Moroi ba zandrela nomonia ba Yezereʼeli, oroma khö Razo Gahabi kabu nagu ndra matua sotöi Naboti. Omasi Gahabi wowöli kabu nagu daʼö, hizaʼi lö omasi Naboti wamawa börö me moloʼö Oroisa Yehowa, tebai lafamawa danö ondröita. Börö daʼö, satulö nifalua Naboti. Hadia iʼosinangegö Ahabi gangetula Naboti? Löʼö. Mofönu sibai Gahabi irege lö möi ia baero ba mbateʼe ba lö omasi ia manga.

Imane foʼomo Gahabi sotöi Ratu Izebela niha samuʼi, ’Yaʼugö andrö razo Gizaraʼeli. Tola öʼokhögö hadia manö zomasiʼö. Hasambalö ubeʼe khöu kabu daʼö.’ Aefa daʼö ifaʼoheʼö zura Izebela khö ndra sondröniaʼö ba mbanua andrö. Ifarou ira ba wamöbögö si lö duhu khö Naboti wa no iʼelifi Lowalangi ba latebu ia kara irege mate. Lafalua daʼö ira sondröniaʼö. Aefa daʼö, imane Izebela khö Gahabi, ’No mate Naboti. Tobali tana khöu kabu nagu daʼö iadaʼa.’

Tenga ha Naboti nibunu Gizebela. Ibunu göi niha tanö böʼö sangomasiʼö Yehowa. Ifosumange nadu ba ifalua zi lö sökhi. Iʼila fefu Yehowa daʼö. Hadia nifalua Yehowa khönia?

Me no mate Gahabi, ononia Yoramo zi tobali razo. Ifatenge Yehowa samösa ndra matua sotöi Yehu ba wanguhuku Izebela hegöi ösi nomonia.

Itörö guretania Yehu numalö ba Yezereʼeli, banua si toröi Gizebela. Tohare Yoramo faoma kuretania ba wamalukhaisi Yehu imane, ’Hadia so waʼatulö ba gotaluada?’ Imane Yehu, ’Lö hadöi faʼatulö na itohugö manö gamuatania si lö sökhi inau Izebela.’ Ifuta guretania Yoramo ba mofanö ia. Hizaʼi, ifana ia Yehu irege mate.

 Aefa daʼö, möi Yehu ba nomo Gizebela. Me irongo tohare Yehu, ihaogö isukhu mbunia Izebela, ilau kase ba mbawania awö gecu, ibaloi ba zandrela tanö yawa. Me irugi Yehu, lö sökhi wehede Gizebela khönia. Muʼao Yehu khö ndra sangai halöwö Gizebela si so ba zingania, ’Mituliʼö ia si tou!’ Latuliʼö Gizebela ba zandrela aekhu ia si tou ba mate.

Aefa daʼö ibunu nono Gahabi ono matua si 70 Yehu ba iheta ba soi daʼö wanömba Baʼali. Hadia aboto ba dödöu wa iʼila fefu Yehowa ba hasambalö ihuku niha si lö sökhi ba ginötönia?