Ere Sebua sotöi Eli, darua nononia sangai halöwö si tobali ere ba nose Lowalangi yaʼia daʼö Hofini ba Fineha. Iraononia andre lö laʼoʼö niwaʼö Yehowa ba amuʼi ira ba niha böʼö. Me laʼohe zumange khö Yehowa iraono Gizaraʼeli, Hofini faoma Fineha lahalö khöra nagole sabölö sökhi. No irongo Eli gamuata ndraononia, hizaʼi lö hede-hedenia. Hadia itehegö manö daʼö Yehowa?

Hewaʼae aröu siaʼa Hofini faoma Fineha moroi khö Zamueli, tenga simane daʼö gamuatania. Omasi Yehowa lagu Zamueli. Samuza inötö me bongi, me mörö Zamueli, irongo-rongo lakaoni-kaoni döinia. Maoso ia ba ifalukhaisi Eli aefa daʼö imane, ’Hana Tua?’ Imane khönia Eli, ’Lö nikaonigu yaʼugö. Ae fuli förö.’ Ifuli ia wemörö Samueli. Hizaʼi, ifuli zui alua zimane daʼö. Me irongo zi hede andrö Samueli ba zi medölu kali, aboto ba dödö Eli wa li Yehowa daʼö. Ifatunö Eli khö Zamueli wa na ifuli irongo zi hede andrö, imane wanema li, ’Fahuhuo Yehowa. Irongo enonimö.’

Ifuli mörö Zamueli. Aefa daʼö irongo li, ’He Samueli! He Samueli!’ Itema li, ’Fahuhuo Yehowa. Irongo enonimö.’ Imane Yehowa, ’Fatunö khö Eli wa uhuku ia awö nösi nomonia. No iʼila waʼalösökhi nononia  ba nose Lowalangi hizaʼi lö hede-hedenia.’ Sihulö wongi daʼö, simane si toʼölö ibokai mbawandruhö nose Lowalangi Samueli. Ataʼu ia wamatunö khö gere sebua hadia niwaʼö Yehowa. Hizaʼi ikaoni ia Eli imane, ’He nogu, hadia niwaʼö Yehowa khömö? Fatunö khögu.’ Tobali, ifatunö khö Eli fefu nirongonia Samueli.

Tedou waʼebua-bua Zamueli, itolo ia Yehowa. Aboto ba dödö ndraono Gizaraʼeli fefu ba laʼila wa Samueli nifili Yehowa si tobali samaʼeleʼö ba sanguhuku.