1-3. Hadia ni’ila Wetero ba ngaluo si tebai i’olifugö, ba hadia zalua khönia ba zi bongi da’ö?

IHORIGÖ wa’abölönia Fetero ba wo’alukhaini ba fataria ifaigi dalu mbanua si no ogömi. Hadia si haga-haga moroi raya ba gatumbukha andrö tandra wa’atumbu luo? Ibörögö afökhö mbörö da’io awö hulunia ba wo’alukhaini ba zi hauga za. Angi sanörini bunia no da’ö mbörö wa mobade Nasi Galilaia. Ibörögö i’oloi’ö dundrahania dulu nasi, ba abasö Wetero ba kana-kana nidanö sokafu. Lö iböhöli wo’alukhaini.

² Fetero hegöi ira awönia, no laröi Yesu ba zi sambua nahia ba gawu. Me luo da’ö, la’ila Yesu me ibe’e gö niha solofo si hauga ngahönö, ha ma’ifu roti hegöi i’a. Börö wa’omasi niha sato khö Yesu, andrö labali’ö ia razo. Hiza’i lö omasi ia na fao ba politik. Itatugöi ena’ö böi so ba gera-era zolo’ö khönia gamuata simane da’ö. Ena’ö lö falukha ia ba niha sato, iwa’ö khö ndra nifaha’önia ena’ö latörö dundraha we’amöi yefo nidanö, ba mofanö ia samösa möi mangandrö ba hili.​—Mrk. 6:35-45; baso Yohane 6:14-17.

³ No alawa mbaŵa arakhagö tuli me mofanö ndra nifaha’ö; iada’a lö igaözö-gaözö tobini mbaŵa tanö ba gaekhula. Hiza’i, awena mato hauga kilometer la’alukhaini dundrahara. Fa’erege dödö ba angi sabölö-bölö hegöi dulu, da’ö mbörö wa lö la’ila fahuo-huo khö nawöra. Tola manö arörö Wetero ba wangera-ngerania.

4. Hana wa sinangea ta’o’ö duma-duma Wetero?

⁴ Tatu oya zalua sinangea mu’angeraigö! Yesu niha Nazareta andrö no i’o’ö ia Fetero ba zi töra dua fakhe fa’ara. Oya zi no  ifaha’ö ia ba oya göi nasa zinangea i’ila. Tobali ia duma-duma sinangea ta’o’ö börö me omasi ifaha’ö ia ba iforege göi wolawa fa’aombö dödö hegöi fa’ata’unia. Datafaigi.

5, 6. Hewisa wa’auri Wetero?

⁵ Lö irai olifu Wetero ngaluo wa’afalukhatania khö Yesu. Talifusönia sotöi Andrea, da’ö zolohe turia sahöli-höli dödö andrö me imane, ”No masöndra Mesia andrö.” Sindruhu-ndruhu tebulö wa’auri Wetero ba wehede da’ö.​—Yoh. 1:42.

⁶ Ba Gafanauma toröi Wetero, banua si so ba zinga nidanö nifotöi Asi Galilaia si lö azi-azi. Ya’ia faoma Andrea fao ira khö Yakobo ba Yohane ono Zebedai’o fagai i’a. Si toröi ba nomo khö Wetero baero wo’omonia ya’ia da’ö inania matuania hegöi Andrea, talifusönia. Ya’ia zombönökhi soguna ba nösi nomonia, andrö moguna atua-tua ia ba iforege wohalöwö irege kalua mböböinia sasi-asi. Khalaigö atö la’osindruhugö wohalöwö ero bongi si fagai ba nasi mato hauga za—lafazaewe giri ba gotalua dundraha si dombua ba lasöbi gofu hadia ia nisöndrara moroi ba nidanö andrö. Khalaigö nasa me mohalöwö ira ba zi ma’ökhö, lafili ba la’amawa gi’a, lafazökhi ba la’ehaogö giri.

7. Hadia nirongo Wetero sanandrösa khö Yesu ba hana wa no sahöli-höli dödö duria andrö?

⁷ Molo’ö Sura Ni’amoni’ö, Yohane Samayagö Idanö zamaha’ö Andrea. Tatu omasi Wetero wamondrongo nifatunö dalifusönia andre sanandrösa ba duria nifa’ema Yohane. Samuza ma’ökhö, falukha Gandrea khö Yohane me ituturu Yesu moroi ba Nazareta imane, ”Hiza Nono Mbiri-biri andrö, khö Lowalangi.” I’anemai tobali nifaha’ö Yesu Gandrea ba omuso dödönia wamatunö khö Wetero duria sahöli dödö andrö: No tohare Mesia! (Yoh. 1:35-40) Me aefa wamadaö ba Gedena kira-kira 4.000 fakhe silalö, fawu’u li Lowalangi Yehowa wa tohare niha si tohude ba wame’e tötönafö ba niha gulidanö. (I Moz. 3:15) No falukha Gandrea khö Zangorifi, ya’ia da’ö Mesia! I’anemai möi Wetero wamalukhaisi Yesu.

8. Hadia geluaha döi nibe’e Yesu khö Wetero ba hana wa so niha si lö faduhu tödö ba döi andrö?

⁸ Ba mböröta, töi Wetero ya’ia da’ö Simoni, mazui Simeoni. Hiza’i, ifaigi ia Yesu ba imane, ”Simoni ndra’ugö, ono Yohane, labe’e töimö Kefa; gowe (Fetero) geluahania.” (Yoh. 1:43) ”Kefa” ya’ia da’ö kata benda umum eluahania ”kara” mazui ”kara nasi”. Fehede Yesu andre hulö wama’ele’ö. I’ila wa tola  tobali kara nasi Wetero andrö—samarou si lö tebulö, aro, ba tola la’odaligö ira solo’ö khö Keriso. Hadia simane da’ö Wetero wamaiginia ya’ia? Hulö tenga. So ösa zombaso injil ba ginötö da’a lö la’ila wa niha saro tödö Wetero andrö. So zanguma’ö wa tebulö-bulö manö ia, lö manö tatu, ba tebai nifarisayoi, simane soroma ba Zura Ni’amoni’ö.

9. Hadia ni’alu-alui Yehowa khöda hegöi Ononia, ba molo’ö ya’ugö, hana wa tafaduhusi tödö ira?

⁹ Atulö, so zo’amböta ba gamuata Wetero. Lö balunö Yesu ba zo’amböta da’ö. Hiza’i simane Amania, Yehowa, da’ö ni’alu-alui Yesu ba niha amuatara si sökhi. I’ila wa oya zi tola ifalua Fetero ba itolo ia wondrou’ö amuata si sökhi andrö. Ni’alu-alui Yehowa faoma Ononia ba ginötö andre ya’ia da’ö amuatada si sökhi. Tola manö tawa’ö wa lö oya tesöndra zi sökhi ba gamuatada. Hiza’i, moguna tafaduhusi tödö ira ba taforoma’ö wa omasi ita tefaha’ö ba te’a’azökhi simane Fetero.​—Baso I Yohane 3:19, 20.

10. Hadia manö zi no i’ila Fetero, ba hadia nifaluania mangawuli?

¹⁰ Te fao ösa Wetero ba halöwö fanuriaigö nifalua Yesu aefa da’ö. I’ila me ifalua Yesu dandra sahöli-höli dödö si oföna ya’ia me ibali’ö agu nidanö ba walöwa ba Kana. Sabölö moguna, irongo duria Yesu sahöli-höli dödö hegöi tötönafö sanandrösa ba Mbanua Lowalangi. Hiza’i, ibato ba ifuli ia fagai. Mato hauga waŵa aefa da’ö, ifuli falukha ira Yesu—sakali da’a, ikaoni ia Yesu ena’ö tobali ia safönu inötö ba wangai halöwö ba ena’ö da’ö zi tobali lala wa’aurinia.

11, 12. (a) Hadia zalua khö Wetero me möi ia fagai ba zi sara wongi? (b) Hadia wanofu ni’era-era Wetero me ifondro-ndrongo niwa’ö Yesu?

¹¹ No sara wongi iforege wohalöwö Fetero, hiza’i zaya-zaya gölönia. No hauga kali lafazaumba ba lasöbi girira ira si fagai, ba lö ahulu ira. Tatu no i’oguna’ö fefu wa’onekhenia Fetero ba wangalui i’a, itandraigö wangalui ba nahia bö’ö hezo gamaudu manga gi’a. Lö aombö dödöda, simane si fagai tanö bö’ö, itaria itötöna na tola i’ila gi’a ba nidanö solotu ba oya ahulu ira mazui i’o’ou gi’a we’amöi ba girinia. Fangera-ngera simane da’ö zamowöhö ya’ia. Igaini gi’a Fetero tenga börö wa’omasinia, hiza’i ba wobalazoi ösi nomonia. Ba gafuriata, mangawuli ia ba gawu, sara na so. Hewa’ae simanö, moguna ihaogö giri. Ba ginötö da’ö ifalukhaisi ia Yesu, me mohalö-halöwö ia.

¹² Fasösö wa’ato niha samasui Yesu, omasi ira wamondro-ndrongo  niwa’önia. Börö me ato zamasui ya’ia, andrö möi ia ba dundraha Wetero, i’andrö ena’ö la’alukhaini dundrahania ba nidanö. Terongo sibai li Yesu ba dete nidanö ba ifaha’ö niha sato andrö. Ihaogö ifondro-ndrongo Fetero, simanö göi niha sato ba da’ö. Lö irai aföli ia wamondro-ndrongo tuho wanuriaigö Yesu—Banua Lowalangi. No sambua töi sebua ba wanolo Keriso ba wamazaewe turia fanötöna andrö ba zi sagörö ulidanö! Hiza’i, hadia sindruhu da’ö? Hewisa göi zoguna khöra ero ma’ökhö? Te itörö tödö Wetero me bongi da’ö, me lö ahulu ia.​—Luk. 5:1-3.

13, 14. Hadia dandra sahöli-höli dödö nifalua Yesu khö Wetero, ba hadia nifalua Wetero?

¹³ Me no awai fahuhuo Yesu, imane khö Wetero, ”Misola ba zabakha ba milau giri, ba wama’u’u i’a.” Imane Fetero si fao fa’aombö-aombö dödö, ”He Samaha’ö, sara wongi manö no ma’eregesi dödöma, ba lö sahulu ndra’aga; ba me no öwa’ö, ba ulau giri.” Bohou i’anotogö girinia Fetero. Tatu lö omasi ia wamokai mena’ö—mendrua manö tenga inötö wa’ahulu gi’a iada’a! Hewa’ae simanö, i’o’ö ba ibe’e dandra khö ndra awö-awönia ba dundraha si sambua ena’ö la’o’ö ira.​—Luk. 5:4, 5.

¹⁴ Isöbi girinia Fetero ba lö idöna-döna abua sibai worasoinia. Ambö faduhu dödönia, ikilaini wanöbi nasa, ba lö ara aefa da’ö, i’ila gi’a soya oi zara manaoka-naoka ba giri! Ata’u ia mangawuli, ikaoni nawönia ba dundraha si sambua ena’ö latolo ia. Ambö naha gi’a dundraha si sara. Lafo’ösi zui saratö, hiza’i mondrege wa’oya sa’ae gi’a andrö irege arakhagö ahöndrö dundraha. Ahöli-höli dödö Wetero. No irai i’ila wa’abölö Keriso, hiza’i tandra sahöli-höli dödö da’a hulö khönia manandrösa! Khalaigö, ira matua andrö tola ibe’e alau gi’a ba giri! Ibörögö ata’u Wetero. Ituhi danö ba imane, ”He Tua, heta’ö khögu, me no niha si so horö ndra’o!” Ba worasoinia, tenga sinangea fao ia ba niha si tola mangoguna’ö fa’abölö Lowalangi simane da’ö.​—Baso Luka 5:6-9.

15. Hewisa Yesu wamaha’ö Fetero wa lö hadöi dane-dane wa’aombö dödö hegöi fa’ata’unia?

¹⁵ Ihaogö wanguma’ö Yesu, ”Böi ata’ufi, i’otarai da’e, ba sama’u’u niha ndra’ugö.” (Luk. 5:10, 11) Tenga inötö wa’aombö dödö iada’a mazui ata’u. Lö dane-dane wa’aombö dödö Wetero  ba halöwö sero ma’ökhö simane fagai i’a; lö göi dane-dane wa’ata’unia ba zala hegöi ba zo’amböta ia. Moguna ifalua halöwö sebua Yesu, halöwö si tola mamulö’ö waö-waö salua. Ihalö halöwö Lowalangi ’sangöhöna dania fame’e aefa horö’. (Yes. 55:7) Yehowa zame’e soguna khöra, he ba mboto hegöi ba wamati.​—Mat. 6:33.

16. Hadia nifalua Wetero, Yakobo ba Yohane me ikaoni ira Yesu, ba hana wa no angetula si sökhi da’ö?

¹⁶ I’anemai i’o’ö Fetero, simanö göi Yakobo ba Yohane. ”Ba la’ohe baene dundraha, laröi fefu hadia ia ba la’o’ö ia.” (Luk. 5:11) Mamati Wetero khö Yesu hegöi khö Zamatenge ya’ia. Da’ö gangetula si sökhi sandrohu fa’aurinia. Ba ginötö andre, mamati göi niha Keriso solawa fa’aombö dödö hegöi fa’ata’u ba  wangai halöwö Lowalangi. Lö irai fasala wa’afaduhu dödö simane da’ö khö Yehowa.​—Zin. 22:5, 6.

17. Hadia manö zalua khö Wetero barö zi dua fakhe i’otarai me falukha ira Yesu?

¹⁷ Mato dua fakhe me no falukha Wetero khö Yesu, me luo da’ö i’alukhaini dundrahania ba Nasi Galilaia simane nitutunö ba wamobörö. Bongi da’ö, abölö-bölö sibai nangi. Lö ta’ila hadia manö nitörö tödönia. Oya sibai! Yesu zamadöhö ina matua Wetero. No göi ifa’ema Huhuo ba Hili. No hauga kali iforoma’ö wa ya’ia andrö Mesia, Niha Nifili Yehowa, ba wamaha’ö hegöi ba halöwönia safönu fa’abölö. Hauga waŵa no numalö, tatu no alö zo’amböta Wetero simane fa’ata’u ba fa’aombö-aombö dödönia. No ifili ia Yesu tobali sinenge moroi ba gotalua zi-12! Hiza’i, alio ara i’ila Fetero wa so nasa wa’aombö-aombö dödö hegöi fa’ata’unia.

18, 19. (a) Tutunö hadia ni’ila Wetero ba Nasi Galilaia. (b) Hewisa Yesu wanehegö ni’andrö Wetero?

¹⁸ Sagötö rundro si me’öfa, mazui kira-kira i’otarai bözi tölu sihulö wongi ofeta tumbu luo, izumaigö ibato wangalukha Fetero ba no ihasugö ia wedadao. Ba da’ö—ba gotalua ndrulu—so zofanö-fanö! Hadia lumö ndrulu nasi da’ö börö haga mbaŵa? Tenga, börö me no ahono-hono lumö-lumönia ba no adölö-dölö. Sindruhunia, niha da’ö! Atulö, niha andrö mowaö-waö yawa ba dete nasi! Me ifahatö ia hulö na ilalöi ira. Börö wa’ata’u ndra nifaha’ö, lawalinga bekhu da’ö. Imane niha andrö, ”Mihonogö ami, ya’odo; böi mi’ata’ufi!” Yesu da’ö!​—Mat. 14:25-28.

¹⁹ Imane Fetero, ”Na ya’ugö, Tua, ba wa’ö khögu, möido khöu ba dete nidanö.” Lö fa’ata’unia wamalua si lö ni’era-erania andrö. Ahöli dödönia ba dandra sahöli-höli dödö sawena i’ila andrö, edöna Wetero na mu’aro’ö nasa wamatinia. Omasi ia irasoi samösa dandra sahöli-höli dödö da’a. Ihaogö wanguma’ö khönia Yesu ena’ö ifahatö ia. Manöi Wetero ba zinga dundraha ba möi ia tou ba dete nasi sodulu. Khalaigö hewisa dödö Wetero me ihundragö hulö danö sabe’e ba gahenia ba mozizio ia ba dete nidanö. Ahöli-höli dödönia me ifahatö ia khö Yesu. Hiza’i, so zamangiwa tödönia.​—Baso Matai’o 14:29.

20. (a) Hana wa mangoloi dödö Wetero, ba hadia lua-luania? (b) Hadia wamaha’ö nibe’e Yesu khö Wetero?

²⁰ Moguna i’osambua’ö dödönia Fetero khö Yesu. Fa’abölö  Yehowa ni’oguna’ö Yesu wa tola ifowaö-waö Wetero ba dete ndrulu nasi. Ba ifalua da’ö börö me mamati Wetero khönia. Hiza’i, ibörögö mangoloi dödö Wetero. Tabaso, ”Me i’ila nangi, ba ata’u ia.” I’ila Fetero hewisa me ibözi dundrahara dulu, iwuraisi nidanö hegöi otu-otunia ba ibörögö ata’u ia. Te ikhalaigö na ahöndrö ia ba nidanö andrö. Börö me so ba dödönia wa’ata’u, andrö awuwu wamatinia. Ira matua nifotöi Kara Nasi andre sindruhunia tola aro dödönia. Hiza’i, börö me mangiwa wamatinia, ahöndrö ia hulö gara. Onekhe molangi Wetero, hiza’i sakali da’a lö i’odaligö wa’onekhenia. Mu’ao ia, ”He Tua, orifido.” Isöbi dangania Yesu. Aefa da’ö, me so ira ba dete nidanö, so wamaha’ö sabölö moguna nibe’e Yesu khö Wetero, ”He sambö famati, hana wa manufa dödöu?”​—Mat. 14:30, 31.

21. Hana wa möi fama’ala na manufa dödöda, ba hewisa wolawa ya’ia?

²¹ ’Manufa dödö’—tefaudu sibai wehede da’a! Tola tekiko wamati saro na so wanufa dödö. Na lö aetu manufa dödöda, itugu ara ba awuwu wamatida irege tekiko. Moguna taforege wolawa ya’ia! Lalania? Böi tebulö ta’osambua’ö dödöda ba zindruhu. Na ta’era-era manö zi möi fa’ata’uda, sangide-ngide’ö tödöda, hegöi samangoloi tödöda khö Yehowa ba Ononia, tola tumbu wanufa dödö. Na ta’osambua’ö dödöda khö Yehowa hegöi khö Nononia, si no lafalua, nifaluara iada’a, hegöi sedöna lafalua dania ba niha sangomasi’ö ya’ira, lö awuwu wamatida börö wanufa dödö.

22. Hana wa sinangea mu’o’ö wamati Wetero?

²² Me mangawuli Yesu ba dundraha, igo’ö-go’ö moroi furi Fetero, i’ila wa no alö mbade. Ahono sa’ae Nasi Galilaia. Imane Fetero hegöi nifaha’ö tanö bö’ö, ”Duhu Ono Lowalangi ndra’ugö.” (Mat. 14:33) Me ibörögö oroma haga luo ba nidanö andrö, mangandrö saohagölö dödö Wetero. Iheta wanufa dödönia hegöi fa’ata’unia. Sindruhu, oya nasa zinangea ifalua ena’ö tobali ia niha Keriso saro si hulö gara nasi, simane ni’ila Yesu khönia. Hiza’i, ihalö gangetula, lö ibato wondrou’ö famatinia. Hadia simane da’ö göi gangetulamö? Tatu fao dödöu wa sinangea mu’o’ö wamati Wetero.