Me lö saetu mbaŵa lökhö nasa, imane Yehowa khö Gelia, ’Ofanö ba Zarefa. So ba daʼö dania lakha mbanua sameʼe göu.’ Ba mbawa göli mbanua andrö, iʼila Elia lakha mbanua sangowuloi eu. Iʼandrö khönia nidanö Elia. Me mofanö lakha mbanua andrö wangai idanö, ikaoni ia Elia imane, ’Uʼandrö khöu, ohe ögu roti ba daʼa.’ Imane lakha mbanua andrö, ’Lö hadöi khögu roti. Awai zi so ha hamo darigu maʼifu ba fanikha ba wamazökhi ögu hegöi ö nonogu.’ Imane Elia, ’No izazi Yehowa na öfazökhi ögu roti, lö ahori hamo darigu andrö khömö faoma fanikha irege alua deu.’

Mangawuli lakha mbanua daʼö ifazökhi roti ibeʼe ö zamaʼeleʼö khö Yehowa andrö. Simane si no izazi Yehowa, lö ahori mbalazo lakha mbanua andrö faoma ononia sagötö mbaŵa lökhö. Lö irai ahori hamo darigu awö wanikha khö lakha mbanua andrö.

 Samuza inötö alua gabula dödö si lö mudöna-döna. Mofökhö nono lakha mbanua andrö lö ara mate. Mangandrö tolo lakha mbanua daʼö khö Gelia. Ihalö nono andrö Elia ba danga ninania, iʼohe ba mbateʼe tanö yawa ba nomo lakha mbanua andrö. Ifegaya nono daʼö ba naha wemörö ba mangandrö ia, ’He Yehowa, uʼandrö khöu fuli orifi nono daʼa.’ Na ifuli iʼorifi ia Yehowa, no sahöli-höli dödö daʼö. Öʼila hadia mbörö? Me luo daʼö, lö irai so niha si no mate ifuli auri. Baero daʼö, lakha mbanua daʼa hegöi ononia tenga iraono Gizaraʼeli.

Ifuli auri nono daʼö ba mohanu-hanu ia! Imane Elia khö lakha mbanua andrö, ’Hiza nonomö! No ifuli auri.’ Omuso sibai dödönia ba imane khö Gelia, ’Sindruhu-ndruhu wa enoni Lowalangi ndraʼugö börö me öfaʼema niwaʼö Yehowa ba oi itörö fefu.’