Sagötö me lö faröi Zelomo khö Yehowa, lasöndra waʼohahau dödö iraono Gizaraʼeli. Hizaʼi, mangowalu Zelomo ba ato ndra alawe ihalö foʼomonia moroi ba soi tanö böʼö samosumange Adu. Arara manö, faböʼö saʼae Zelomo ba fao ia wamosumange adu. Mofönu sibai Yehowa. Imane khö Zelomo, ’Aheta moroi ba nösi nomou wamatörö Gizaraʼeli ba tebagi dua. Ebua ubeʼe dana khö zi samösa sangai halöwö khöu, ba mamatörö nösi nomou ha ba gamaudu zide-ide.’

So lala tanö böʼö niʼogunaʼö Yehowa ba wamaʼema angetulania andre. Samösa zangai halöwö khö Zelomo yaʼia daʼö Yerobeamo, falukha ira ba lala Gahia samaʼeleʼö. Isika mbarunia Ahia tebagi 12, aefa daʼö imane khö Yerobeamo, ’Hiza, iheta Yehowa wamatörö Gizaraʼeli moroi ba nösi nomo Zelomo ba tobali tebagi dua. Halö khöu zi fulu, börö me yaʼugö zi tobali razo ba zi fulu mado.’ Me no irongo daʼö Razo Selomo, edöna ia wamunu Yerobeamo! Börö daʼö moloi Yerobeamo ba Miserai. Ba gafuriata mate Zelomo ba ononia Rehabeamo zi tobali razo. Mangawuli saʼae Yerobeamo ba Gizaraʼeli börö me lö sametaʼu yaʼia.

 Lamane satua ndraono Gizaraʼeli khö Rehabeamo, ’Na duhu sökhi ndraʼugö ba niha, ba lö faröi ira khöu.’ Hizaʼi lamane ira si fahuwu khö Rehabeamo sawuyu döfi nasa, ’Abeʼekö faretamö! Waʼö khöra enaʼö lakilaini wohalöwö!’ Igoʼö niwaʼöra andrö Rehabeamo. Amuʼi ia ba ndraono Gizaraʼeli. Börö daʼö, molawa khönia zi fulu mado. Lafataro razora sotöi Yerobeamo ba zi fulu mado nifotöi ba gafuriata famatörö Gizaraʼeli. Dombua tö mado tanö böʼö nifotöi famatörö Yehuda, ba lö faröi ira khö Rehabeamo. Si 12 mado Gizaraʼeli iadaʼa tebagi dua.

Lö omasi Yerobeamo na lafosumange Lowalangi iraono mbanuania ba Yeruzalema si so barö wamatörö Rehabeamo. Öʼila hadia mbörö? Ataʼu Yerobeamo na faröi khönia ndraono Gizaraʼeli ba faʼawö ira khö Rehabeamo. Börö daʼö ifazökhi dombua nono zawi anaʼa ba imane, ’Talafo aröu Yeruzalema. Ba daʼa manö mifosumange lowalangi.’ Olifu ira Yehowa ba lasömba nono zawi anaʼa andrö.