1. Tutunö gabula dödö Marata ba hadia mbörö.

ITÖRÖ-TÖRÖ manö tödö Marata lewatö dalifusönia—tögi si no laduhö faoma kara. Fa’abu dödönia hulö simane fa’abua gara andrö. Lö faduhu dödönia wa no mate Lazaro ni’omasi’önia. Ara sibai worasoinia si öfa wongi i’otarai me aetu noso Lazaro ba ato niha sangondrasi si fao ba wa’abu dödö.

2, 3. (a) Hewisa Marata me i’ila Yesu? (b) Hadia wehede Marata sangoroma’ö haniha ia zindruhunia?

² Iada’a, no muzizio föna Marata ndra matua si fahuwu sibai khö Lazaro. Me falukha ira Yesu, tenga itugu alö gabula dödönia, börö me ha Yesu andre zindruhunia niha si tola mangorifi talifusönia. Hewa’ae simanö, terara dödö Marata me fao ira Yesu ba gahe hili ba zinga Mbetania. Lö ara me fahuhuo ira, irasoi Marata hewisa wa’asökhi dödö soroma ba hörönia hegöi fa’omasi si möi fondrara dödö. Manofu-nofu Yesu khö Marata si tobali fanolo ba wo’angeraigö famati hegöi fa’afaduhu dödönia ba wanusugi. Ba wahuhuosara, alua ba mbewe Marata wehede sabölö moguna, ”Mamati sa’ae ndra’o, wa Keriso andrö ndra’ugö, Ono Lowalangi si möi ba gulidanö.”​—Yoh. 11:27.

³ Da’ö wehede sangoroma’ö wa ebua wamati Marata. Hewa’ae lö oya nisura ba Zura Ni’amoni’ö sanandrösa khönia, oya wamaha’ö si möi fangaro wamatida. Börö da’ö, datafaigi hadia zi oföna tesura sanandrösa khö Marata ba Zura Ni’amoni’ö.

4. Hana wa fabö’ö nösi nomo Marata moroi ba danö bö’ö, ba hadia gamakhaitara khö Yesu?

⁴ Hauga waŵa silalö, abölö nasa Lazaro ba lö fökhö-fökhö. Tohare dome sebua ba nomonia si so ba Mbetania ya’ia da’ö Yesu Keriso. Lazaro, Marata, ba Maria, ösi nomo si fabö’ö moroi ba danö bö’ö—ya’ira si datölu andre si fatalifusö ba ha sambua nomora. So zanguma’ö wa Marata zia’a, börö me hulö  nina ia ba nomo ba asese töinia zi oföna latötöi. (Yoh. 11:5) Lö ta’ila hadia so zi no irai mangowalu ba gotaluara. Si no tatu, si fahuwu khö Yesu ira. Sagötö fanuriaigö Yesu ba Yudea, ba nomora toröi ia börö me ato zi fatuwu khönia. Tatu manö mangandrö saohagölö ia ba naha si sökhi andre sahono dödönia.

5, 6. (a) Hana wa oya sibai halöwö Marata me tohare Yesu? (b) Hadia nifalua Maria me möi Yesu ba nomora?

⁵ Omasi Marata na ohahau dödö domenia ba fataha ira ba nomonia. Börö me owölö-ölö ia ba omasi mohalöwö, hulö oya manö nifaluania. Simanö göi ba wotema’önia fa’atohare Yesu sakali da’a. I’aliokö wama’anö ngawalö gö soya sibai khö domenia sebua, hegöi ira awönia si fao khönia. Me luo da’ö, moguna sibai wanema’ö tome. Na tohare samösa dome, latema’ö ia si fao fa’ago bawa, laheta mbadagahenia, lasasai gahe, ba labe’e wanikha samohua ba högönia. (Baso Luka 7:44-47.) La’ame’egö tödö sibai naha wemörö hegöi soguna khönia.

⁶ Oya zinangea lafalua ira Marata hegöi Maria ba wotema’ö tomera. Börö me si to’ölönia Maria zabölö mangila ba so’ame’egö tödö, tatu manö no itolo Marata ba wamobörö. Hiza’i, me awena tohare Yesu fabö’ö zalua. Fe’amöi Yesu sakali da’a ibali’ö inötö ba wamomaha ya’ira—ba da’ö nifaluania. Tenga simane ira sondrönia’ö ba agama me luo da’ö, i’ame’egö tödö ndra alawe Yesu ba omasi ia ifaha’ö ira sanandrösa ba Mbanua Lowalangi, tuho wanuriaigönia. I’andrö saohagölö Maria me luo da’ö, mudadao ia ba gahe Yesu ihaogö wamondro-ndrongo.

7, 8. Hana wa ibörögö aukhu dödö Marata, ba hewisa wanguma’önia ba gafuriata?

⁷ Tola takhalaigö, ibörögö aukhu dödö Marata. Börö me oya ngawalö gö ihenaigö awö halöwö sinangea ibabaya soguna ba domenia, itugu alangu dödönia ba mangoloi gera-erania. Mangörö-ngörö manö Marata ba i’ila Maria no mudao-dao, lö itolo ia. Hadia ibörögö i’oroma’ö wa’abao dödönia, te ifahasu ia mazui ifakuru gangangonia? Lö ahöli dödöda na ifalua zimane da’ö. Hezo wa tola sagu khönia!

⁸ Ba gafuriata, lö itaha dödönia Marata sa’ae. I’etu’ö dalu wahuhuosa Yesu ba humede ia, ’He Tua, hadia, lö ba dödöu, wa ibe’e manö sangai halöwö ndra’o Maria, ha ya’o? Wa’ö ae khönia, ena’ö ibabaya göi, itolodo.’ (Luk. 10:40) Abe’e wehede da’a. So ösa zamo’eluaha fehede Marata andre imane, ”He Tua,  hadia ö’osilömangilagö . . . ?” Aefa da’ö i’andrö khö Yesu ena’ö ifotu Maria, ba ifatenge ia wohalöwö.

9, 10. (a) Hewisa Yesu wanema li Marata? (b) Hezo ta’ila wa lö i’aohasi ba dödö Yesu wa’erege dödö Marata?

⁹ Te tokea dödö Marata me itema linia Yesu, simanö göi zato sombaso Sura Ni’amoni’ö. Ihaogö wehede imane, ”He Marata! He Marata! Wa’oya wangabu dödöu, ba oya ngawalö wa lö ahono’ö; ba hasambalö zoguna. No ituyu khönia zi sökhi andrö Maria, lö laheta khönia da’ö.” (Luk. 10:41, 42) Hadia geluaha wehede Yesu? Hadia ifotöi Marata andrö somasi ana’a? Hadia i’aohasi ba dödö wa’amarase Marata ba wondrino gö sami?

¹⁰ Lö’ö. Aboto ba dödö Yesu wa soroi ba dödö Marata wamalua da’ö ba si fao fa’omasi. Aefa da’ö, lö irai isalaikö na so zame’e gö soya sibai. Lö ara ba zilalö, me möi ia ba gowasa sebua nifalua Matai’o ba ’lafodiwo’ ia. (Luk. 5:29) Si fasala tenga börö gö nibe’e Marata, hiza’i hadia ia ni’ofönai’önia. No arörö ia ba ngawalö gö nihenaigönia irege lö aboto ba dödönia hadia zabölö moguna. Hadia da’ö?

11, 12. Hewisa Yesu wo’amenesi Marata si fao fehede si sökhi?

¹¹ Yesu, Ono Lowalangi Yehowa si ha samösa, möi ia ba nomo Marata ba wamaha’ö sindruhu. Da’ö zabölö moguna moroi ba gö sami hegöi ngawalö zi no lafa’anö. Tatu manö abu dödö Yesu börö me taya ginötö si sökhi khö Marata ba wondrou’ö famatinia, hiza’i da’ö nifilinia ba itehegö khönia Yesu wamalua da’ö. * Tebai i’andrö khö Yesu ena’ö ifaso Maria irege taya ginötö si sökhi andrö.

¹² Ihaogö Yesu wame’e fotu khö Marata. Irara dödönia ya’ia me dua kali itötöi döi Marata, ba ibe’e wa’afaduhu dödö ena’ö ’lö oya wangabu dödönia’. Obönö sambua mazui dombua ngawalö gö, mendrua manö me no oya tehenaigö gö ba wamati. Börö da’ö, hewisa wa tola iheta Yesu ”zi sökhi” khö Maria, ya’ia da’ö me ifili wamaha’ö ya’ia moroi khö Yesu!

13. Hadia zi tobali famaha’ö khöda moroi ba wehede Yesu khö Marata?

 ¹³ Oya zi tobali famaha’ö ba niha solo’ö khö Keriso iada’a zalua ba nomo Marata andrö. Gofu hadia manö tebai möi famangoloi dödöda irege lö ta’ame’egö tödö ”zoguna ba wamatida”. (Mat. 5:3, Terjemahan Dunia Baru) Sindruhu wa omasi ita ta’o’ö wa’oböwö hegöi fa’owölö-ölö Marata, hiza’i lö omasi ita na talafo ’abu dödöda’ ba ngawalö zambö moguna ba wanema’ö tome irege taya zabölö moguna. Ba wariawösa khö ndra talifusöda si sara lala wamati, tenga ni’a ba nibadu zabölö moguna, hiza’i famarou dödö ba wamati. (Baso Roma 1:11, 12.) Tola mufalua wa’owulo hewa’ae no öna-öna gö nihenaigö.

14. Hana wa faduhu dödöda wa no ibe’e khöda duma-duma si sökhi Marata ba wotema mene-mene?

¹⁴ Hadia itema Marata degu-tegu moroi khö Yesu ba ifabö’öni gamuatania? Lö moguna manofu-nofu ita. Ibörögö Yohane wanura sanandrösa khö dalifusö Marata ono matua me imane, ”Ba no omasi Yesu Marata andrö ba talifusönia ba Lazaro andrö.” (Yoh. 11:5) No hauga waŵa numalö ginötö me möi Yesu ba mbanua Betania nitutunö moroi yawa. Ba da’a ta’ila wa lö abao dödö Marata khö Yesu ba mene-mene nibe’enia si fao fa’omasi. Itanögö ba dödönia. Ibe’e göi khöda duma-duma ba wamati, börö me oi zara moguna khöda mene-mene si sökhi.

15, 16. (a) Hadia nifalua Marata me mofökhö dalifusönia? (b) Hana wa aetu wanötöna Marata ba Maria?

¹⁵ Me mofökhö dalifusö Marata, erege dödönia wondrorogö. Iforege ena’ö ohahau dödö dalifusönia ba alio döhö. Hewa’ae simanö itugu abölö-bölö wökhö Lazaro. Sagötö me mofökhö ia, lö laröi ia ira talifusönia alawe si darua ba wondrorogö ya’ia. Tatu manö asese itöngö dalifusönia andre Marata si no alö fa’abölö ba si no afusitö, ba itörö-törö tödönia wa’omuso dödö hegöi fa’afökhö si no lataögö ba zilalö.

¹⁶ Me lö sa’ae si tola lafalua ba wanolo Lazaro, lafa’ohe’ö goroisa khö Yesu ira Marata ba Maria. No möi ia manuriaigö ba zaröu, dua hari fofanö. No adogo-dogo goroisara, ”He Tua, faigi, somasi ndra’ugö andrö, ba no mofökhö.” (Yoh. 11:1, 3) La’ila wa i’omasi’ö dalifusöra andrö Yesu, ba mamati ira wa tola ifalua ndrege zi sagu khönia ba wanolo si fahuwu khönia andrö. Hadia latötöna wa tohare Yesu fatua lö abölö-bölö wökhö Lazaro? Na da’ö zalua, aetu dötönaföra. Mate Lazaro.

17. Hadia mbörö wa abu dödö Marata, ba hadia nifaluania me ahatö tohare Yesu?

¹⁷ Abu dödö Marata ba Maria, lahenaigö lewatö dalifusöra ba ato niha sangondrasi moroi ba Mbetania hegöi niha si fasuira. Lö murongo nasa duria moroi khö Yesu. Itugu ara itugu monönö wa’abu dödö Marata. Amozuania, öfa hari me no mate Lazaro, awena irongo Marata wa no ahatö Yesu ba mbanuara. Börö me Marata andre ira alawe so’ame’egö tödö, andrö wa ifalukhaisi Yesu ba lö ifatunö khö Maria hewa’ae ba gabula dödö so ia.​—Baso Yohane 11:18-20.

18, 19. Hadia wanötöna nitötöi Marata ba hana wa ahöli-höli dödöda wamatinia?

 ¹⁸ Me falukha ia khö Zamaha’ö, iwa’ö Marata wehede fa’afatö dödö si no hauga hari i’era-era hegöi Maria, ”He Tua, ena’ö na ho so ndra’ugö ba da’e, ba lö mate mena’ö dalifusögu andrö.” Hiza’i, lö saetu dötönafö Marata hegöi famatinia. Inönö wanguma’ö, ”Ba iada’e göi, ba u’ila, hadia ni’andröu khö Lowalangi, ba ibe’e khöu Lowalangi.” Ifaduhu’ö Yesu wanötönania andrö ba imane, ”Maoso dania dalifusöu andrö.”​—Yoh. 11:21-23.

¹⁹ Molo’ö Marata, iwalingagö fanusugi ba zi so föna niwa’ö Yesu, andrö imane, ”U’ila sa, maoso ia dania, ba wemaoso andrö na luo safuria.” (Yoh. 11:24) Sindruhu-ndruhu mamati Marata ba wamaha’ö da’ö. So ösa zondrönia’ö ba agama Yahudi nifotöi Sadukai’o, lö faduhu dödöra ba wanusugi, hewa’ae no tesura  ba Daromali Lowalangi. (Dan. 12:13; Mrk. 12:18) Hiza’i, aboto ba dödö Marata wa mamaha’ö Yesu sanandrösa ba wemaoso zi mate ba no irai isusugi ösa niha si no mate—hewa’ae na lö ba gotaluara simane fa’ara wa’amate Lazaro. Lö idöna-döna hadia zalua aefa da’ö.

20. Tutunö geluaha wehede Yesu si tebai mu’olifugö si no tesura ba Yohane 11:25-27 hegöi fanema li Marata.

²⁰ Itohugö Yesu wanguma’ö fehede si tebai mu’olifugö andre, ”Ya’odo wemaoso ba fa’auri.” Sindruhu, no ibe’e Lowalangi Yehowa kuaso khö Nononia ba wamalua fanusugi ba zi sagörö ulidanö ba zi so föna. Manofu Yesu khö Marata, ”Hadia faduhu dödöu ba da’ö?” Ibe’e wanema li Marata simane si no mutötöi ba wamobörö faza da’a. Mamati ia wa Yesu andrö Keriso mazui Mesia, Ono Lowalangi Yehowa, ba no lafa’ele’ö ira sama’ele’ö wa’atoharenia ba gulidanö.​—Yoh. 5:28, 29; baso Yohane 11:25-27.

21, 22. (a) Hewisa Yesu wangoroma’ö fa’abu dödönia ba niha si göna abula dödö? (b) Tutunö hewisa wemaoso Lazaro.

²¹ Hadia i’ame’egö tödö wamati simane famati Marata andre Lowalangi Yehowa hegöi Ononia, Yesu Keriso? Oroma wanema linia ba ngawalö zalua ni’ila Marata aefa da’a. Iʼanemai ifalukhaisi Maria. Aefa da’ö, oroma khö Marata wa abu sibai dödö Yesu me fahuhuo ia khö Maria hegöi ba niha sangondrasi. I’ila wa me’e Yesu, tandra wa abu dödönia börö wa’amate andrö. Irongo me ifaretakö Yesu ena’ö laheta gara si so ba lewatö Lazaro.​—Yoh. 11:28-39.

²² Börö me tefaudu wangera-ngera Marata, andrö wa fatimba khönia na labokai lewatö dalifusönia si no mate öfa hari fa’ara, börö me no aböu. Ifasugi ba dödönia Yesu, ”Tenga no uwa’ö khöu, na faduhu dödöu, ba oroma khöu lakhömi Lowalangi?” Faduhu dödö Marata, ba sindruhu-ndruhu no i’ila lakhömi Lowalangi Yehowa. Me luo da’ö föna lewato, ibe’e kuaso Yehowa khö Nononia ba wanusugi Lazaro! Khalaigö ginötö si lö taya ba gera-era Marata sandrohu fa’aurinia: Fe’ao Yesu ba wogaoni talifusönia, ”He Lazaro, ae baero!”; so li soruru-ruru moroi bakha ba lewatö me maoso Lazaro ba no ida’i-da’i wofanö numalö ba mbawandruhö lewatö, no te’olohuni mbotonia faoma lembe; imane Yesu, ”Mitoto’ö khönia ba mifofanö ia”; ba tatu manö, Marata hegöi Maria, latalagui dalifusöra andrö si fao fa’omuso dödö. (Baso Yohane 11:40-44.) No taya gabula dödö sebua khö Marata!

23. Hadia zomasi ibe’e khöu Yehowa hegöi Yesu, ba hadia zinangea öfalua?

 ²³ Waö-waö da’a zangoroma’ö fanusugi zi no mate tenga ha anga-anga, hiza’i sambua famaha’ö moroi ba Zura Ni’amoni’ö si möi fondrara dödö si no irai alua. (Yob. 14:14, 15) Omasi Yehowa hegöi Ononia wame’e sulö ba niha samati, simane nifaluara khö Marata, Maria ba Lazaro. Omasi ira labe’e khöu howu-howu simane da’ö na ödou’ö wamati saro.

24. Hewisa Zura Ni’amoni’ö wanötöi töi Marata ba gafuriata?

²⁴ Hatö sakalitö mutötöi Marata ba Zura Ni’amoni’ö ya’ia da’ö me böröta migu safuria wa’auri Yesu ba gulidanö. Börö me i’ila Yesu wangabu dödö salua khönia dania, sakalitö ifili nomo Marata ba Mbetania nahia si toröi ia. Na möi ia ba Yeruzalema, ha tölu kilometer itörö tanö. Manga Yesu hegöi Lazaro ba nomo Zimoni si no irai göna bou auri, ba mufuli mutötöi döi niha nifatunöda ba gafuriata, ’Marata sangai halöwö’.​—Yoh. 12:2.

25. Hana wa tefahowu’ö mbanua niha Keriso ba ginötö andre me ato ndra alawe simane Marata?

²⁵ Sindruhu wa ira alawe sowölö-ölö ia! Me awena mutötöi ia ba Zura Ni’amoni’ö, mohalö-halöwö ia; ba me mutötöi ia ba gafuriata, mohalöwö nasa ia, iforege ba wombönökhi soguna ba niha sahatö khönia. Ba ginötö andre, tefahowu’ö mbanua niha Keriso börö me ato ndra alawe simane Marata—abölö ba oböwö, iforoma’ö wamatinia ba wangai halöwö Yehowa hegöi ba wanolo niha bö’ö. Hadia lö ibato wamalua da’ö Marata? Te lö’ö. Na simanö, no tefa’anö ia ba wanaögö abula dödö salua aefa da’a.

26. Hadia nifalua Marata me so khönia wamati?

²⁶ Hauga hari aefa da’ö, itaögö wa’abu dödö Marata me mate Yesu, Samaha’ö ni’omasi’önia, labunu ia si lö fa’ahakhö dödö. Aefa da’ö, samunu samini tödö andrö ba sowökhi tödö ba ndro edöna labunu Lazaro, börö me fanusuginia mbörö wa ato zamati khö Yesu. (Baso Yohane 12:9-11.) Sindruhu wa fa’amate ba gafuriata zamabali Marata khö dalifusönia si darua ni’omasi’önia. Lö ta’ila hewisa ba hamega alua da’ö hiza’i si no tatu: Famati saro ni’okhögö Marata zame’e fa’anau gölö khönia irugi gamozua. Da’ö mbörö wa moguna la’o’ö wamati Marata ira niha Keriso iada’a.