Imane Yehowa khö Moze, ’Aeʼe ba hili ba wamalukhaisi yaʼo. Usura goroisagu ba ngaʼörö gara aefa daʼö ubeʼe khöu.’ Andrö möi Moze miyawa ba hili ba toröi ia ba daʼö 40 ngaluo 40 wongi. Isura goroisania Yehowa ba zi dua ngaʼörö kara aefa daʼö ibeʼe khö Moze. Oroisa daʼö lafotöi ia zi Fulu Oroisa.

Fangumaʼö ndraono Gizaraʼeli no iröi ira Moze. Börö daʼö lamane khö Gaʼaroni, ’Fazökhi lowalangi sondröniaʼö yaʼaga!’ Imane Aʼaroni, ’Miʼohe ba daʼa ganaʼami.’ Ifazökhi Aʼaroni nadu ono zawi moroi ba ganaʼa andrö. Lamane, ’Adu daʼa Lowalangida, sangeheta yaʼita moroi ba Miserai!’ Lasömba nadu andrö ba lafalua gowasa. Hadia tola daʼö? Tebai. No fazazi ira wa ha Yehowa nifosumangera. Hizaʼi lö latörö zi no lafabuʼu.

Iʼila daʼö Yehowa ba imane khö Moze, ’Ae mitou khöra. Lö laʼoʼö niwaʼögu iraono Gizaraʼeli. No lasömba  lowalangi faya.’ Möi mitou Moze ba no iʼohe zi dua ngaʼörö kara andrö moroi khö Lowalangi.

Me ahatö irugi nose, irongo-rongo Moze niha sanunö. Aefa daʼö iʼila me manari-nari ira ba lafaöndrö ira föna nadu andrö. Mofönu sibai Moze. Itiboʼö tou ba danö zi dua görö kara andrö irege mozawili. Iʼanemaiʼö ifakiko nadu andrö khöra. Aefa daʼö manofu ia khö Gaʼaroni, ’Hana wa öʼoʼö me lawaʼö khöu wamalua si lö sökhi andre?’ Imane Aʼaroni, ’Böi ofönu. No aboto ba dödöu hewisa ira andrö. Omasi ira so lowalangira, andrö ufazaumba ganaʼara ba galitö ba tobali adu simane daʼa!’ Sindruhunia tebai ifalua daʼö Aʼaroni. Ifuli ia Moze miyawa ba hili ba wangandrö khö Yehowa enaʼö iʼefaʼö zalara.

Omasi Yehowa wangefaʼö sala niha sangataʼufi yaʼia. Hadia aboto ba dödöu iadaʼa hana wa lö tola löʼö laʼoʼö iraono Gizaraʼeli niwaʼö Moze andrö sondröniaʼö yaʼira?