Moze zondröniaʼö soi Gizaraʼeli ba zi hauga fakhe, ba lö ara tö mate ia. Imane khönia Yehowa, ’Lö aʼozu öʼohe ndraono Gizaraʼeli ba Danö Amabuʼula. Hizaʼi, tola öfaigi danö andrö.’ Aefa daʼö, iʼandrö Moze khö Yehowa ba wamili sondröniaʼö si bohou enaʼö terorogö soi daʼö. Imane Yehowa, ’Falukhaisi Yosua ba waʼö khönia wa yaʼia nifili.’

Ifatunö Moze ba soi daʼö wa lö ara tö mate ia, ba no ifili wogatinia Yehowa yaʼia daʼö Yosua, si tobali sondröniaʼö yaʼira ba soi daʼö. Imane Moze khö Yosua, ’Böi ataʼufi. Itoloʼö Yehowa.’ Lö ara aefa daʼö, möi Moze ba zuzu Hili Nebo. Ba daʼö iforomaʼö khönia Yehowa danö nifabuʼunia khö Gaberahamo, Izaʼaki ba Yakobo. Mate Moze me no irugi 120 fakhe ndröfinia.

Imane Yehowa khö Yosua, ’Ötö Nidanö Yoridano ba aeʼe ba Ganaʼana. Utolo ndraʼugö simane fanologu Moze. Baso Goroisagu ero maʼökhö. Böi so khöu waʼataʼu. Ofanö ba falua hadia niwaʼögu.’

 Ifatenge Yosua darua zamauze banua Yerikho. Ba cerita aefa daʼa, taʼila hadia zalua ba daʼö. Me mangawuli ira, lawaʼö wa tola möi ba Ganaʼana ndraono Gizaraʼeli. Mahemolunia, iwaʼö ba soi daʼö Yosua enaʼö lafaʼanö-anö ira wofanö. Aefa daʼö, iwaʼö khö ndra ere solohe tawöla amabuʼula enaʼö ladari-dari ba Nungo Nidanö Yoridano. Falawu nungo nidanö andrö. Hizaʼi, me lahundragö nidanö ira ere, izumaigö tebato wofanö nidanö andrö ba oköli hulö danö sabeʼe! Mofanö ndra ere larugi dalu nidanö ba mosindro manö ira ba daʼö irege ahori laʼötö fefu iraono Gizaraʼeli. Moloʼö yaʼugö hadia tefasugi ba dödö soi andrö nifalua Yehowa ba Nasi Soyo?

Ba gafuriata, me no irugi hauga fakhe, ofeta ndraono Gizaraʼeli ba Danö Amabuʼula. Tola lafazökhi nomo hegöi banuara. Tola monaha gowi ira, mokabu nagu, ba latanö zinanö tanö böʼö. Tanö daʼö lafotöi tanö safönu susu ba wewani.