So samösa nono alawe Gizaraʼeli side-ide ba soi Siria si fandröndröu moroi ba nösi nomonia. Lahalö ia ira saradadu Ziria, ba tobali ia sangai halöwö khö woʼomo gafalo zaradadu sotöi Naʼema. Ono alawe side-ide andre ifosumange Yehowa hewaʼae lö lafalua daʼö niha si fasui yaʼia.

Göna khö Naʼema wökhö guli sabölö-bölö ba agafökhö. Omasi nono alawe side-ide andrö ba wanolo yaʼia. Börö daʼö, iwaʼö khö woʼomo Naʼema, ’Uʼila haniha zi tola mamadöhö foʼomomö. Samaʼeleʼö khö Yehowa ia sotöi Elisa. Toröi ia ba Gizaraʼeli.’

Ifatunö khö Naʼema foʼomonia. Itandraigö Naʼema wamalua gofu hadia manö enaʼö döhö ia, andrö möi ia ba nomo Gelisa ba Gizaraʼeli. Ba dödö Naʼema, iwalinga itemaʼö ia Elisa simane tome sebua. Hizaʼi, lö omasi Gelisa wamalukhaisi Naʼema. Ifawaʼögö ba zangai halöwö khönia enaʼö latemaʼö Naʼema ba lamane: ’Ondri fitu kali ba Nidanö Yoridano ba döhö ndraʼugö.’

 Afatö sibai dödö Naʼema ba imane, ’Uwalinga ikaoni Lowalanginia ba ifalua dandra sahöli dödö ba wamadöhö yaʼo. Hizaʼi, ifatenge ndraʼo wemondri ba nungo nidanö Gizaraʼeli. Abölö sökhi nungo nidanö ba Ziria. Hana wa tenga ba daʼö ifatenge ndraʼo?’ Mofönu sibai Naʼema ba mofanö ia moroi ba nomo Gelisa.

Latandraigö lawaʼö khö Naʼema ira sohalöwö khönia enaʼö faduhu dödönia. Lamane, ’Hadia tenga no öfalua gofu hadia manö enaʼö döhö ndraʼugö? Aoha sibai niwaʼönia andrö. Hana wa lö öfalua manö?’ Igoʼö mene-mene niwaʼöra Naʼema. Mofanö ia ba Nidanö Yoridano ba möi ia bakha ba nidanö andrö fitu kali. Me no aefa daʼö, sindruhu wa döhö Naʼema. Omuso sibai dödönia ba ifuli ifalukhaisi Gelisa ba wangandrö saohagölö. Imane Naʼema, ’Aboto ba dödögu iadaʼa wa Yehowa andrö Lowalangi sindruhu.’ Moloʼö yaʼugö, hewisa dödö nono alawe side-ide andrö me iʼila döhö Naʼema?