö ba  imane, ’Löʼö! Tebai ufalua daʼö. No ifaduhusi tödö ndraʼo kafalogu, ba foʼomonia ndraʼugö. Na fao ndraʼo khöu wemörö, ba no ufalua horö föna Lowalangi!’

Samuza maʼökhö, ifaso Yosefo donga Wotifa enaʼö fao ira wemörö. Isöbi mbaru Yosefo, hizaʼi ilau moloi Yosefo. Me mangawuli Wotifa, ilimo ia foʼomonia. Ifatunö wa edöna ihoröni ia Yosefo. Börö daʼö, mofönu sibai Wotifa ba iʼandrö enaʼö labeʼe ba gurunga Yosefo. Hewaʼae simanö, lö olifu Yehowa zalua khö Yosefo.