1, 2. (a) Hana wa lö omuso dödö Khana me lafa’anö-anö ira wofanö ba Zilo? (b) Hadia wamaha’ö si tola tahalö moroi khö Khana?

OYA halöwö Khana ba wama’anö ya’ira we’amöi ba Zilo ena’ö lö i’era-era manö gabula dödönia. Sindruhunia mena’ö, da’ö ginötö si tola mangomusoi’ö tödönia; fo’omonia, Elikana, i’ohe fefu nösi nomonia ba nose Lowalangi ero röfi ba Zilo ba wamosumange Lowalangi. Omasi Yehowa na owua-wua dödöra ba gowasa da’ö. (Baso V Moze 16:15.) Faduhu dödöda, i’otarai me ide-ide Khana, omuso dödönia ba gowasa da’a. Hiza’i, barö-barö ndröfi da’a fabö’ö zalua.

² Tefahowu’ö ia börö me so wo’omonia sangomasi’ö ya’ia. Hiza’i, so wo’omo Elikana tanö bö’ö. Töinia Fenina ba hulö i’odödögö wamawukaisi fa’auri Khana. No isöndra lala ena’ö möi fangafökhö dödö Khana gowasa nifalua ero röfi andre. Hewisa? Sabölö moguna, hewisa wamati Khana khö Yehowa möi fanolonia ba wanaögö salua hewa’ae hulö tebai na ba wa’aniha? Na so zalua si möi mamawukaisi fa’omuso dödöu ba wa’auri, tola möi fangaro wamatiu zalua khö Khana.

3, 4. Hadia zi dombua gabula dödö sebua si göna Khana, ba hana wa abua sibai ia?

³ Itutunö Sura Ni’amoni’ö wa so dombua gabula dödö sebua ba wa’auri Khana. Abula dödö si oföna abua sibai wo’asiwai, ba abula dödö si dua tebai mu’asiwai. Si oföna, fakaerua wo’omonia, ba fatuwu sibai gaeruania khö Khana. Si dua, lö mo’ono ia. Abua da’a khö ndra alawe si no mangowalu somasi mo’ono; hiza’i si to’ölö me götö Khana, tola möi fangabu dödö sebua da’a. Ero sambua ngambatö ladöna-döna ena’ö so nga’ötöra ba wanohugö madora. Na lö mo’ono, tobali fangaila ba fango’aya niha.

⁴ Tola manö itaögö Khana gabula dödönia na tenga börö Fenina. Sindruhusa, lö sökhi na fakaerua. Asese alua watötöisa,  fahindrisa, ba fa’afökhö dödö. No aröu fabö’ö da’a ba goi-goi nihonogöigö Lowalangi ba Kabu Edena ena’ö böi mamakaerua. (I Moz. 2:24) Ifo’amaedola Sura Ni’amoni’ö wakaeruasa simane gambara si no hawutö. Ba, fangabu dödö salua ba nösi nomo Elikana no amaedola gambara si no tekhoi.

5. Hana wa omasi Fenina na abu dödö Khana, ba hewisa wangafökhöi’önia tödö Khana?

⁵ Khana zabölö i’omasi’ö Elikana. Molo’ö waö-waö niha Yahudi, si oföna, mangowalu ia khö Khana, ba mato hauga fakhe aefa da’ö ihalö Fenina. Lö ta’ila na sindruhu mazui faya, olohu sibai Fenina khö Khana, i’alui lala ena’ö abu dödö nudunia andrö. Tohude Fenina moroi khö Khana, börö me so nononia. Börö me oya nononia, itugu fayawa ia. Lö ahakhö dödönia mazui irara dödö Khana, itugu inönö gabula dödö Khana. Imane Sura Ni’amoni’ö wa ibusi dödö Khana Fenina ba ”wangandrö fönunia”. (I Zam. 1:6) I’odödögö Fenina wamalua da’a fefu. No i’era-era wangafökhöi’ö tödö Khana, ba a’ozu ni’era-erania.

6, 7. (a) Hewa’ae irara dödö Khana Elikana, hana wa lö itunö fefu gabula dödönia Khana? (b) Hadia börö wa lö omasi Yehowa khö Khana andrö wa lö mo’ono ia? Tutunö. (Faigi nisura ba gahe zura.)

⁶ Inötö somasi Fenina ba wangafökhöi’ö tödö Khana ya’ia da’ö na mufalua gowasa ndröfi ba Zilo. Ero-ero samösa nono Fenina—”ononia matua ba ononia alawe fefu”—ifo’urakha ira Elikana ba zumange nibe’enia khö Yehowa. Hiza’i, börö me fondrege ni’omasi’önia Khana, andrö tohude nitemania. Börö da’ö, olohu Fenina ba ifatörö li khö Khana börö me lö mo’ono ia irege mege-ege ia ba lö terou dödönia wemanga. Tatu manö i’ila Elikana wa abu dödö wo’omonia ni’omasi’ö andre irege lö manga. Andrö, irara dödö Khana. Manofu ia, ”He Khana, hana wa mege-ege ndra’ugö ba hana wa lö manga’ö? Hadia mbörö wa si lö sökhi-sökhi dödöu? Hadia, lö omasi’ö ndra’odo, moroi ba zi dafulu, ono matua?”​—I Zam. 1:4-8.

⁷ Sinangea tasuno Elikana, börö me aboto ba dödönia wa’abu dödö Khana ba wa lö ononia. Tatu omuso dödö Khana ba wehede Elikana andrö safönu fa’omasi. * Hiza’i, lö itötöi gamuata Fenina si lö sökhi; ba lö göi niwa’ö  Zura Ni’amoni’ö wa itutunö Khana gamuata Fenina. Imane tödönia Khana, na ututunö gamuata Fenina, tenga itugu sökhi lua-luania. Hadia so nifalua Elikana? Hadia lö monönö wa’afatuwu Fenina khönia, ba hadia lö fatuwu ndraono hegöi sohalöwö khö ndra alawe andrö khönia? Hulö tobali niha baero Khana ba nomonia samösa.

8. Na lö atulö ba lö sökhi nifalua niha khöu hewa’ae no la’aohasi ba dödö, hana wa terara dödöda na lö olifu ita wa Yehowa andrö Lowalangi satulö?

⁸ He na i’ila Elikana fefu zi lö sökhi nifalua Fenina andrö hegöi na lö’ö, i’ila Lowalangi Yehowa. Oroma da’ö ba Daromalinia, irege tobali famangelama sabe’e ba niha solohu hegöi si fatuwu, hewa’ae no la’aohasi ba dödö. Baero da’ö, niha si lö sala ba somasi atulö simane Khana, tola lasöndra wondrara dödö me la’ila wa Lowalangi satulö, i’asiwai ngawalö gabula dödö ba ginötö si no ihonogöigö. (Baso V Moze 32:4.) Te i’ila göi Khana da’ö, börö me khö Yehowa i’andrö wanolo.

9. Hadia wamaha’ö si tola tahalö ba wa’aoha gölö Khana we’amöi ba Zilo hewa’ae i’ila nifalua nudunia?

⁹ Sihulö wongi da’ö, oya halöwö nösi nomo andrö. Lafa’anö ira wofanö, simanö göi ndraono. Möi ira ba Zilo, fa’aröunia töra 30 kilometer, latörö Geferayi sohili. * Fa’ara na mutörö tanö sahari ma dua hari ba lala. I’ila Khana hadia nifalua nudunia andrö. Hiza’i, lö toröi Khana ba nomo. Ibe’e duma-duma si sökhi ba nono mbanua Lowalangi ba ginötö andre. Lö sökhi na taböhöli wamosumange Lowalangi ha börö zi lö sökhi nifalua niha khöda. Na tafalua da’ö, taya howu-howu hegöi fa’abölö ni’oguna’öda ba wanaögö abula dödö andrö.

10, 11. (a) Me so ginötö, hana wa i’anemai möi Khana ba nose Lowalangi? (b) Hewisa Khana wanutunö ösi dödönia ba wangandrö khö Namania ba zorugo?

¹⁰ Arakhagö larugi Zilo me no latörö tanö ma’ö-ma’ökhö ba hili si fahiwö. Ba dete hili so mbanua da’ö, ba arakhagö fefu ifasui ia hili salawa. Me ahatö larugi, ihaogö i’era-era Khana hadia zinangea iwa’ö khö Yehowa ba wangandrö. Me no larugi, manga ira fefu. Me so ginötö, möi Khana ba nose Lowalangi Yehowa, iröi niha sato. So ba da’ö Eli, Ere Sebua andrö, no mudadao ia ahatö ba mbawandruhö. Hiza’i, no i’osambua’ö dödönia Khana khö Lowalangi. Ba nose Lowalangi andrö, faduhu dödönia wa tefondro-ndrongo wangandrönia. Na lö hadöi niha  sorasoi fa’abu dödönia andrö, tatu i’ila Amania si so zorugo. Ibörögö abu dödönia ba ilau me’e.

¹¹ Börö me adö’u-dö’u Khana we’e, manizi-nizi dölania, ba bakha ba dödö fahuhuo ia khö Yehowa. Mametu-metu mbewenia ba wanutunö fa’afökhö dödönia. Ara sibai mangandrö ia, itutunö nösi dödönia khö Namania. Hiza’i, tenga ha asala i’andrö ena’ö tebe’e khönia nono. Lö omasi Khana na ha asala itema manö howu-howu, tobali omasi göi ia wame’e si tola ibe’e khö Lowalangi. Börö da’ö, fawu’u li ia khö Yehowa, na tebe’e khönia nono matua, ilulu wa’auri nono andrö ba wangai halöwö khö Yehowa.​—I Zam. 1:9-11.

12. Moroi ba duma-duma Khana, hadia zinangea ta’angeraigö na mangandrö ita?

¹² Iröi duma-duma Khana ba nono mbanua Lowalangi sanandrösa ba wangandrö. Ikaoni nono mbanuania Yehowa ena’ö lö aiwö ira fahuhuo khönia, lö fa’aombö dödö, ba latunö gabula dödöra simane ono si faduhu tödö khö zatuania solomasi. (Baso Zinunö 62:9; I Tesalonika 5:17.) Tebe’e geheha khö Wetero ba wanura fondrara dödö sanandrösa ba wangandrö khö Yehowa, ”Mibe’e balazi ia, na so zabu dödömi, gofu hadia ia, so so sa dödönia ami.”​—I Fet. 5:7.

13, 14. (a) Hadia zalio tumbu ba dödö Eli sanandrösa khö Khana? (b) Hewisa wehede Khana khö Geli tobali duma-duma wamati?

¹³ Hiza’i, fa’aboto ba dödö hegöi fa’ahakhö dödö niha gulidanö tenga simane Yehowa. Me mege-ege Khana ba wangandrö, tokea ia me so zi hede. I’otarai mege ifaigi-faigi ia Eli andrö, Ere Sebua. Imane, ”Hawa’ara dania döhö wemabumö? Tayaigö wemabu andrö.” I’ila-ila Eli wa mametu-metu mbewe Khana, adö’u-dö’u ia, ba abu dödönia. Lö manofu ia sakali, iwa’ö tödönia wa no mabu Khana.​—I Zam. 1:12-14.

¹⁴ Hawa’afökhö dödö Khana, me muböbögö khönia zi lö duhu—ba sanguma’ö khönia da’ö ira matua si so dadaoma solakhömi! Hiza’i, ifuli ibe’e khöda duma-duma wamati si sökhi sibai. Falömo’ahonoa ndra matua andrö, lö tobali taha-tahania ba wamosumange Yehowa. Ihaogö-haogö wanema li Eli ba itutunö zalua khönia. Itema göi linia Eli si fao fehede si sökhi ba sohau-hau, ”Fuli’ö, ya’ohahau dödöu, ibe’e sa’ae khöu Lowalangi ndraono Gizara’eli ni’andröu khönia!”​—I Zam. 1:15-17.

15, 16. (a) Hadia lua-luania khö Khana me no itutunö nösi dödönia ba ifosumange Yehowa ba nose Lowalangi? (b) Hewisa wolo’öda duma-duma Khana na so gabula dödöda?

¹⁵ Hadia lua-luania khö Khana me no itutunö nösi dödönia  ba ifosumange Yehowa ba nose Lowalangi? Imane ba waö-waönia, ”Mofanö ndra alawe andrö ba manga ba döhö wa’abu dödö.” (I Zam. 1:18) Imane Sura Ni’amoni’ö Terjemahan Baru, ”Lö mangerau mbawania sa’ae.” Ohahau dödö Khana. Hulö no ifawu’a noro dödönia sebua ba galisi Namania ba zorugo. (Baso Zinunö 55:23.) Hadia so gabula dödö sabua khö Lowalangi? Lö’ö—me föna lö’ö, iada’a lö’ö, ba zi so föna göi lö’ö!

¹⁶ Na so gabula dödöda si hulö noro sabua, ta’o’ö duma-duma Khana ba fahuhuo ita khö ’Zamondro-ndrongo fangandrö’ simane niwa’ö Zura Ni’amoni’ö. (Zin. 65:3) Na tafalua da’ö fao famati, tola tarasoi wa tefalalini wa’abu dödöda ba ’wa’ohahau dödö andrö, khö Lowalangi, sabölö moroi ba gera-era niha fefu’.​—Fil. 4:6, 7.

17, 18. (a) Hadia dandra wa fao dödö Elikana ba mbu’usa li Khana? (b) Hadia gamuata Fenina si lö lua-lua sa’ae khö Khana?

¹⁷ Mahemolu sihulö wonginia, ifuli möi Khana hegöi Elikana ba nose Lowalangi. Te no itunö khö Elikana gangandröwania hegöi bu’usa linia, börö me ba Goroisa Moze, fo’omo ira matua tola itenawa mbu’usa li wo’omonia ira alawe na lö nirongonia sakali. (IV Moz. 30:10-15) Hiza’i, ira matua samati andrö, lö iwu’aini. Fao ira Khana ba nose Lowalangi wamosumange Yehowa fatua lö mangawuli ira ba nomo.

¹⁸ Hamega i’ila Fenina wa lö sa’ae lua-lua wango’ayania Khana? Lö mututunö waö-waönia, hiza’i ngawua wehede ”döhö wa’abu dödö” zangoroma’ö wa i’otarai da’ö no ohahau dödö Khana ba lö abu dödönia sa’ae. Tatu manö alio i’ila Fenina wa lö lua-lua gamuatania si lö sökhi andrö khö Khana. Lö irai itötöi sa’ae döinia Sura Ni’amoni’ö.

19. Hadia howu-howu nitema Khana, ba hewisa wangoroma’önia wa i’andrö saohagölö khö zame’e howu-howu andrö?

¹⁹ Itugu numalö mbaŵa, fa’ohahau dödö Khana tobali fa’omuso dödö sebua. Manabina ia! Ba wa’omuso dödönia andrö, lö irai olifu Khana khö zame’e howu-howu andre. Me tumbu nononia, ibe’e töi Samueli, eluahania ”Töi Lowalangi” ba tatu manö eluahania mu’ao ba döi Lowalangi, simane si no ifalua Khana. Ba ndröfi da’ö, lö fao ia khö Elikana hegöi soroi yomonia we’amöi ba Zilo. Toröi ia ba nomo khö nononia ba zi tölu fakhe irege aefa ba mbagi zusu. Aefa da’ö, i’owuloi wa’abölönia ena’ö tola fabali ia khö nono ni’omasi’önia.

20. Hewisa Khana hegöi Elikana wamalua si no lafabu’u khö Yehowa?

 ²⁰ Tatu manö afökhö wabalisa. Hewa’ae i’ila Khana wa larorogö Zamueli dania ira alawe sohalöwö ba nose Lowalangi ba Zilo, hiza’i ide-ide nasa Zamueli, ba lö hadöi ina somasi fabali khö nononia. Hewa’ae simanö, lö abua gölö Khana hegöi Elikana wolohe ono andrö, labe’e fao fangandrö saohagölö. Latunu zumange ba nomo Lowalangi, aefa da’ö labe’e Zamueli khö Eli, ba lafasugi ba dödönia mbu’usa li Khana tölu fakhe silalö.

21. Ba wangandrö Khana khö Yehowa, hewisa wangoroma’önia hawa’ebua wamatinia? (Faigi göi kotak ” Dombua Wangandrö si Toröi-röi ba Dödö”.)

²¹ Mangandrö Khana khö Lowalangi ba sinangea musura wangandrönia andrö ba Daromali. Na öbaso wehedenia nisura ba I Zamueli 2:1-10, tola ö’ila hewisa wa’ebua wamati Khana ero humede ia. Isuno Yehowa me i’oguna’ö wa’abölönia ba zahöli-höli dödöda—lö solawa fa’abölönia ba wohöndrögö si fayawa, wamahowu’ö nifakao, ba wangohori niha si lö sökhi mazui ba wangorofi niha moroi ba wa’amate. Isuno Namania Khana börö me te’amoni’ö ia, atulö, ba lö faröi. Andrö wa imane Khana, ’Sambua lö gowe simane Lowalangida.’ Sindruhu-ndruhu wa tola mu’odaligö Yehowa, ba lö tebulö ia. Ilumö’ö niha si tosasa ba nifakao, sangalui fanolo khönia.

22, 23. (a) Hana faduhu dödöda wa i’ila Samueli la’omasi’ö ia ira satuania me itugu ebua-bua ia? (b) Hadia nasa howu-howu nibe’e Yehowa khö Khana?

²² No töi si sökhi da’a khö Zamueli me so ninania samati khö Yehowa. Hewa’ae omasi Zamueli falukha khö zatuania me ebua-ebua ia, lö imane tödönia no la’olifugö ia. Ero röfi möi Khana ba  Zilo, i’ohe mbaru si lö ta’io khö Zamueli ena’ö ifake ba wohalöwö ba nose Lowalangi. Fefu dagu-tagu ba mbaru da’ö, tandra wa’omasinia khö nononia. (Baso I Zamueli 2:19.) Tola takhalaigö me ibe’e mbaru andrö khö Zamueli, i’adölö’ö, ba ifaigi Zamueli fao fa’omasi, ba ihaogö-haogö wame’e fehede fangaro wamati. Sindruhu-ndruhu tefahowu’ö wa’auri Zamueli me so ninania simane da’ö, ba na ebua ia, tobali howu-howu khö zatuania hegöi ba ndraono Gizara’eli fefu.

²³ Sanandrösa khö Khana lö göi la’olifugö ia. Ifahowu’ö ia Yehowa irege tumbu khönia dalimatö ndraono moroi khö Elikana. (I Zam. 2:21) Hiza’i, howu-howu sebua nitema Khana te me itugu aro gamakhaitania khö Namania Yehowa, ero röfi. Ya’alua göi zimane da’ö ba wa’auriu na ö’o’ö wamati Khana.