Niha mbanua Niniwe ba Asiria, agamuʼi sibai. Börö daʼö, Yehowa zamatenge Yona samaʼeleʼö ba Niniwe ba wamangelama yaʼira enaʼö lafalalini gera-erara. Hizaʼi, moloi Yona itörö göfa si numalö ba Darisi.

Göna bade sebua göfa daʼö ba dalu nasi, ba agataʼu fefu zohalöwö ba göfa. Mangandrö ira khö lowalangira, ’Hadia mbörö wa alua daʼa?’ Ba gafuriata ifatunö khöra Yona imane, ’Yaʼodo zi sala. Soloi ndraʼodo moroi ba halöwö nibeʼe Yehowa. Mitiboʼö manö ndraʼo ba nasi, ba döhö dania mbade andre.’ Lö omasi ira lafalua daʼö, hizaʼi ifaso ira Yona. Me no lafazaumba ia ba nasi, awena ahono mbade.

Iwalinga mate ia Yona. Me ibörögö ahöndrö ia, mangandrö ia khö Yehowa. Aefa daʼö ifatenge sara giʼa sebua Yehowa. Itölö Yona iʼa no mege hizaʼi lö mate Yona. Moroi bakha ba dalu giʼa andrö mangandrö Yona, ’Ufabuʼu khöu wa uʼoʼö hadia niwaʼömö.’ Ilumöʼö Yona bakha ba dalu giʼa Yehowa sagötö zi tölu hari. Aefa daʼö, ifatenge giʼa andrö Yehowa enaʼö iʼutaʼö Yona ba dete gawu.

Aefa daʼö ifuli ifatenge Yona ba Niniwe Yehowa, ba möi Yona. Mofanö ia ba daʼö ba iʼombakhaʼö khö ndra niha si lö sökhi andrö imane, ’Ba zi 40 hari tö ba adudu Niniwe.’ Lö ara, alua zi lö mudöna-döna. Lafalalini gera-erara niha Niniwe. Imane razo Niniwe  ba nono mbanuania, ’Miʼangandrö khö Lowalangi ba mifalalini gera-erami. Maʼatö lö ihori ita.’ Me iʼila lafalalini gera-erara ira niha daʼö, lö aʼozu ifakiko Niniwe Yehowa.

Mofönu Yona börö me lö aʼozu tedudugö mbanua daʼö. Angeragö atö: Ebolo dödö Yehowa ba ahakhö dödönia Yona, hizaʼi lö ahakhö dödö Yona niha Niniwe. Möi ia modadao baero mbanua andrö ba lumö zinanö labu ba no ifangerau mbawa. Lö ara, mate zinanö daʼö, ba mofönu sibai Yona. Imane khönia Yehowa, ’Abölö ahakhö dödöu zinanö daʼa moroi ba niha Niniwe. Ahakhö dödögu ira. Daʼö mbörö wa teʼorifi ira.’ Hadia wamahaʼönia? Abölö ebua mböli niha Niniwe moroi ba mböli zinanö.