Asese isuwö Gizaraʼeli razo Siria sotöi Beni-hada. Hizaʼi, lö iböhöli Elisa samaʼeleʼö ba wamangelama razo Gizaraʼeli irege teʼorifi razo andrö. Börö daʼö, omasi Mbeni-hada na iʼoloiʼö Gelisa. Iʼila wa so Gelisa ba mbanua Ndrotana, ba ifatenge zaradadu Ziria ba wondraʼu Elisa.

Bongi me mofanö niha Ziria ba Ndrotana. Sihulö wonginia, me möi baero zangai halöwö khö Gelisa iʼila wa no lafasui mbanua andrö ira saradadu Ziria sato sibai. Ataʼu ia ba imane khö Gelisa, ’He Tua, hadia nifaluada?’ Imane Elisa, ’Ato zi fao khöda moroi khöra.’ Ba ginötö daʼö göi, iforomaʼö khö zangai halöwö andrö Yehowa kudo ba kureta wanuwö soʼalitö ba hili si fasui banua andrö.

Omasi zaradadu Ziria ba wondraʼu Elisa. Börö daʼö, mangandrö tolo Gelisa khö Yehowa. Wöhötö ndra saradadu daʼö ibeʼe Yehowa ba lö laʼila hezo gamaudu so ira. Imane khöra Elisa, ’No fasala lalami  andrö. Miʼoʼö ndraʼo. Uʼohe ami ba niha niʼaluimi andrö.’ Laʼoʼö Gelisa irugi Zamaria nahia waʼatoröi razo Gizaraʼeli.

Awena laʼila ira niha Ziria hezo gamaudu so ira, hizaʼi lö fakhamö saʼae. Manofu razo Gizaraʼeli khö Gelisa, ’Hadia yaʼodo zamunu yaʼira?’ Hadia ilau mbalönia Elisa ba niha sedöna mondraʼu yaʼia? Löʼö. Imane Elisa, ’Böi bunu ira. Beʼe göra ba fofanö ira.’ Andrö ifalua khöra gowasa sebua razo, aefa daʼö iwaʼö khöra enaʼö mangawuli ira.