So nono Gizebela sotöi Atalia samuʼi simane inania. Mangowalu Atalia khö razo Yehuda. Me mate woʼomonia ira matua, ononia zi tobali razo. Hizaʼi, me mate nononia andrö, Atalia zi tobali samatörö ba Yehuda. Aefa daʼö, iʼalui lala ba wangohori ngaʼötö razo. Andrö ibunu gofu haniha manö zi tola mosalahini yaʼia ba wamatörö tefarahu maʼuwunia samösa. Ataʼu khönia fefu niha.

Ere Sebua sotöi Yehoyada hegöi foʼomonia Yoseba laʼila wa lö sökhi gamuata Atalia. Hewaʼae tobali famaʼalara, labiniʼö samösa maʼuwu Gatalia yaʼia daʼö Yehoasi ono sawuyu. Laʼebuaʼö ia ba gosali.

Me no irugi fitu fakhe Yehoasi, iʼowuloi fefu zondröniaʼö saradadu Yehoyada awö niha Lewi imane, ’Mizago mbawandruhö gosali. Böi so zi möi bakha.’ Aefa daʼö, ifataro Yehoasi tobali razo Yehuda Yehoyada ba ibeʼe dakula ba högönia. Me laʼila daʼö, omuso dödö niha Yehuda.

Me irongo li niha sato Ratu Atalia, iʼalio-liokö wofanö möi ia ba gosali. Me iʼila razo si bohou andrö muʼao ia, ’Si manga mböli! Si manga mböli!’ Laraʼu ira sondröniaʼö saradadu ratu si lö sökhi andrö, aefa daʼö labunu. Hizaʼi, hewisa fefu niha sato ba soi daʼö soloʼö faʼelungu Gatalia?

Itolo niha sato ba soi daʼö Yehoyada enaʼö fazazi ira khö Yehowa wa ha yaʼia nifosumangera. Iʼandrö khöra Yehoyada enaʼö lahori fefu nadu ba naha wanömba Baʼali. Iwaʼö khö ndra ere hegöi ba niha Lewi enaʼö mohalöwö ira ba gosali irege tola lafosumange Lowalangi ba daʼö. Ifaretakö enaʼö lazago mbawandruhö gosali enaʼö böi möi bakha niha si  raʼiö. Aefa daʼö, Yehoyada hegöi ira sondröniaʼö saradadu lafataro bakha ba gosali andrö Yehoasi lafedadao ia ba dadaoma wamatörö. Omuso dödö niha Yehuda fefu. Tola lafosumange Yehowa, no aheta ira moroi ba danga Atalia hegöi fanömba Baʼali. Hadia öʼila wa tobali fanolo ba niha sato waʼabarani Yehoyada?