Ira Talifusö si Sara Lala Wamati Niʼomasiʼöma:

Yaʼita samosumange Yehowa, taʼomasiʼö Daromali Lowalangi yaʼia daʼö Sura Niʼamoniʼö. Faduhu dödöda wa atulö waö-waö si so ba Zura Niʼamoniʼö, fanuturu lala si tola tafaduhusi tödö ba waʼauri, ba tandra wa iʼomasiʼö fefu zongambatö Yehowa. (Sinunö 119:105; Luka 1:3; 1 Yohane 4:19) Omasi ita tatolo niha enaʼö aboto ba dödöra zindruhu sebua böli ba Daromali Lowalangi. Börö daʼö, omuso sibai dödöma ba wangehenaigö buku, ”Fahaʼö Ndraʼugö ba Cerita-Cerita Zura Niʼamoniʼö”. Omasiga mafatunö maʼifu sanandrösa ba mbuku daʼa.

Arakhagö fefu nösi mbuku daʼa tefazökhi ia ba ndraono. Hizaʼi, tola göi itolo zatua buku daʼa na omasi ira oya laʼila nösi Zura Niʼamoniʼö. Börö me Sura Niʼamoniʼö andre buku soguna ba niha fefu, tola tatema mbuania na tafahaʼö ita khönia ba sindruhu-ndruhu tatema waʼomuso dödö.

Buku daʼa, idunö-dunö sanandrösa ba niha iʼotarai me tewöwöi, ba tehalö fefu moroi ba Zura Niʼamoniʼö. Maʼodödögö wangombakha salua nitutunö ba Zura Niʼamoniʼö faoma fehede salio muʼila eluaha ba muhaogö wamaʼoli.

Aefa daʼö, tenga ha cerita manö nitutunönia ba mbuku daʼa. Ngawua wehede hegöi gambarania lafazökhi enaʼö tola tarasoi samösa zalua khö ndra niha nitutunö ba daʼö.

Moroi ba mbuku daʼa taʼila hewisa Zura Niʼamoniʼö wanutunönia niha samalua hegöi si lö moloʼö niwaʼö Yehowa. Tola tefarou dödöda ba wangai famahaʼö moroi ba duma-duma nibeʼera. (Roma 15:4; 1 Korindro 10:6) So 14 faosatö mbuku daʼa. Ero sambua faosatö, mubörögö ia faoma rahu-rahu duho si tola tahalö famahaʼö.

 Na so khöu ndraono, tola öbaso sambua numero wamahaʼö ba öfatunö khönia gambara ba wamahaʼö andrö. Aefa daʼö tola mibaso ayati si tobali dane-dane ba cerita daʼö. Haogö wamatunö ba ndraonomö enaʼö aboto ba dödöra wa famahaʼö ba cerita daʼa, tehalö moroi ba Zura Niʼamoniʼö. Tola göi öfalua zimane daʼö na ötolo zatua enaʼö lasöndra wamahaʼö moroi ba nösi Zura Niʼamoniʼö.

Matötöna wa möi fanolo niha mbuku daʼa, he satua he iraono enaʼö lahalö khöra wamahaʼö moroi ba Daromali Lowalangi ba lafalua ba waʼaurira. Buania, tola göi tobali ira ösi nomo niʼomasiʼö ba samosumange Yehowa.