FAZA DUA
”Lö Aefa-Aefa Khönia Lowalangi ba Lalania”
1, 2. Hadia halöwö nifalua Noakhi hegöi ösi nomonia, ba hadia wanaisi nitaögöra?
IFADÖLÖ hulunia Noakhi hegöi bu’unia si no agakandro. Khalaigö atö, mudadao ia ba mboto geu sesolo, molombase ia sabata moroi ba halöwönia ba ifaigi döla-döla nowo sebua andrö. Atarö sibai hua ter (zulumou); faoma fagema-gema li fakake wanaba eu ni’oguna’öra. Ba nahania wedadao, i’ila ndraononia Noakhi, la’odödögö wangehaogö döla-döla nowo sebua andrö. Iraononia matua ba fo’omora, hegöi fo’omonia samösa, falulu fohalöwö ira ba wamazökhi owo andrö ba zi hauga wulu fakhe. No oya ni’ohalöwögöigöra, hiza’i oya nasa zinangea la’asiwai!
2 Niha ba zi fasui ya’ira, lafotöi Noakhi hegöi ösi nomonia, labaliʼö ira niha si bodo. Itugu oroma nowo andrö, itugu la’a’igi’ö Noakhi ba wamangelama ni’ombakha’önia sanandrösa ba wa’anönö danö idanö. Famangelamania andrö hulö aröu sibai, lö duhu tola alua! Ahöli dödöra hana wa so niha sondrörö fa’aurinia hegöi fa’auri nösi nomonia ba halöwö si lö karua andrö. Hiza’i, Yehowa, Lowalangi Noakhi, fabö’ö wamaiginia.
3. Hadia geluahania lö aefa-aefa Lowalangi ba lala Noakhi?
3 Imane Taromali Lowalangi, ”Noakhi andrö, . . . lö aefa-aefa khönia Lowalangi ba lalania.” (Baso I Moze 6:9.) Hadia geluahania? Tenga da’ö geluahania mofanö-fanö Lowalangi ba gulidanö, mazui Noakhi zi möi ba zorugo. Hiza’i, börö me sindruhu i’o’ö ba i’omasi’ö Lowalangi, tola tamane wa hulö fao-fao Yehowa ba lala Noakhi, amaedola zi fahuwu. Ngahönö fakhe aefa da’ö, imane Sura Ni’amoni’ö, ’Moroi ba wamatinia, i’etu’ö huku niha gulidanö.’ (Heb. 11:7) Hadia geluahania? Hadia wamaha’ö khöda moroi ba wamatinia?
Niha si Lö Sinegu ba Gulidanö si Lö Sökhi
4, 5. Hana wa itugu lö sökhi gulidanö andre me götö Noakhi?
4 Ebua-bua Noakhi ba gulidanö salio tebulö, moroi ba zi lö sökhi itugu lö sökhi. No tohöna wa’alösökhi gulidanö andrö I Moz. 5:22; 6:11; Yud. 14, 15) Hadia mbörö wa itugu lö sökhi gulidanö?
i’otarai ba götö duania Khenoki, niha satulö si lö aefa-aefa Lowalangi ba lalania. No ifa’ele’ö Khenoki wa tehuku niha si lö sökhi ba gulidanö. Ba götö Noakhi, itugu lö sökhi niha. Mendrua manö ba wamaigi Yehowa, no tekiko gulidanö andre börö wa’oya zi lö sökhi. (5 So zi hokha mbuda salua ba gotalua nono Lowalangi ba zorugo, ya’ia da’ö ira mala’ika. So samösa ba gotaluara zolawa Yehowa, tobali ia Afökha ba Satana, iböbögö zi lö duhu khö Lowalangi, ba idönisi dödö Gadamo ba Khawa wamalua horö. Me götö Noakhi, lalawa göi wamatörö Yehowa ira mala’ika tanö bö’ö. Laröi nahiara nibe’e Lowalangi khöra ba zorugo, möi ira ba gulidanö, lahalö fo’omora ndra alawe si baga-baga. Ira mala’ika si fayawa ba si so fakhögusa andrö, ladönisi niha gulidanö ba wamalua si lö sökhi.—I Moz. 6:1, 2; Yud. 6, 7.
6. Hadia lua-luania me so Nadaoya ba gulidanö, ba hadia zi no i’etu’ö Yehowa?
6 Töra-töra me no orudu ba niha gulidanö ndra mala’ika si no mangai boto wa’aniha, lua-luania tumbu khöra ndraono si faruka, sabölö ba segebua niha. Ifotöi ira Sura Ni’amoni’ö Nadaoya, eluahania ”Sangekhugö”—ya’ira mbörö wa aekhu niha bö’ö. Lafakao niha irege monönö wa’alösökhi ba gulidanö. Andrö lö ahöli dödöda ba wamaigi Zomböi ya’ita, ”no ebua sibai zi lö sökhi ba niha ba gulidanö, wa no si lö sökhi manö gera-erara, awö nikhoi dödöra, si lö mamalö-malö”. Ihalö gangetula Yehowa, ihori niha si lö sökhi andrö ba zi 120 fakhe tö.—Baso I Moze 6:3-5.
7. Hadia gabula dödö Noakhi hegöi fo’omonia ba wolumö’ö iraonora ba zi lö sökhi me luo da’ö?
* Falulu fohalöwö Noakhi khö wo’omonia ba wolumö’ö iraonora moroi ba zi lö sökhi ba zi fasuira. Si to’ölönia, ahöli-höli dödö ndraono matua ba wamaigi-maigi ”niha sabölö” ba ”sebua sibai turia”—simane da’ö Nadaoya andrö. Abua khö Noakhi hegöi khö wo’omonia ba wangaröu’ö onora moroi ba hikaya niha segebua. Hiza’i, tola lafaha’ö zindruhu sanandrösa khö Lowalangi Yehowa, sangogorofi si lö sökhi. Latolo ndraonora ena’ö la’ila wa afökhö dödö Yehowa wamaigi si lö sökhi hegöi famadaö me luo da’ö.—I Moz. 6:6.
7 Khalaigö hawa’afökhö wangebua iraono ba gulidanö simane da’ö! Hiza’i, da’ö nifalua Noakhi. No isöndra wo’omo si sökhi. Me 500 fakhe Noakhi, tumbu khönia datölu nono matua—Semi, Khamo, ba Yafeti.Noakhi hegöi fo’omonia lö tola lö’ö lalumö’ö ndraonora moroi ba zi lö sökhi
8. Hewisa zatua sonekhe ba ginötö andre la’o’ö duma-duma Noakhi hegöi fo’omonia?
8 Ira satua iada’a, la’ila hewisa dödö Noakhi hegöi fo’omonia. Ulidanö iada’a no göna langu wa’alösökhi ba famadaö. Oya geng (ngawawa) zi bohou ebua si tebai muwa’ö ba mbanua segebua. Oya wa’alösökhi hegöi hiburan nihaogö ba ndraono sigide-ide. Satua sonekhe, la’odödögö wolawa wondrönisi tödö andrö, lafaha’ö ndraonora sanandrösa khö Lowalangi satulö sotöi Yehowa, sangohori si lö sökhi ba zi lö aratö. (Zin. 11:5; 37:10, 11) Tola mofozu da’a! No mofozu nifalua Noakhi hegöi fo’omonia. Tobali ira matua si sökhi ndraonora, ba lasöndra wo’omora sangofönai’ö Lowalangi sindruhu sotöi Yehowa ba wa’aurira.
”Fazökhi Khöu Nowo”
9, 10. (a) Hadia fareta Yehowa zombulö’ö fa’auri Noakhi? (b) Hadia niwa’ö Yehowa khö Noakhi sanandrösa ba wa’ebua hegöi ohitö dödö wa mufazökhi nowo?
9 Samuza ma’ökhö, fabö’ö wa’auri Noakhi sagötö fa’ara. Fahuhuo Yehowa khö genoni ni’omasi’önia andre ba ifatunö wa omasi ia wangohori ulidanö me luo da’ö. Ifaretakö Noakhi Lowalangi, ”Fazökhi khöu nowo, naru’u geunia.”—I Moz. 6:14.
10 Owo andre tenga köfa simane niwa’ö niha. Lö hadöi amuri, mazui naha wo’alukhaini—lö fatö-fatö. Da’ö ha feti mazui kota-kota sebua. Izara-zara Yehowa wangombakha fa’ebua nowo da’ö, hewisa wamazökhi hegöi fondruhö tanö bakha ba tanö baero faoma sulumou. Aefa da’ö, i’ombakha’ö khö Noakhi hadia mbörö, ”Lö ara tö sa dania ba anönö danö idanö ube’e . . . I Moz. 6:17-20.
Fefu zi so ba gulidanö ba si tekiko ube’e.” Hiza’i, fawu’u li Yehowa khönia, ”Si möi ba nowo ndra’ugö ya’ugö ba onou matua andrö ba fo’omou ba umönöu andrö, awöu.” Moguna göi i’ohe Noakhi zalahi gurifö ero safasa. Ha si so ba nowo ni’orifi ba ginötö Anönö Danö Idanö si lö aratö alua!—Falulu fohalöwö Noakhi ba nösi nomonia wamalua fareta Lowalangi
11, 12. Hadia halöwö sabua nitema Noakhi, ba hewisa dödönia ba halöwö andrö?
11 Itema Noakhi halöwö sabua. Ebua sibai nowo da’ö—fa’anaunia mato 133 meter, 22 meter wa’ebolo, ba 13 meter wa’alawa. Abölö ebua ia moroi ba göfa eu sebua nifazökhi ba ginötö andre. Hadia i’alui dani Noakhi ena’ö itimbagö halöwö andrö, mukökö ia me oya gabula dödö, mazui ifabö’öni zi no mufakhoi ena’ö aoha wangehaogö ya’ia? Imane Sura Ni’amoni’ö, ”I’o’ö sibai Noakhi, dali niwa’ö Lowalangi khönia.”—I Moz. 6:22.
12 Ngafulu fakhe wangehaogö owo da’ö, te 40-50 fakhe. So geu sinangea la’obö, lata’u, lasila, lafazökhi, ba laforudugö. Mufotölu nga’ötö ia, mufobate’e, ba so mbawandruhö ba ngai. Te so zandrela yawa ba dete nowo, sagönia lafanaere wamasa ba adöni baero ma’ifu ena’ö ahele nidanö deu.—I Moz. 6:14-16.
13. Hadia halöwö Noakhi sabölö abua baero wamazökhi owo, ba hadia nifalua niha khönia?
13 Hauga fakhe no numalö ginötö ba ibörötaigö oroma wa’ebua nowo andrö, tatu omuso dödö Noakhi me lalului ösi nomonia wamazökhi! Hiza’i, so danö bö’ö sabua moroi ba wamazökhi owo. Itutunö Sura Ni’amoni’ö wa Noakhi andrö ”sanuriaigö fa’atulö dödö”. (Baso II Fetero 2:5.) Tobali, lö fa’ata’u khö Noakhi wangagö föna ba wamangelama niha si lö sökhi ba si lö atulö me luo da’ö sanandrösa ba wanguhuku si lö aratö alua. Hadia nifaluara? Ba gafuriata, i’ombakha’ö Yesu wa niha me luo da’ö ’lö labe’e dödöra’. Arörö ira ba halöwöra sero ma’ökhö—manga, mamadu-madu, ba mangowalu—lö la’ame’egö tödö wamangelama Noakhi. (Mat. 24:37-39) Tatu manö ato zango’aya Noakhi hegöi ösi nomonia; te so zameta’u ba sama’udusi ya’ia. Lafakiko göi halöwönia.
Hewa’ae la’ila niha dandra wa ifahowu’ö Noakhi Lowalangi, lö labato wango’aya ya’ia ba la’osiwawöi duria nifa’emania
14. Iada’a, hadia wamaha’ö si tola lahalö khöra ngambatö niha Keriso moroi ba duma-duma Noakhi hegöi ösi nomonia?
14 Hiza’i, lö irai awuwu Noakhi hegöi ösi nomonia. Lö labato wamazökhi owo hewa’ae lamane niha, lö moguna halöwö da’ö, tefuyu, mazui bodo. Oya wamaha’ö si tola lahalö ira niha Keriso ba ginötö andre moroi ba duma-duma wamatira. So ita ba ”götö safuria” ba gulidanö andre simane niwa’ö Zura Ni’amoni’ö. (II Tim. 3:1) Imane Yesu inötö si so ya’ita andre fagölö simane ba götö Noakhi. Moguna latörö tödöra ira niha Keriso nifalua Noakhi na la’o’aya ba lafakao ira, mazui lö fatema ba dödö niha duria Mbanua Lowalangi. Tenga ya’ira zi oföna göna folohi simane da’ö.
”Ae Baowo”
15. Hadia gabula dödö Noakhi me arakhagö 600 fakhe ia?
15 Hauga wulu fakhe no numalö, ibörögö awai nowo da’ö. Me arakhagö 600 fakhe Noakhi, so gabula dödönia. Mate namania sotöi Lameki. * Lima fakhe aefa da’ö, mate nama Lameki, ya’ia da’ö tua Noakhi sotöi Metusala, 969 fakhe ndröfinia. Ya’ia zabölö anau noso nisura ba Zura Ni’amoni’ö. (I Moz. 5:27) He Metusala hegöi Lameki, no irai fendronga auri ira Gadamo, niha si oföna.
16, 17. (a) Hadia goroisa si bohou nitema Noakhi me 600 fakhe ia? (b) Tutunö zalua si tebai mu’olifugö ni’ila Noakhi hegöi ösi nomonia.
16 Me 600 fakhe silalö duada Noakhi, itema goroisa si bohou moroi khö Lowalangi Yehowa, ”Ae baowo, ya’ugö ba soroi yomou fefu.” Ba ginötö da’ö göi, ifaretakö ia Lowalangi wolohe ngawalö gurifö—fitu rozi asala tenga salakha, sinangea mubali’ö sumange, ba tanö bö’ö safasa.—I Moz. 7:1-3.
17 Tatu tebai mu’olifugö zalua andre. Moroi ba gahe mbanua tohare ngahönö gurifö, so zalio-lio ba wofanö, so zara, so zi hombo, sanaoka, ba sanana-nana. Fabö’ö-bö’ö wa’ebua, sikhala, hegöi lagu. Lö moguna takhalaigö ha wa’abua khö Noakhi wolohe, fe’ao, mazui famauwu gutu ndru’u andrö möi ba nowo. Ba waö-waönia ta’ila wa ’möi ira baowo khö Noakhi’.—18, 19. (a) Hewisa ena’ö tola tabe’e wanema li ba zinofu-nofu niha si lö faduhu tödö ba waö-waö Noakhi? (b) Hewisa wa’atua-tua Yehowa oroma ba nifaluania ena’ö lö tekiko gurifö nifazökhinia?
18 Te manofu-nofu niha si lö faduhu tödö, ’Hewisa wa tola alua da’ö? Ba hewisa wa lö fa’udu gurifö andrö me orudu ira ba zi sambua nahia?’ Angeraigö atö: Hadia tebai ifatörö fefu gurifö nifazökhinia Samazökhi banua si yawa awö danö ena’ö mauwu ba ahono na moguna? Böi olifu’ö, Yehowa andrö Lowalangi samazökhi urifö. No irai ifabali Nasi Sukhu ba ibatogö luo. Hadia tebai ifalua fefu nitutunö ba waö-waö Noakhi? Tatu manö tola, ba no ifalua da’ö!
19 Tola manö i’oguna’ö lala bö’ö Lowalangi ena’ö lö tekiko ngawalö gurifö nifazökhinia. Hiza’i börö me atua-tua ia, ifili lala bö’ö si tola mamasugi ba dödöda wa ifaduhusi tödö niha gulidanö ba wondrorogö fefu zaliwa-liwa ba danö. (I Moz. 1:28) Iada’a, ato zatua sangoguna’ö waö-waö Noakhi ba wamaha’ö iraonora wa i’osinangegö wa’auri gurifö Yehowa hegöi niha si no ifazökhi.
20. Hana wa oya halöwö Noakhi hegöi ösi nomonia ba migu safuria fatua lö Anönö Danö Idanö?
20 Ifatunö Yehowa khö Noakhi wa samigu tö Anönö Danö Idanö. Tatu oya sibai halöwö nösi nomo Noakhi me luo da’ö. Khalaigö atö, laföfögö fefu gurifö awö ni’a, hegöi soguna khöra samösa, lafazawa fefu gama-gamara ba nowo. Fo’omo Noakhi hegöi fo’omo Zemi, Khamo, ba Yafeti, te oya halöwöra ba wamöfögö owo andrö ena’ö ohahau dödöra wangiagö.
21, 22. (a) Hana wa lö tokea ita lagu niha me götö Noakhi? (b) Hawa’ara tebato wango’aya nitema Noakhi hegöi ösi nomonia?
21 Hewisa niha tanö bö’ö? ’Lö labe’e dödöra’ hewa’ae no la’ila dandra wa ifahowu’ö Noakhi Yehowa hegöi halöwönia. Tatu la’ila gurifö soya si möi ba nowo. Hiza’i, lö ahöli dödöda ba lagura andrö. Niha ba ginötö andre lö la’ame’egö tödö dandra salua sangoroma’ö wa ba ginötö safuria so ita iada’a. Simane nifa’ele’ö Wetero, no tohare zango’aya, la’o’aya fefu niha so’ame’egö tödö famangelama Lowalangi. (Baso II Fetero 3:3-6.) Simanö göi me föna, ato zango’aya Noakhi hegöi ösi nomonia.
22 Hawa’ara tebato wango’aya andrö? Ba waö-waönia ta’ila, me awai i’ohe zoroi yomonia Noakhi hegöi urifö ba nowo, ”ikusi mbawandruhö Yehowa, furinia”. Na la’ila ira sango’aya andre nifalua Lowalangi, tatu lö hede-hedera sa’ae. Na oya lira nasa, teu sabölö-bölö zoduhö bawara! Lö tebato-bato deu andrö irege inönöi gulidanö ma’asagörö, simane niwa’ö Yehowa.—I Moz. 7:16-21.
23. (a) Hezo ta’ila wa lö omasi Yehowa na mate niha si lö sökhi me götö Noakhi? (b) Iada’a, hana wa sökhi na ta’o’ö wamati Noakhi?
23 Hadia omasi Yehowa wamaigi fa’amate niha si lö sökhi? Lö’ö! (Hez. 33:11) Tobali, no ibe’e khöra ginötö ena’ö lafalalini gera-erara ba lafalua zatulö. Hadia tola lafalua da’ö? Ba waö-waö wa’auri Noakhi so wanema linia. Me itörö Noakhi lala Yehowa, i’o’ö fefu niwa’ö Lowalangi, ba da’ö oroma wa tola mukhamö wangorifi. Tola tamane, famati Noakhi zanguhuku ulidanö me luo da’ö; famatinia zangoroma’ö wa lö sökhi gamuata niha me götö da’ö. Famatinia zangorifi ya’ia hegöi ösi nomonia. Na ö’o’ö wamati Noakhi, tola te’orifi ndra’ugö hegöi niha ni’omasi’öu. Simane Noakhi, tola ötörö lala Lowalangi Yehowa simane si fahuwu khöu. Ba tola aro wahuwusami irugi zi lö aetu!
^ par. 7 Niha me luo da’ö, anau nosora moroi khöda iada’a. Te börö me ahatö ira ba wa’amo’ahonoa si no irai latema ira Adamo ba Khawa.
^ par. 15 Lameki zame’e töi nononia Noakhi—te da’ö geluahania ”Molombase” mazui ”Fondrara Dödö”—ba no ifa’ele’ö wa alua ba wa’auri Noakhi simane töinia, i’ohe niha ba naha wolombase moroi ba wa’erege dödöra ba danö ni’elifi. (I Moz. 5:28, 29) Lö fakhamö i’ila Lameki nifa’ele’önia andrö. Mate nina Noakhi, ira akhinia ba ga’ania te börö Wa’anönö Danö Idanö.