FAZA FITU
Tedou Ia ba ”Fao Khönia Yehowa”
1, 2. Hewisa ndraono Gizara’eli me fahuhuo khöra Zamueli, ba hana wa moguna ifarou dödöra ena’ö lafalalini gera-erara?
IFAIGI mbawa nono mbanuania Samueli. Owulo ira ba Giligala, börö me ikaoni ira niha samati andre, si no mangai halöwö gere ba sanguhuku ba zi ngafulu fakhe. Molo’ö fangerai mbaŵa iada’a, me luo da’ö baŵa si Lima mazui baŵa si Önö, tefaudu baŵa lökhö. Gandru ba nowi no ibörögö a’usö tandra wa lö aratö basitö. Lö nini-nini niha sato andrö. Hewisa Zamueli ba wamarou tödöra?
2 Lö aboto ba dödö niha mbanua andrö zalua khöra. La’andrö ena’ö so samösa razo samatörö ya’ira. Lö aboto ba dödöra nifaluara andrö tenga fangomuso dödö Lowalangira Yehowa hegöi sama’ele’ö khönia. Sindruhunia, lö omasi ira na Yehowa Razora! Hewisa Zamueli wamarou tödöra ena’ö lafalalini gera-erara?
Oya wamaha’ö khöda ba wa’ide-ide Zamueli sanandrösa ba wondrou’ö famati khö Yehowa hewa’ae na so wondrönisi ba zi lö sökhi
3, 4. (a) Hana wa itörö tödö Zamueli me awuyu-wuyu ia? (b) Hana wa moguna khöda iada’a duma-duma wamati Zamueli?
3 Fahuhuo Zamueli khöra, ”Ba ya’o, ba si no atua, ba si no tohare huwa.” Börö me no afusi högönia huwa, andrö sinangea fahuhuo ia. Imane, ”Ba i’otarai iraono ndra’o, irugi ma’ökhö andre, ba no anehe ami döröwagu.” (I Zam. 11:14, 15; 12:2) He no atua Zamueli, lö olifu ia zalua me ide-ide ia. Itörö tödönia fefu. Angetula nihalönia me ide-ide ia, da’ö zolohe ya’ia ba wa’auri safönu famati ba ilulu wa’aurinia khö Lowalangi, Yehowa.
Luka 18:8.) Datafaigi wamaha’ö si tola tahalö moroi khö Zamueli i’otarai me ide-ide ia.
4 Moguna i’aro’ö wamatinia Samueli, hewa’ae no hauga kali ifasui ia niha si lö mamati ba si faröi. Iada’a, abua göi khöda wondrou’ö famati börö me so ita ba gulidanö si lö sökhi ba si lö mamati. (Baso”Sangai Halöwö Föna Yehowa, Iraono Sobaru ba Doto, Tarafali”
5, 6. Hana wa fabö’ö wa’auri Zamueli me ide-ide ia, ba hadia mbörö wa faduhu dödö zatuania hasambalö terorogö ia?
5 Fabö’ö wa’auri Zamueli ba wa’ide-ide. Lö ara me no fabali ba mbagi zusu, te me tölu fakhe ia mazui töra, ibörögö ilulu wa’aurinia khö Yehowa ba nose Lowalangi ba Zilo, kira-kira 30 kilometer i’otarai nomonia ba Rama. Elikana ba Khana, latehegö wa’auri nonora ba halöwö si sökhi tobali Nazir sandrohu fa’auri. * Hadia da’ö geluahania latibo’ö Zamueli, lö la’omasi’ö ia ira satuania?
6 Faya da’ö! Aboto ba dödöra wa terorogö nonora ba Zilo. Ere Sebua sotöi Eli, tatu manö ihenaigö ifa’anö börö me ba zingania mohalöwö Zamueli. Ato göi ndra alawe sohalöwö ba nose Lowalangi, ba fefu oi toföfö.—II Moz. 38:8; Zangu. 11:34-40.
7, 8. (a) Ero röfi, hewisa zatua Zamueli wame’e khönia famarou dödö si fao fa’omasi? (b) Hadia wamaha’ö si tola lahalö ira satua iada’a moroi khö zatua Zamueli?
7 Lö irai olifu Khana hegöi Elikana nonora sia’a si tumbu börö me no tefondro-ndrongo wangandrö Khana. I’andrö khö Yehowa samösa nono matua, ba fawu’u li ia wa ilulu wa’auri nono andrö wangai halöwö khö Lowalangi. Na la’ondrasi ia ero röfi, i’ohe Khana mbaru si lö ta’io nitagunia samösa soguna khö Zamueli ba nose Lowalangi. Tatu omuso dödö Zamueli na lafalukhaisi ia ira satuania. Omuso dödönia me latuhini halöwönia ba labe’e khönia wanuturu lala, lafaha’ö ia wa fangai halöwö Yehowa ba nahia da’ö no halöwö fondrege zebua.
8 Oya wamaha’ö nihalö zatua iada’a moroi khö Khana ba Elikana. Si to’ölönia, ha fangalui balazo ndraono awai ni’odödögö zatua. Hiza’i, lö ibe’e dödöra zoguna ba noso. Satua Zamueli, la’ofönai’ö zoguna ba noso ba da’ö mbörö wa sökhi gamuata hegöi fa’aurinia ba zi so föna.—Baso Gamaedola 22:6.
9, 10. (a) Tutunö hewisa nose Lowalangi hegöi tödö Zamueli si bohou ebua sanandrösa ba naha ni’amoni’ö andrö. (Faigi nisura ba gahe zura.) (b) Hadia manö halöwö Zamueli, ba hewisa ndraono ba ginötö andre ba wolo’ö duma-dumania?
* Arakhagö 400 fakhe silalö no mufazökhi barö wondrönia’ö Moze, ha da’ö nahia ba wamosumange satulö ba zi sagörö ulidanö me luo da’ö.
9 Tola takhalaigö wa’atedou nono da’ö ba i’anöröi hili-hili ba zi fasui Zilo. Ifaigi si tou mbanua ba ndraso moroi ba dete hili si so ya’ia, ba omuso dödönia me tefaudu i’ila nose Lowalangi Yehowa. Nose Lowalangi da’ö, sindruhu-ndruhu nahia ni’amoni’ö.10 Ibörögö omasi Zamueli toröi ba nose Lowalangi. Ba waö-waö nisurania ba gafuriata imane, ”Ba Samueli andrö, ba no sangai halöwö föna Yehowa, iraono sobaru ba doto, tarafali.” (I Zam. 2:18) Baru sebua si lö ta’io andrö zangoroma’ö wa mohalöwö Zamueli ba wanolo ira ere ba nose Lowalangi. Hewa’ae tenga ere ia, halöwö Zamueli ba wamokai bawandruhö golayama nose Lowalangi ero sihulö wongi ba itolo göi Eli si no atua. Hewa’ae na isöndra wa’omuso dödö ba halöwö nifaluania, ibörögö itegu-tegu ia tödönia side-ide ba gafuriata. So zi lö sökhi salua ba nomo Yehowa.
Lö Fabaya Hadia Ia Hewa’ae No Ifasui Ia si Lö Sökhi
11, 12. (a) Hadia ni’osiwawöi Hofini ba Fineha? (b) Hadia wa’alösökhi ba fa’afaito nifalua Hofini ba Fineha ba nose Lowalangi? (Faigi nisura ba gahe zura.)
11 Me awuyu ndröfi Zamueli, i’ila wa’alösökhi ba fa’afaito sogoro ita. So darua nono Eli, sotöi Hofini ba Fineha. Imane ba waö-waö Zamueli, ”Ba no si lö ngaroro ndraono Eli andrö, lö ba dödöra Yehowa.” (I Zam. 2:12) Oi mo’amakhaita zi dombua bua gera-era ba ayati andrö. Hofini ba Fineha andrö niha ”si lö ngaroro” börö me lö ba dödöra Yehowa. La’osiwawöi dane-dane goi-goi salawa. Da’ö mbörö wa lafalua horö tanö bö’ö.
12 No izara-zara Oroisa Lowalangi hadia manö halöwö ndra ere hegöi lala wame’e sumange ba nose Lowalangi. Lö ahöli dödöda da’ö! Fefu zumange andrö eluahania *
si no ihenaigö Lowalangi ba wangefa’ö horö ena’ö ohahau fefu niha ba wamaiginia, ba tola latema howu-howu hegöi fanuturu lala moroi khönia. Hiza’i, Hofini ba Fineha ladönisi gere bö’ö wemanga sumange si fao falömangila huku.13, 14. (a) Hewisa wa tola tedönisi niha satulö tödö wamalua si lö sökhi ba nose Lowalangi? (b) Hewisa wa’akala Eli ba wa’asatua hegöi ba wa’a’erenia?
13 Khalaigö Zamueli si bohou ebua me ifehaga hörönia wamaigi amuata falömangila huku ba lö sotegu ya’ira. Hawa’ato niha ni’ilania—si numana, niha si so fangide-ngide’ö, ba nifakao-kao—la’ondrasi nose Lowalangi ni’amoni’ö ba manötöna ira wa lasöndra wondrara dödö ba fa’aro wamati, hiza’i mangawuli ira si fao fa’abua gölö, fa’afökhö dödö, ba te’obousi ira? Hewisa dödönia me i’ila Hofini ba Fineha la’osiwawöi goroisa Yehowa sanandrösa ba wohorö, ya’ia me lahoröni ösa ndra alawe sangai halöwö ba nose Lowalangi? (I Zam. 2:22) Te manötöna ia khö Geli wa tola i’atulö’ö zalua andre.
Tatu manö lö sökhi dödö Zamueli wamaigi fa’alösökhi nono Eli
14 Tefaudu sibai na Eli zangatulö’ö salua andre. Börö me ere sebua ia, ya’ia zonorogö tödö na so zalua ba nose Lowalangi. Börö me satua ia, mo’ömö ia wame’e fotu ba ndraononia. Mendrua manö, lafakao mbotora iraononia hegöi niha sato ba soi da’ö. Hiza’i, no kala Eli ba zi dombua ngawalö andre, fa’asatua hegöi fa’a’erenia. No ikaohasi wame’e fotu ba ndraononia. (Baso I Zamueli 2:23-25.) Hiza’i, moguna wotu sabölö abe’e ba ndraononia. No lafalua horö sebua si möi börö wa’amate!
15. Hadia wamangelama sabe’e niwa’ö Yehowa khö Eli, ba hewisa wanema’önia?
15 Horö nifaluara tenga itugu alö irege ifatenge ”genoninia” Yehowa khö Geli, sama’ele’ö si lö mufatunö töi ba wama’ema turia wanguhuku sabe’e. Imane Yehowa khö Eli, ”Ba no ebua dödöu ba ndraonou andrö, moroi ba wa’ebua dödöu khögu.” Börö da’ö, ifa’ele’ö Lowalangi wa mate nono Eli ha samuza ba zi ma’ökhö, ba ösi nomo Eli latörö wa’atosasa, aheta khöra halöwö fa’a’ere. Hadia tobali famangelama da’a ba nösi nomonia? Lö itutunö waö-waönia wa so khöra wamalalini era-era.—I Zam. 2:27–3:1.
16. (a) Hadia nibasoda sanandrösa ba wa’tedou Zamueli si bohou ebua? (b) Hadia tobali fangomuso dödöu da’a? Tutunö.
I Zamueli 2:18, mamati Zamueli ’wangai halöwö föna Yehowa’ me iraono ia. Hewa’ae awuyu ndröfinia, i’ofönai’ö wangai halöwö Lowalangi ba wa’aurinia. Ba ayati 21, so zomuso dödöda fombaso, ”Ba ononia Samueli, ba si tedou-dou ba da’ö, khö Yehowa.” Me itugu ebua ia, monönö wa’aro wahuwusania khö Namania ba zorugo. Börö wa’ahatönia khö Yehowa, telumö’ö ia moroi ba ngawalö zi lö sökhi.
16 Hadia fao göi Zamueli si bohou ebua ba wamalua amuata si lö sökhi andre? Ba huhuo sambö baga andre, fataria ta’ila haga side-ide, turia si sökhi sanandrösa ba wa’atedou Zamueli. Törö tödöu niwa’ö17, 18. (a) Hewisa nono matua niha Keriso si bohou ebua wolo’öra duma-duma Zamueli na alua zi lö sökhi? (b) Hadia zangoroma’ö wa no ifili lala satulö Samueli?
17 Tola manö iwa’ö Samueli, na ono gere sebua manö lafalua horö, na simanö tola göi ufalua zomasido. Hiza’i, fa’alösökhi niha bö’ö, mendrua manö niha sangai halöwö khö Lowalangi, tenga da’ö dani ba wamalua horö. Iada’a, ato nono matua niha Keriso zolo’ö duma-duma Zamueli ba ’itugu tedou ira börö me fao khöra Yehowa’, hewa’ae lö sökhi gamuata niha ba zi fasui ya’ira.
18 Hadia lua-luania khö Zamueli me i’o’ö li Yehowa? Tabaso, ”Ba ono matua andrö, Samueli, ba itugu tedou ba itugu falukha ia wa’ebua dödö Yehowa ba fa’ebua dödö niha.” (I Zam. 2:26) La’omasi’ö Zamueli, si lö’ö-lö’önia niha somasi ia bua gera-era. I’omasi’ö göi ia Yehowa börö wamatinia. Aboto göi ba dödö Zamueli wa ihori fefu zi lö sökhi Lowalangi ba Zilo, hewa’ae manofu-nofu ia hawa’ara alua da’ö. Samuza inötö me bongi, so wanema li ba zinofu andrö.
”Hede, Irongo Enoniu”
19, 20. (a) Tutunö hadia zalua khö Zamueli me bongi ba nose Lowalangi. (b) Hewisa wa i’ila manö Samueli hezo moroi zi hede da’ö, ba hewisa gamuatania khö Eli?
19 Me luo da’ö arakhagö moluo hiza’i ogömi nasa; lö si mate haga wandru bakha ba tendra. Ba zi lö nini-nini, irongo Samueli zogaoni töinia. Iwalingagö Eli, niha satua ba arakhagö balunö. ”Fagohi” Zamueli möi ia khö ndra matua satua andrö. Hadia tola ökhalaigö Zamueli me fagohi ia lö sandrala wangondrasi Eli, ma so ni’andrönia tolo? Sindruhu-ndruhu adöni dödöda gamuata Zamueli khö Eli, ifosumange si fao fa’asökhi dödö. Hewa’ae oya zala nifalua Eli, lö nasa si tebulö wa ere sebua ia khö Yehowa.—I Zam. 3:2-5.
20 Maoso Zamueli ba wanusugi Eli, imane, ”Ya’e ndra’odo, me no mu’ao’ö khögu.” Ifatunö Eli wa lö nikaoninia ba iwa’ö, fuli förö. Hiza’i, ifuli zui terongo li da’ö, ba alua zui! I’ila Eli hadia zalua sindruhunia. Ha fawaraö ibe’e gangilata me luo da’ö Yehowa mazui fama’ele’ö ba nono mbanuania, ba mu’ila hadia mbörö. Hiza’i, i’ila Eli wa ifuli fahuhuo Yehowa—iada’a khö nono da’ö! Ifuli iwa’ö khö Zamueli wemörö ba ifomaha hewisa wanema li na so zi hede simane da’ö. Igo’ö Samueli. Lö ara aefa da’ö, irongo li si’ao zui khönia, ”He Samueli! He Samueli!” Itema li ono da’ö, ”Hede, irongo enoniu!”—I Zam. 3:1, 5-10.
21. Hewisa wamondro-ndrongoda li Yehowa iada’a, ba hana wa moguna?
21 Ba gafuriata, so genoni Yehowa ba Zilo samondrongo linia. Da’ö zi to’ölö ifalua Samueli ba wa’aurinia. Hadia simane da’ö göi ndra’ugö? Tenga balazi so li si’ao nirongoda ba zi bongi. Iada’a, tola tawa’ö lö aetu tarongo li Lowalangi. Fefu da’ö so ba Zura Ni’amoni’ö, Taromalinia. Na tafondro-ndrongo ba ta’o’ö, itugu monönö wamatida. Da’ö göi zalua khö Zamueli.
Hewa’ae ata’u, mamati Zamueli ba ifa’ema duria wanguhuku khö Eli niwa’ö Yehowa
22, 23. (a) Hewisa wa alua goroisa nifa’ema Zamueli hewa’ae ata’u ia wama’ema ba wamobörö? (b) Hewisa wa tola itugu tehöngö Zamueli?
22 Bongi da’ö ba Zilo, no tobali bongi si tebai i’olifugö Samueli ba wa’aurinia, börö me ba da’ö ibörögö wahuwusa si sökhi khö Yehowa, tobali ia sama’ele’ö ba enoni Lowalangi. Ba wamobörö, ata’u ia wama’ema oroisa Yehowa khö Eli, börö me da’ö gangombakhata safuria ba nösi nomo Eli wa lö aratö alua nifa’ele’ö Lowalangi. I’oigö dödönia Samueli enö’ö lö ata’u ia ba itema’ö wanguhuku da’ö Eli si fao fangide-ngide’ö. Lö ara aefa da’ö, alua fefu niwa’ö Yehowa: fasuwö ndraono Gizara’eli khö I Zam. 3:10-18; 4:1-18.
ndrawa Wilisiti, mate Hofini ba Fineha ba zi ma’ökhö da’ö, ba mate göi Eli me irongo no la’oloi’ö Dawöla Yehowa.—23 Hiza’i, itugu tehöngö Zamueli me no tobali sama’ele’ö ia. Tabaso waö-waönia, ”Ba manöi Zamueli, ba itolo ia Yehowa,” inönö nasa wangombakha, lö zi lö itörö nifa’ele’ö Yehowa khö Zamueli.—Baso I Zamueli 3:19.
”Ba Mangandrö Zamueli khö Yehowa”
24. Hadia gangetula ndraono Gizara’eli ba gafuriata, ba hana wa tobali horö sebua da’ö?
24 Hadia la’o’ö iraono Gizara’eli niwa’ö Zamueli ba tobali ira niha samati si so fa’alowalangi? Lö’ö. Ba gafuriata, lahalö gangetula wa lö omasi ira na ha samösa zama’ele’ö sanguhuku ya’ira. Omasi ira simane soi bö’ö nifatörö zi samösa razo. I’o’ö niwa’öra andrö Samueli, simane niwa’ö Yehowa. Hiza’i, i’ombakha’ö ua sakali hawa’ebua horö nifaluara. Nitimbagöra tenga niha, Yehowa samösa! Andrö, ikaoni fefu soi da’ö ba Giligala.
Mangandrö Zamueli si fao famati, ba ifondro-ndrongo wangandrönia Yehowa ibe’e weʼugu mbanua ba teu
25, 26. Hewisa Zamueli si no atua wanolo soinia ba Giligala irege la’ila hawa’ebua horö nifaluara khö Yehowa?
25 Datatohugö wamaigi hewisa wa’ata’u ndraono Gizara’eli me fahuhuo Zamueli ba Giligala. Ba da’ö, ifasugi ba dödöra hewisa wa’alöfaröinia safönu famati hewa’ae no atua ia. Tabaso aefa da’ö, ”Ba mangandrö Zamueli khö Yehowa.” I’andrö khö Yehowa we’ugu mbanua ba teu.—I Zam. 12:17, 18.
26 Fe’ugu mbanua ba teu? Ba mbaŵa lökhö? Lö irai alua da’ö ba zilalö! Lö anau gölö zi lö faduhu tödö mazui sango’aya. Ba zi lö mudöna-döna, ogömi mbanua tebalu lawuo. Itörini angi gandru ba nowi. Morata gari mbanua ba afökhö dalinga zamondrongo. Alua deu. Hewisa niha sato? ”Ba ata’u sibai niha sato Yehowa ba Samueli.” Awena la’ila hawa’ebua horö nifaluara.—I Zam. 12:18, 19.
27. Hewisa dödö Yehowa ba niha solo’ö famati Zamueli?
27 Tenga Samueli, hiza’i Lowalanginia, Yehowa zamarou tödö niha samadaö andrö. I’otarai me awuyu irugi atua ia, lö tebulö wamati Zamueli khö Lowalanginia. Ibe’e luonia Yehowa. Irugi iada’a, lö si tebulö Yehowa. Itolo niha solo’ö famati Zamueli.
^ par. 5 So mbu’usa li ba niha Nazir, tebai labadu duo ba laguti mbura. Ato niha si fawu’u li simane da’ö ha ba zi sabata, hiza’i so göi zi tobali Nazir sandrohu fa’aurira, simane Simesono, Samueli ba Yohane Samayagö Idanö.
^ par. 9 Osali ni’amoni’ö ya’ia da’ö tomosa si öfa sagi, hulö tendra sebolo nifodöla-döla faoma eu. Hiza’i, tefazökhi ia moroi ba ngawalö zi sökhi—uli asu nasi, nukha nisoso si sökhi, ba eu si maha ni’olohuni ana’a faoma firö. Osali ni’amoni’ö andrö lafedadao ba newali si öfa sagi, ba so naha wanunu sumange sebua si sökhi ba newali andrö. Ba gafuriata, lafazökhi mbate’e ba zinga nose Lowalangi andrö soguna khö ndra ere. Fazambua mbate’e andrö te ba da’ö mörö Zamueli.
^ par. 12 Dombua duma-duma gamuata falömangila huku nifaluara. Si oföna, no izara-zara wanutunö Oroisa Lowalangi hadia dana khö zi samösa ere moroi ba zumange nitaba. (V Moz. 18:3) Hiza’i ba nose Lowalangi, fabö’ö nifalua ndra ere si lö sökhi andrö. Lafatenge ngoni-ngonira ba wanaru’ö garafu sebua bawu ba mbalanga wondrino, ba lahalö tana khöra gofu hadia manö zi tefahö ba garafu andrö! Si dua, na tohare niha solohe sumange nitunu, ira ere si lö sökhi andrö lafatenge ngoni-ngonira ba wameta’u niha same’e sumange, lahalö nagole sataha fatua lö mube’e dawönia khö Yehowa.—III Moz. 3:3-5; I Zam. 2:13-17.