Me no mate Zaulo, Dawido zi tobali razo. Me luo daʼö 30 fakhe ndröfinia. Me no hauga fakhe tobali ia razo, ifalua zala sebua Dawido. Samuza inötö me bongi, iʼila ndra alawe si baga-baga moroi yawa ba dete zagö nomonia. Ba gafuriata, iʼila Dawido döi ndra alawe daʼö Baseba, foʼomo zaradadu sotöi Uria. Iʼandrö Dawido enaʼö möi Mbaseba ba nomonia. Aefa daʼö mohorö ira ba manabina Mbaseba. Itandraigö ibiniʼö zala nifaluania Dawido. Ifawaʼögö khö gafalo zaradadunia enaʼö labeʼe tanö föna sibai Guria ba wasuwöta, aefa daʼö laröi ia sato. Me no mate Guria ba wasuwöta, mangowalu Dawido khö Mbaseba.

Hizaʼi, ahori iʼila fefu daʼö Yehowa. Hadia nifaluania? Ifatenge Natano samaʼeleʼö khö Dawido. Imane Natano, ’So niha si kayo sangokhögö biri-biri soya sibai, ba so niha si tosasa ha sageu khönia mbiri-biri side-ide niʼomasiʼönia. Ihalö mbiri-biri niha si tosasa andrö niha si kayo no mege.’ Mofönu sibai Dawido imane, ’Hasambalö nibunu niha si kayo daʼö!’ Aefa daʼö, imane Natano, ’Yaʼugö niha si kayo daʼö!’ Abu sibai dödö Dawido, ba mangaku ia khö Natano, ’No fasala ndraʼo khö Yehowa.’ Börö horö nifaluania andrö, oya sibai gabula dödö salua khö Dawido hegöi ba nösi nomonia. Göna fanguhuku Dawido moroi khö Yehowa. Hewaʼae simanö, lö ibunu Dawido börö me lö falimo ia ba so khönia wangide-ngideʼö.

Omasi sibai Dawido wamazökhi osali Yehowa. Hizaʼi, ono Dawido sotöi Selomo, daʼö nifili Yehowa. Ihenaigö fefu Dawido niʼogunaʼö  Zelomo aefa daʼö imane, ’Enaʼö fondrege zi sökhi gosali Yehowa. Awuyu nasa Zelomo. Hizaʼi, utolo ia ba wamaʼanö fefu hadia ia.’ Oya nibeʼe Dawido kefenia ba wamazökhi osali. Iʼalui niha sonekhe mohalöwö. Iʼowuloi ganaʼa faoma firö, aefa daʼö iwaʼö ba niha enaʼö laʼohe geu eresi moroi ba Diro ba Sidona. Fatua lö mate Dawido, ifatunö khö Zelomo hewisa lagu wamazökhi osali imane, ʼNo iwaʼö khögu Yehowa hewisa wamazökhi osali andre. Yehowa zanolo yaʼugö. Böi ataʼufi. Yaʼabölö ndraʼugö ba fazökhi gosali.’