Me no aefa ibunu Goliato andrö Dawido, ifataro ia Razo Saulo tobali sondröniaʼö saradadu. Oya möna Dawido ba wasuwöta ba tehöngö döinia. Ero mangawuli ia ba wasuwöta, lafaondragö ia ira alawe lalau manari-nari ba manunö: ’Ribu nibunu Zaulo, hizaʼi ngafulu ribu nibunu Dawido!’ Afökhö dödö Zaulo khö Dawido ba iʼalui lala wamunu yaʼia.

Onekhe sibai Dawido itika harafa. Samuza maʼökhö, me itika harafa khö Zaulo, ihandro Dawido faoma tohonia Saulo. Iʼanemaiʼö iheta ia Dawido ba tofada ba dowa doho andrö. Me no aefa daʼö, oya kali iʼalui lala Saulo ba wamunu Dawido. Ba gafuriata, moloi Dawido ba ibiniʼö ia ba danö si mate.

Iʼohe 3.000 zaradadu Saulo ba wangalui Dawido. Tefaudu sibai möi Zaulo ba dögi narö gara naha wamini  Dawido faoma ono buania. Fangöngö nono bua Dawido, ’Daʼa ginötönia khöu Tua ba wamunu Saulo.’ Lö hede-hede Dawido ihatöʼö ia aefa daʼö itaba gahe mbaru Zaulo. Hizaʼi lö iʼila zalua khönia Saulo. Lö ara aefa daʼö, maniasa Dawido börö me no iʼosiwawöi razo nifataro Yehowa. Itegu nono buania Dawido enaʼö böi lafesokho Zaulo. Me no möi baero Zaulo, ikaoni ia Dawido aefa daʼö ifatunö wa tola menaʼö ibunu Zaulo. Hadia iböhöli Saulo wolohi Dawido?

Löʼö. Lö iböhöli wolohi Dawido andrö Saulo. Samuza inötö me bongi, möi Dawido bakha ba tendra Zaulo fao ira nono mbeneʼönia Abizaʼi. No mörö Gabineri sanarogö Saulo. Imane Abizaʼi, ’He Tua, inötönia daʼa! Tehegö khögu wamunu yaʼia.’ Imane khönia Dawido, ’Halöwö Yehowa daʼö. Halö manö dohonia awö naha gönia idanö, aefa daʼö ofanö.’

Möi Dawido ba hili sahatö ba tendra Zaulo muʼao ia, ’He Abineri, hana lö özago razomö? Hezo doho faoma naha gönia idanö?’ Aboto ba dödö Zaulo wa li Dawido daʼö andrö imane, ’Tola manö öbunu ndraʼo, hizaʼi lö öfalua. Aboto ba dödögu wa tobali ndraʼugö razo Gizaraʼeli.’ Mangawuli Zaulo ba nahania. Ba nösi nomo Zaulo, so zi lö fatiu tödö khö Dawido.