1-3. (a) Hana wa tola alua zata’u ita ba nösi nomo Abigaila? (b) Hadia nifaha’öda ya’ita moroi khö ndra alawe sahöli-höli dödöda andre?

I’ILA Abigaila ba hörö nono matua sawuyu-wuyu andre wa ata’u. So mbörö wa ata’u sibai ia. Lö aratö alua wabunusa. Tefaudu me luo da’ö, so mato 400 zaradadu si möi mamunu fefu ndra matua si so ba nomo Nabalo, fo’omo Abigaila. Hadia mbörö?

² Börö Nabalo da’a fefu. Simane si to’ölö, afaito ia ba lö i’ila huku. Sakali da’a, tenga niha si to’ölö manö ni’o’ayania, hiza’i samösa sondrönia’ö ni’omasi’ö ndra saradadu si lö faröi ba si no to’ölö. Iada’a, samösa zohalöwö khö Nabalo sawuyu-wuyu ba te samösa kubalo, i’ondrasi Abigaila. Faduhu dödönia tola te’orifi ira na so nifalua Abigaila. Hadia tola ilawa ngawawa zaradadu ira alawe si samösa?

³ Si oföna, data’osisi’ö haniha ndra alawe satua-tua andre. Haniha Abigaila? Hana wa tola alua zimane da’a? Ba hadia zi tobali famaha’ö khöda moroi ba wamatinia?

4. Hewisa gamuata Nabalo andrö?

⁴ Tenga ngambatö si sökhi Abigaila faoma Nabalo. Talafo sökhi Abigaila khö Nabalo, ba talafo lö sökhi Nabalo khö Abigaila. Sindruhusa, ebua gefe Nabalo. Andrö wa mangosebua ia, hiza’i hewisa wamaigi niha bö’ö? Bakha ba Zura Ni’amoni’ö, lö hadöi niha nifatou-tou ba ni’o’aya-aya baero Nabalo. Eluaha döinia manö, ”Amu’i”, mazui ”Bodo”. Hadia da’a döinia nifatörö zatua me tumbu ia, mazui awena lafotöi-töi khönia ba gafuriata? Gofu hezo zatulö, amuatania zamaduhu’ö töinia andrö. Nabalo andrö ”ba no safaito ba si lö sökhi”. Tuka mabu ba  samaka-makao awönia, ata’u khönia niha ba ato zi fatuwu.​—I Zam. 25:2, 3, 17, 21, 25.

5, 6. (a) Molo’ö ya’ugö, hadia manö gamuata Abigaila sadöni dödöu? (b) Hana wa mangowalu Abigaila khö ndra matua si lö karua?

⁵ Fabö’ö sibai Abigaila moroi khö Nabalo. Eluaha döinia ”I’omusoi’ö Dödönia Amagu”. Ato zatua somuso tödö na baga-baga nononia, hiza’i ama satua-tua abölö omuso dödönia na sökhi gamuata nononia. Sasesenia, niha sanema howu-howu fa’asökhi mboto, olifu ira wamalua amuata simane fa’amotödö, fa’atua-tua, fa’abarani ba famati. Hiza’i, tenga simane da’ö Abigaila. Isuno Sura Ni’amoni’ö wa’asökhi mbawania hegöi amuatania satua-tua.​—Baso I Zamueli 25:3.

⁶ Te so zanofu iada’a, hana wa omasi ndra alawe satua-tua andre mangowalu khö ndra matua si lö karua. Törö tödöu ba götö Zura Ni’amoni’ö, satua zotatugöi ha’ökhö mangowalu nononia. Fa’afao dödö zatua me luo da’ö moguna sibai. Hadia fao dödö zatua Abigaila ba wangowalu nonora, hadia ya’ira zofili börö wa’ahöli-höli dödöra ba wa’akayo ba fa’atehöngö Nabalo? Mazui börö me tosasa ira? Gofu hadia mbörö, tenga börö gefe wa tobali fo’omo si sökhi Nabalo.

7. (a) Hadia zi tebai lafalua ira satua iada’a na omasi ira lafaha’ö ndraonora sanandrösa ba wangowalu? (b) Hadia gohitö dödö Abigaila?

⁷ Satua si sökhi ba satua-tua ihaogö wamaha’ö ononia sanandrösa ba wangowalu satulö. Lö lafaso ndraonora ena’ö mangowalu ha börö gefe, mazui lafarou fakawa ba wa’awuyu hewa’ae tebai nasa la’ohe zi no amaedola noro ba wongambatö. (I Kor. 7:36) Hiza’i, no numalö sa’ae na awena i’angeragö da’a Abigaila. Gofu hadia mbörö, iada’a no mangowalu ia khö Nabalo, ba angetula somasi ia ena’ö oroma fefu zalua andre.

8. Haniha ni’o’aya Nabalo, ba hana wa fasala sibai da’ö?

⁸ No ifalua zui Nabalo gamuata si möi fama’ala Abigaila töra moroi ba zilalö. Dawido ni’o’ayania. Enoni si lö faröi Dawido khö Yehowa nibayoini Zamueli, sangoroma’ö wa Dawido nifili Lowalangi fogati Zaulo tobali razo. (I Zam. 16:1, 2, 11-13) Sagötö foloinia börö Zaulo safökhö tödö sedöna mamunu ya’ia, ba dögi narö hili toröi Dawido hegöi saradadunia si 600 niha si lö faröi.

9, 10. (a) Hezo toröi Dawido hegöi awönia ba hewisa wa’aurira ba da’ö? (b) Hana wa sindruhunia mangandrö saohagölö Nabalo khö Dawido hegöi saradadunia? (Faigi nisura ba gahe zura ba ngenoli 10.)

⁹ Ba Ma’ono toröi Nabalo, hiza’i ahatö ba Garemeli  mohalöwö ia, te so kabunia ba da’ö. * Fefu mbanua da’ö so ba gotalua hili sodu’u si sökhi ba wanguri biri-biri si 3.000 nga’eu khö Nabalo. Hiza’i, banua si fasui da’ö lö niha-niha. Tanö raya so danö si mate Farana sebolo sibai. Tanö ba gatumbukha, so lala numalö ba Asi Nasio sanörö tanö salo’o si lö niha-niha, soya tögi hegöi baho. Ba da’a toröi Dawido hegöi awönia sato lataögö wa’atosasa, ena’ö lasöndra göra möi ira malu ba oya latörö wa’afökhö. Andrö asese falukha ira ndra matua sokubaloi urifö Nabalo, niha si kayo.

¹⁰ Hewisa lagu zaradadu Dawido andre khö ndra kubalo mbiri-biri? Aoha manö khöra wangai mazui latagö fasasakali mbiri-biri Nabalo, hiza’i lö lafalua da’ö. Amaedola mba’a-ba’a ira ba zi fasui mbiri-biri Nabalo hegöi enoninia. (Baso I Zamueli 25:15, 16.) Biri-biri hegöi ira kubalo, asese falukha ira gameta’uö. Oya gutu ndru’u sata’u ita ba da’ö, ba nola tanö raya Gizara’eli ahatö sibai zondrabu ba sanagö moroi ba mbanua niha baero. *

11, 12. (a) Hewisa Dawido wama’ema fehede khö Nabalo si fao fa’atua-tua ba famosumange? (b) Hadia zi sala ba wanema Nabalo oroisa Dawido?

¹¹ Tatu manö abua wanga’asogö soguna khö ndra matua sato si so ba danö si mate. Samuza inötö, ifatenge Dawido dafulu zi möi khö Nabalo ba wangandrö tolo. Ifili ginötö si tefaudu, inötö ba woguti bu mbiri-biri, si to’ölönia laforoma’ö gamuata fa’oböwö ba fahuwusa na ngaluo da’ö. Ihaogö wangoroisi Dawido, i’oguna’ö wehede si sökhi ba safönu famosumange. Iwa’ö wa ya’ia ’onomö Dawido’, fehede fangide-ngide’ö si fao sumange, samaduhu’ö wa Nabalo andrö sia’a. Hadia nifalua Nabalo?​—I Zam. 25:5-8.

¹² Mofönu Nabalo! Mu’ao ia ”ihangöi ira”, simane nifatunö ndra matua no mege khö Abigaila. Nabalo niha sobou’a, lö ibe’e roti, idanö, ba nagole gurifö si no mutaba. Lö moguna khönia Dawido i’amaedolagö simane sawuyu si no moloi. Fangera-ngera Nabalo andre te fagölö ira Zaulo, si fatuwu khö Dawido. Ira matua si darua da’a, lö khöra fangera-ngera simane Yehowa. I’omasi’ö Dawido Lowalangi ba tenga sawuyu samadaö ba wamaiginia, hiza’i razo samatörö ba Gizara’eli.​—I Zam. 25:10, 11, 14.

13. (a) Hewisa Dawido me awena irongo wango’aya Nabalo? (b) Hadia goi-goi nisura ba Yakobo 1:20 sangoroma’ö hewisa nifalua Dawido?

 ¹³ Mangawuli denge-tenge Dawido ba lafatunö khönia zalua, ba mofönu sibai ia. Imane, ”Dozi ami ba mi’ani’öli!” Ifa’anö ia Dawido ba 400 zaradadu si möi fasuwö. Fahölu ia wa ibunu fefu ndra matua si so ba nomo Nabalo. (I Zam. 25:12, 13, 21, 22) Ta’ila hadia mbörö wa mofönu Dawido, hiza’i fasala nifaluania. Imane Sura Ni’amoni’ö, ”Fönu niha andrö sa, ba lö ilau zatulö, wamaigi Lowalangi.” (Yak. 1:20) Hadia nifalua Abigaila ena’ö te’orifi nösi nomonia?

14. (a) Hadia mbörö wa tola tawa’ö no ifalua Abigaila lala siföföna ba wangatulö’ö sala nifalua Nabalo? (b) Hadia zi tola tahalö khöda famaha’ö moroi ba wa’afabö’ö Nabalo faoma Abigaila? (Faigi nisura ba gahe zura.)

¹⁴ No ta’ila nifalua Abigaila ba wamobörö si möi fanga’azökhi golalöwa sebua andre. Omasi ia ifondro-ndrongo, tenga simane fo’omonia Nabalo. Sanandrösa ba wamatunö salua andre khö Nabalo, imane sohalöwö andrö, ”Ba ya’ia ba si no töra fa’afaito, tebai fahuhuo ita khönia.” * (I Zam. 25:17) Hiza’i, lö irongo Nabalo börö me ha tana khönia ni’era-erania. Amuata fa’asiliawa simane da’ö no to’ölö iada’a. Hiza’i, i’ila ira matua sohalöwö andre wa fabö’ö Abigaila, andrö wa ifatunö khönia hadia zalua.

15, 16. (a) Hewisa wangoroma’ö Abigaila wa fagölö ia khö wo’omo ira alawe satua-tua nifatunö ba mbuku Gamaedola? (b) Hadia mbörö wa tenga fangosiwawöi nifalua Abigaila khö wo’omonia?

¹⁵ Mangera-ngera Abigaila ba alio ihalö gangetula. Tabaso, ”Ba i’aliogö Abigaila.” Ba da’a, ngawua wehede ”i’aliogö” öfa kali mutötöi sanandrösa khö Abigaila. Ifa’anö ngawalö gö soya sibai i’ohe khö Dawido hegöi ono buania. Ni’ohenia ya’ia da’ö roti, agu, biri-biri, bua nowi nifakoe, kue kismis hegöi kue bua ara. Aboto ba dödö Abigaila gokhöta si so khönia ba i’ame’egö tödö fefu zoroi yomonia, simane fo’omo ira alawe satua-tua nifatunö ba mbuku Gamaedola. (Gamd. 31:10-31) Da’a zi oföna ifa’ohe’ö ba fao ösa zawuyunia, awena itete moroi furi. Tabaso, ”Ba lö’ö sa i’ombakha’ö khö wo’omonia Nabalo.”​—I Zam. 25:18, 19.

¹⁶ Hadia da’ö geluahania i’osiwawöi wo’omonia Abigaila?  Lö’ö; törö tödöu wa lö sökhi nifalua Nabalo ba niha nibayoini Yehowa, da’a gamuata si möi famunu ösi nomo Nabalo si lö fasala. Na lö ifalua da’ö Abigaila, fao ia wolu’i sala nifalua wo’omonia. Ba zimane da’a, abölö sökhi khönia wangata’ufi Lowalangi moroi ba wangata’ufi fo’omonia.

17, 18. Hadia nifalua Abigaila ena’ö alulu dödö Dawido, hadia niwa’önia, ba hadia mbörö wa tefaudu wehedenia?

¹⁷ Lö ara aefa da’ö, falukha Abigaila khö Dawido hegöi ono buania. I’aliokö we’amöi tou moroi ba hulu galide, ituhi danö föna Dawido. (I Zam. 25:20, 23) Ifatunö fefu nösi dödönia, isalahini wo’omonia awö nösi nomonia fefu ba wangandrö fa’ahakhö dödö. Hana wa tefaudu wehedenia?

¹⁸ Ya’ia zangagö föna wangandrö fa’ebolo dödö Dawido ba ngawalö zala si no alua andre. Ifaduhu’ö wa fo’omonia andrö ira matua si bodo, tefaudu ba döinia, eluahania tenga sinangea ba ndra matua sebua lakhömi simane Dawido wamunu ira matua simane da’ö. Iforoma’ö wa’afaduhu dödönia wa salahi Lowalangi Dawido ba ”fanuwö khö Yehowa” fefu nifaluania. Iforoma’ö göi wa aboto ba dödönia zi no ifabu’u Yehowa sanandrösa khö Dawido hegöi fa’arazonia, börö me iwa’ö, ”Yehowa . . . ba na ifataro ndra’ugö razo ndraono Gizara’eli.” Inönö nasa wanguma’ö faböi ifalua Dawido zi möi börö horönia ba ndro niha fefu mazui tobali ”fangala” eluahania faböi itegu-tegu ia tödönia side-ide. (Baso I Zamueli 25:24-31.) Sindruhu-ndruhu fehede si sökhi ba sadöni dödö!

19. Hadia nifalua Dawido ba wehede Abigaila, ba hadia mbörö wa isuno Abigaila?

¹⁹ Hadia nifalua Dawido? Itema ni’ohe Abigaila ba imane, ”Nisuno Yehowa, Lowalangi ndraono Gizara’eli, samatenge ya’ugö ba wamaondragö ya’o, ba nisuno wa’onekhemö andrö, nisuno ndra’ugö, ya’ugö si no manaha tangagu ma’ökhö, faböi mamunu niha ndra’odo.” Isuno wa’abarani Abigaila andrö Dawido börö me ihulö wamalukhaisi ya’ia, ifaduhu’ö wa Abigaila zanaha ya’ia faböi mosala ba ndro niha. Imane, ”Fuli’ö ba khömi, böi busi dödöu”, aefa da’ö ihaogö wanguma’ö, ”hiza u’o’ö niwa’öu.”​—I Zam. 25:32-35.

20, 21. (a) Molo’ö ya’ugö, hadia zahöli-höli dödöda me mangawuli Abigaila khö wo’omonia? (b) Hewisa wangoroma’ö Abigaila fa’abarani ba fa’atua-tua me ifili ginötö wahuhuosa khö Nabalo?

²⁰ Me no fabali ira, itörö-törö tödö Abigaila wa’afalukhatara andrö. Tatu manö i’ila hadia gamaehuta ndra matua si lö faröi  ba si sökhi amuata moroi khö wo’omonia samu’i. Hiza’i, lö i’era-era manö da’ö. Tabaso, ”Ba me irugi khöra, khö Nabalo, Abigaila.” Atulö, mangawuli ia khö wo’omonia ba ihalö gangetula wamalua halöwönia. Lö ibini’ö khö wo’omonia hadia zi no ibe’e khö Dawido hegöi ono buania. Sinangea i’ila da’ö Nabalo. Ifatunö göi Abigaila hadia gabula dödö si lö a’ozu alua, fatua lö irongo moroi ba niha bö’ö si möi fangailania. Hiza’i, tebai ifatunö iada’a. Awena molau owasa Nabalo hulö razo ba abölö wemabunia.​—I Zam. 25:36.

²¹ Ifuli iforoma’ö wa’abarani Abigaila ba fa’atua-tuania. Ibaloi ofeta moluo me no alö wa’amabu Nabalo. Me no alö wemabunia, ahori aboto ba dödönia fefu nitutunö, hiza’i tola manö mobekhu ia na mofönu abölö-bölö. Hewa’ae simanö, ifatunö Abigaila fefu ngawalö zalua. I’ila wa tola manö mofönu Nabalo, ba fabözi ia. Hiza’i, no mudadao manö ia ba lö ifaliwa-liwa.​—I Zam. 25:37.

22. Hadia zalua khö Nabalo, ba hadia zi tobali famaha’ö khöda ba ngawalö wa’alösökhi hegöi famakao salua yomo ba nomo?

²² Hadia zalua khö ndra matua da’ö? ”Ba mate bakha dödönia, tobali hulö gara.” Te no mate dambai ia. Mato fulu bongi aefa da’ö, mate ia tenga börö wökhö. Tabaso, ”Ba ibözi Nabalo Yehowa, ba mate ia.” (I Zam. 25:38) Börö wanguhuku satulö andrö, fangowalu Abigaila si hulö wangifi sara sibai, awai irugi da’ö. Hewa’ae na lö ihuku niha Yehowa iada’a si fao tandra sahöli-höli dödö, da’a zamasugi ba dödöda wa lö si tobini khö Lowalangi wamakao ba fa’alösökhi salua yomo ba nomo. Ba ginötö si no ihonogöi, ifalua wa’atulö Yehowa.​—Baso Luka 8:17.

23. Hadia howu-howu nitema Abigaila, ba hewisa wangoroma’önia wa lö tebulö ia?

²³ Me no te’efa’ö Abigaila moroi ba wongambatö si lö sökhi, itema howu-howu tanö bö’ö. Me irongo Dawido wa no mate Nabalo, ifatenge niha ba wame’e li wanofu ya’ia. Imane Abigaila, ”Hiza, no ngoni-ngoni zawuyumö andre, iwa’ö, ba wanasai ahe zinenge zokhö ya’o!” Lö fabö’ö ia hewa’ae tobali ia fo’omo Dawido; i’andrö göi ena’ö tobali ia ngoni-ngoni zinenge Dawido! I’aliokö wama’anö ya’ia, sakali da’a ba wamalukhaisi Dawido.​—I Zam. 25:39-42.

24. Hadia manö gabula dödö Abigaila ba wongambatönia si bohou, ba hewisa wamaigi Dawido hegöi Lowalangi khönia?

 ²⁴ Tenga eluahania no afönu wa’ohahau dödö Abigaila, lö abula dödönia simane nitutunö ba hikaya. Fa’auri Abigaila faoma Dawido itaria latörö wa’afökhö. No mangowalu Dawido khö Ahinoa, ba hewa’ae itehegö Lowalangi wamakaerua, tatu manö möi fanandraigö da’a khö ndra alawe si lö faröi me luo da’ö. Lö nasa si tobali razo Dawido; oya daha-taha sedöna alua fatua lö tebe’e khönia dadaoma da’ö ba wangai halöwö Yehowa. Hiza’i, ilului ituhini halöwö Dawido andrö Abigaila sandrohu fa’aurinia, ba gafuriata tebe’e khönia nono matua. I’ila Abigaila wa ifosumange ba ilumö’ö ia fo’omonia. Samuza inötö, i’efa’ö ia Dawido ba danga zondrabu! (I Zam. 30:1-19) Simane Lowalangi Yehowa sangomasi’ö ira alawe satua-tua, si barani, ba samati, simane da’ö göi nifalua Dawido.