Me mofanö zamauze moroi ba Gizaraʼeli numalö ba mbanua Yerikho, toröi ira ba nomo ndra alawe sotöi Rakhaba. No iʼila ira razo Yerikho, andrö ifatenge zaradadu ba nomo Rakhaba. Ibiniʼö zamauze andrö Rakhaba yawa ba dete zagö ba iwaʼö khöra enaʼö laʼalui ba nahia tanö böʼö. Imane Rakhaba khö ndra samauze andrö, ’Utolo ami börö me aboto ba dödögu wa Yehowa zi fao khömi ba hasambalö mikalaisi soi daʼa. Mifazazi khögu wa teʼorifi fefu nösi nomogu.’

Lamane ira samauze andrö, ’Mazazi khöu wa teʼorifi fefu ami. Böbö zinali soyo ba zandrela ba teʼorifi fefu nösi nomou.’

Iwaʼö Rakhaba khö ndra samauze enaʼö möi ira tou latörö zandrela faoma sinali andrö. Mofanö ira ba hili ba tölu hari labiniʼö ira. Aefa daʼö, lafuli ira khö Yosua. Lö ara, laʼötö Nungo Nidanö Yoridano iraono Gizaraʼeli ba lahenaigö ira ba wokalaisi soi daʼö. Banua si oföna lakalaisi yaʼia daʼö Yerikho. Iʼandrö khöra Yehowa  enaʼö lafasui mbanua daʼö sakali maʼökhö sagötö ba zi önö hari. Ba ngaluo si fitu, lafasui mbanua andrö fitu kali. Aefa daʼö, lafoli dorofe ira ere ba laʼosindruhugö weʼao ira saradadu. Lua-luania adudu göli mbanua andrö! Hewaʼae simanö, lö tekiko nomo Rakhaba. Teʼorifi nösi nomo Rakhaba börö me faduhu dödöra khö Yehowa.