Ato zui ndraono Gizaraʼeli zamosumange adu, börö daʼö itehegö Yehowa ba niha Wilisiti ba wamatörö yaʼira. Hizaʼi, so mato hadauga tö ndraono Gizaraʼeli sangomasiʼö Yehowa. Samösa moroi ba gotaluara, Manoa. Yaʼia hegöi foʼomonia ira alawe lö hadöi khöra iraono. Samuza maʼökhö ifatenge malaʼikania Yehowa khö woʼomo Manoa. Imane malaʼika andrö, ’Hasambalö so nonou. Yaʼia zangefaʼö iraono Gizaraʼeli moroi ba danga niha Wilisiti. Tobali ia niha si Naziri.’ Hadia aboto ba dödöu niha si Naziri andrö? Yaʼira andrö nituyu si no mutatugöi ba wangai halöwö khö Yehowa. Tebai laguti mbu högöra.

Aefa daʼö tumbu nono Manoa ba labeʼe töinia Simesono. Me no ebua Zimesono, iʼabölöʼö ia Yehowa. Tola ibunu zingo faoma tangania ba no irai ibunu 30 niha Wilisiti ha yaʼia. Fatuwu khönia niha Wilisiti ba laʼalui lala wamunu yaʼia. Samuza inötö, möi ba Gaza Zimesono. Me mörö ia, mofanö ira ba mbawa göli mbanua ba labaloi ba daʼö enaʼö tola labunu ia moluo mahemolu. Hizaʼi, me talu mbongi maoso Zimesono möi ia ba mbawa göli mbanua, ideha göli andrö. Iʼonoro göli daʼö irugi zuzu hili sahatö ba Heberona!

Ba gafuriata, lafalukhaisi Delila niʼomasiʼö Zimesono ira niha Wilisiti ba lamane, ’Mabeʼe khöu gefe sebua na öfatunö khöma hadia mbörö wa abölö sibai Zimesono. Omasiga maraʼu ba mabeʼe ia ba gurunga.’ Börö me omasi Delila gefe sebua, andrö wa fao dödönia. Ba wamobörö lö ifatunö khönia Simesono. Hizaʼi börö me iforege wangumaʼö khö Zimesono, andrö ifatunö manö khönia ba gafuriata. Imane Simesono, ’Lö irai laguti mbu högögu börö me niha Naziri ndraʼo. Na laguti mbu högögu ba taya waʼabölögu.’ Sindruhunia, tebai menaʼö ifatunö daʼö Simesono.

 Iʼanemaiʼö ifatunö Delila khö ndra niha Wilisiti, ’No uʼila saʼae hadia mbörö!’ Ifeförö Zimesono ba gahetania Delila, aefa daʼö iwaʼö samösa zoguti bu högö Zimesono. Aefa daʼö muʼao Delila, ’He Simesono, tohare niha Wilisiti!’ Maoso Zimesono ba taya waʼabölönia. Laraʼu ia ira niha Wilisiti, lakoe nono hörönia irege balunö ba labeʼe ia ba gurunga.

Samuza maʼökhö, ribu waʼato niha Wilisiti owulo ira ba nahia wanömba adu khöra sotöi Dagono. Muʼao ira lamane, ’No ibeʼe ba dangada Zimesono andrö lowalangida! Aine dataʼoʼaya ia!’ Lafezizio Zimesono ba gotalua gehomo si dua rozi ba laʼoʼaya ia. Muʼao Zimesono, ’He Yehowa, beʼe khögu waʼabölö sakali tö.’ Me luo daʼö, no ifuli anau mbu högö Zimesono. Ilulugö gehomo daʼö sahori dölania irege adudu ba mate fefu niha si so ba daʼö fao Zimesono.