Idudugö naha wameʼe sumange Mbaʼali si so ba soinia razo Yehuda sotöi Yozafati. Omasi ia na laʼila ono mbanuania goroisa Yehowa. Börö daʼö, ifatenge zatua mbanua hegöi niha Lewi weʼamöi ba zi sagörö Yehuda ba wamahaʼö niha ba goroisa Yehowa.

Ataʼu soi si fasui ba wanuwö Yehuda börö me laʼila wa Yehowa zi fao khöra. Möi ira laʼohe mbuala khö Razo Yozafati. Hizaʼi, niha Moabi, niha Gamoni, ba niha moroi ba mbanua Zeʼira omasi ira lasuwö Yehuda. Aboto ba dödö Yozafati wa moguna khönia wanolo moroi khö Yehowa. Iwaʼö fefu khö ndra matua, ira alawe, hegöi iraono enaʼö owulo ira ba Yeruzalema. Mangandrö ia tanö föna niha sato imane, ’He Yehowa, na lö fanolo si otarai ndraʼugö ba tebai möna ndraʼaga. Ombakhaʼö khöma hadia zinangea mafalua.’

Itema wangandrönia Yehowa, ’Böi ataʼufi. Yaʼo zanolo yaʼugö. Mihenaigö ami ba nahiami, miʼosindro, ba mifaigi hewisa wanologu yaʼami.’ Hewisa wangefaʼö Yehowa yaʼira?

Mahemolu sihulö wonginia, ifili zanunö Yozafati aefa daʼö iwaʼö khöra enaʼö mowaö-waö ira föna zaradadu. Mofanö ira moroi ba Yeruzalema numalö ba naha wasuwöta ba Dekoa.

Aefa daʼö lasuno Yehowa si fao faʼomuso dödö ba ebua lira. Gasa-gasa daʼö, fasuwö Yehowa salahi mbanuania. Wöhötö ibeʼe niha Gamoni hegöi niha Moabi irege faoma lasuwö nawöra ba mate ira fefu. Hizaʼi ilumöʼö Yehowa niha Yehuda, saradadunia hegöi ira ere. Larongo fefu niha si fasui hadia nifalua Yehowa ba laʼila wa lö si tebulö Yehowa tobali sanolo banuania. Hewisa wangefaʼö Yehowa banuania? Oya lala ifalua. Lö moguna khönia wanolo moroi ba niha ba wamalua daʼö.