FAMAHAʼÖ 33
Ruti ba Naʼemi
Me alua lofo ba Gizaraʼeli, so samösa ndra alawe Gizaraʼeli sotöi Naʼemi si findra ba danö Moabi, fao ia khö woʼomonia ira matua ba darua nononia. Ba gafuriata, mate woʼomo Naʼemi. Mangowalu ndraononia ba ndra alawe Moabi, yaʼia daʼö Ruti ba Orafa. Hizaʼi, ba zi lö arara mate göi ndraononia matua.
Me irongo Naʼemi no awai saʼae mbaŵa lofo, ifuli ia ba Gizaraʼeli. Fao khönia Ruti faoma Orafa. Hizaʼi, me so ira ba lala, imane khöra Naʼemi, ’No tobali ami foʼomo hegöi umönö si sökhi. Omasido na ifuli möi ami nihalö. Miʼangawuli ba Moabi.’ Lamane khönia ira alawe si darua andrö, ’Omasiga sibai ndraʼugö! Lö omasiga fabali khömö.’ Hizaʼi, lö ibato Naʼemi wangumaʼö khöra enaʼö lafuli ira. Ba gafuriata, mangawuli Orafa, hizaʼi toröi Ruti ba fao ia khö Naʼemi. Börö daʼö imane khönia Naʼemi, ’No mangawuli Orafa ba mbanuania hegöi khö lowalanginia. Mifao, oʼö ia ba angawuli ba nomo ndra satuau.’ Hizaʼi, imane Ruti, ’Lö omasido uröi ndraʼugö. Banuamö tobali banuagu, ba Lowalangimö tobali Lowalangigu.’ Moloʼö yaʼugö, hewisa dödö Naʼemi me irongo wehede Ruti andrö?
Ofeta Ruti hegöi Naʼemi ba Gizaraʼeli me tebörögö wamasi barli. Samuza maʼökhö, möi iʼowuloi Ruti zi toröi mbasitö ba nowi Mboasi, ono Rakhaba. No irongo Boasi wa Ruti andrö ira alawe Moabi si lö faröi khö Naʼemi. Tobali, iwaʼö Boasi ba zohalöwö khönia enaʼö oya maʼifu laröi barli ba nowi, enaʼö tola iʼozaragö Ruti.
Ba zi bonginia, manofu Naʼemi khö Ruti, ’Haʼökhö nowi mohalöwöʼö maʼökhö?’ Itema Ruti, ’Ba nowi ndra matua sotöi Boasi.’ Aefa daʼö imane khönia Naʼemi, ’Boasi andrö si fahatö khö woʼomogu. Tohugö wohalöwö ba nowinia. Faogö ndraʼugö ba nono alawe tanö böʼö. Lö sametaʼu yaʼugö ba daʼö.’
Mohalöwö Ruti ba nowi Mboasi irege awai wamasi. Inehe-nehegö Boasi wa Ruti andrö ira alawe sowölö-ölö ba si sökhi amuata. Ba götö daʼö, na so ndra matua si no mate ba lö khönia ono matua, tola itohugö talifusönia matua wangai foʼomo gaʼania andrö. Tobali, mangowalu Mboasi khö Ruti. Tumbu khöra nono matua sotöi Obedi, daʼö dania zi tobali tua Razo Dawido. Omuso sibai dödö nawö-awö Naʼemi. Lamane khönia, ’Siföföna sibai, ibeʼe khöu Yehowa zotöi Ruti, si sökhi amuata. Iadaʼa, so maʼuwumö. Nisuno Yehowa.’
”So zi fahuwu sabölö ahatö moroi ba zi fatalifusö.”—Amaedola 18:24
Te Göi Adöni Dödöu
MI’OHIA’Ö WAMATIRA
Ruti—”Ira Alawe si Sökhi Bua-Bua”
Hana wa moguna sibai wangowalu Ruti khö Mboasi? Hadia wamaha’ö si tola tahalö khö Ruti ba Na’emi sanandrösa ba nösi nomo?
MI’OHIA’Ö WAMATIRA
Ruti—”Ba zi Möi Ndra’ugö Sa, ba Da’ö Möi Ndra’o Göi”
Hana wa iröi dalifusönia Ruti hegöi tanö si tumbu ia? Hadia gamuata niforoma’önia irege i’omasi’ö ia Yehowa?
