Mato dua waŵa me no laröi Miserai, ofeta ndraono Gizaraʼeli ba Hili Zinaʼi ba lataruʼö nosera ba daʼö. Iwaʼö Yehowa khö Moze weʼamöi ba hili ba imane khönia, ’No uʼefaʼö ndraono Gizaraʼeli. Na laʼoʼö niwaʼögu ba lafalua goroisagu tobali ira soi nifiligu.’ Möi mitou Moze ba wangombakha ba ndraono Gizaraʼeli hadia niwaʼö Yehowa. Me larongo daʼö, lamane, ’Mafalua fefu zi no iwaʼö Yehowa.’

Aefa daʼö ifuli zui möi Moze ba hili, imane khönia Yehowa, ’Dua hari tö, fahuhuo ndraʼo khömi. Fatunö ba ndraono Gizaraʼeli wa tebai möi ira miyawa ba Hili Zinaʼi.’ Möi mitou Moze ba ifatunö khöra enaʼö lafaʼanö-anö ira ba wamondrondrongo niwaʼö Yehowa.

Dua hari aefa daʼö, laʼila iraono Gizaraʼeli gari mbanua ba lawuo saitö ba hili daʼö. Larongo göi weʼugu-ugu mbanua awö li dorofe. Aefa daʼö, möi tou Yehowa ba hili andrö si fao alitö. Manizi-nizi ndraono Gizaraʼeli börö waʼataʼu. Abölö-bölö wodögö hili andrö ba no ihawui simbo. Itugu ebua li dorofe. Aefa daʼö imane Lowalangi, ’Yaʼo Yehowa. Tebai mifosumange lowalangi tanö böʼö.’

Ifuli zui möi Moze ba hili, ba daʼö ibeʼe goroisania Yehowa ba ndraono Gizaraʼeli. Oroisa andrö zangombakha khöra hewisa lalara ba wamosumange yaʼia ba hadia zinangea lafalua. Moze zanura oroisa daʼö ba ibaso ba ndraono Gizaraʼeli. Fazazi ira khö Lowalangi, ’Mafalua fefu zi no iwaʼö Yehowa.’ Hizaʼi hadia lafalua zi no lazazi?