1-3. (a) Hewisa dödö Gesitera me ahatö irugi dadaoma wa’asalawa wo’omonia? (b) Hadia nifalua razo me i’ondrasi ia Esitera?

IDA’I-DA’I wofanö Esitera numalö ba gödo, ba mo’ugu-ugu dödönia. Khalaigö me lö nini-nini ba gödo Persia sebua andrö ba Zusa. Balazi wa lö nini-nini, irongo-rongo Esitera koko-koko gahenia hegöi ruru-ruru mbarunia. Tebai mangoloi dödönia ba lakhömi wa’ebua gödo andrö, döla-dölania segesolo, hegöi fa’abaga-baga narö lote si no lafobunga-bunga moroi ba geu eresi nihalö ba Libano. I’osambua’ö dödönia khö ndra matua si dadao ba gurusi wa’asalawa, sotatugöi fa’auri ba fa’amatenia.

² Me itugu ahatö Gesitera, ihaogö itöngö ia razo ba i’oro’ö zi’o wa’asalawania khö Gesitera. Me ifazawa zi’onia andrö, eluahania fa’auri Gesitera, da’ö dandra wa i’olifugö zala sawena ifalua Esitera ya’ia da’ö i’ondrasi razo hewa’ae lö mukaoni ia. Me ofeta Gesitera föna razo, i’oro’ö dangania ba ibabaya mbalö zi’o ana’a andrö tandra wangandrö saohagölö.​—Gesi. 5:1, 2. 

³ Fefu zanandrösa khö Razo Ahasiwero da’ö zangoroma’ö fa’akayo hegöi kuasonia fondrege zebua. Baru sebua nifake razo-razo Persia me luo da’ö, bölinia iada’a ngaotu zuta dolar AS. Hiza’i, i’ila Esitera wa’omasi moroi ba hörö wa’omonia; sindruhu-ndruhu wa i’omasi’ö Gesitera molo’ö si to’ölö ifalua. Imane, ”Hadia khöu, fo’omo razo, Esitera, hadia ni’andröu? He irege zi matonga gamatöröwagu, ba latehe khöu!”​—Gesi. 5:3.

4. Hadia manö nasa wanaisi salua khö Gesitera?

⁴ No iforoma’ö wamati ba fa’abarani sahöli dödöda Esitera; möi i’ondrasi razo ba wolumö’ö soinia moroi ba wamunu si no mu’era-era. Ndrege da’a, mofozu nifaluania, hiza’i so nasa wanaisi sabölö ebua. Moguna ifaduhu’ö ba dödö razo sasiliawa andre wa sanuturu lala sabe’e dödönia, niha si lö sökhi solimo ya’ia ba wangohori soi Gesitera. Hadia nifaluania ena’ö faduhu dödö razo, ba hadia wamaha’ö khöda moroi ba wamatinia?

5, 6. (a) Hewisa Gesitera wamalua goi-goi nisura ba Zangombakha 3:1, 7? (b) Hewisa Gesitera ba wangoroma’ö fa’atua-tua me i’ondrasi wo’omonia?

⁵ Si bagania, hadia i’ombakha’ö fefu zabu dödönia Esitera ba ginötö da’ö, föna ndra salawa ba gödo razo? Na ilau da’ö tola aila razo ba tebe’e ginötö khö zanuturu lala andrö khönia sotöi Hamano fabu’a ia ba niböbögö khönia niwa’ö Gesitera. Tobali, hadia nifalua Gesitera? Hauga abad me föna, itema geheha Razo Selomo ba wanura, ”Fefu hadia ia, ba so ginötö, . . . falöhede-hede ba fehede.” (Zango. 3:1, 7) Datakhalaigö hewisa zatua Gesitera sotöi Morodokhai wamaha’önia Esitera ba goi-goi da’a me itugu ebua-bua ia. Tatu aboto ba dödö Gesitera wa moguna mufili ginötö si tefaudu na fahuhuo.

⁶ Imane Esitera, ”Na atulö khö razo, ba yamöi manga khögu ma’ökhö, awö Hamano, ba gö andrö, si no u’asiwai khönia.” (Gesi. 5:4) Fao dödö razo ba lakaoni Hamano. Hadia aboto ba dödöu hewisa wa’atua-tua Gesitera? Izago ena’ö lö aila wo’omonia  ba ifaigi ginötö si tefaudu ba wanutunö sabu dödönia.​—Baso Gamaedola 10:19.

7, 8. Hewisa gowasa si oföna nifalua Gesitera, ba hana wa lö i’anemai fahuhuo ia khö razo?

⁷ Lö aombö dödöda, ihaogö ifa’anö gö andrö Esitera, ifaigi ena’ö tefaudu ba zomasi wo’omonia. Ihenaigö agu si sökhi göi ena’ö owua-wua dödöra. (Zin. 104:15) Omasi Ahasiwero gowasa da’ö, ba ifuli isofu khö Gesitera hadia ni’andrönia. Hadia da’a ginötö khö Gesitera wahuhuosa?

⁸ Molo’ö Esitera, tenga. Ikaoni razo hegöi Hamano ena’ö möi ira ba gowasa si mendrua, mahemolunia. (Gesi. 5:7, 8) Hana wa ibaloi ginötö? Törö tödöu, edöna labunu fefu soinia börö goroisa si no mu’ombakha’ö. Tobali, börö me ebua mböli ndro niha, i’alui ginötö si tefaudu Esitera. Andrö, ibaloi ginötö si tefaudu zui ba wangoroma’ö wa ifosumange wo’omonia ba i’omasi’ö.

9. Hawa’ebua mböli wa’ebolo dödö, ba hewisa wolo’öda duma-duma Gesitera?

⁹ Fa’ebolo dödö ha fawaraö so ba ebua mböli. Hewa’ae lö  sökhi-sökhi dödö Gesitera ba edöna itutunö zi so ba dödönia, ibaloi ginötö si tefaudu ba wahuhuosa. Oya zi tobali famaha’ö khöda, börö me no irai ta’ila zala sinangea mu’atulö’ö. Na ta’odödögö ena’ö faduhu dödö zi samösa niha sebua faka ba wo’adölö’ö amadöniwa, moguna ta’o’ö Gesitera ba tabaloi ginötö. Imane ba Gamaedola 25:15, ”Fa’ebolo dödö wangai dödö zanguhuku, ba famatö döla lela si lö fönu.” Na tabaloi ginötö si tefaudu ba tahaogö wahuhuosa, fanandraigö sabe’e si hulö döla, tola afatö, simane nifalua Gesitera. Hadia Yehowa, Lowalangi Gesitera, ifahowu’ö wa’ebolo dödö hegöi fa’atua-tuania?

10, 11. Hana wa fabö’ö dödö Hamano me iröi gowasa si oföna, ba hadia niforege wo’omonia hegöi ira awönia ena’ö ifalua?

¹⁰ Fa’ebolo dödö Gesitera da’ö zamokai lala ba ngawalö zalua sahöli-höli dödö. Mangawuli Hamano ba gowasa siföföna, ”omuso dödönia ba lö sabu dödönia hadia ia” börö me omasi  razo hegöi ratu khönia. Hiza’i, me itörö Hamano golayama tanö baero ba gödo, i’ila Morodokhai, niha Yahudi si lö manuhi tanö fönania. Simane ni’ilada ba faza silalö, wa lö ituhi danö Morodokhai tenga börö me lö i’osinangegö Hamano, hiza’i börö me itegu ia tödönia side-ide hegöi famosumangenia Lowalangi Yehowa. Lua-luania ”mofönu sibai Hamano”.​—Gesi. 5:9.

¹¹ Me ifatunö Hamano khö wo’omonia hegöi ba zi fahuwu khönia me no te’ailasi ia, laforege khönia wamazökhi gatunga, kira-kira 20 meter wa’alawa, ba i’andrö khö razo ena’ö itehegö lagatu Morodokhai. Fao dödö Hamano ba gera-erara andrö ba gösö ifalua.​—Gesi. 5:12-14.

12. Hana wa i’andrö razo ena’ö labaso waö-waö zalua ba soinia, ba hadia ni’ilania ba da’ö?

¹² Bongi da’ö, lö sökhi-sökhi dödö razo. Imane Sura Ni’amoni’ö, ”Lö alau hörö razo”, börö da’ö i’andrö ena’ö labaso khönia waö-waö zalua ba soinia. Ba waö-waö da’ö no tesura me so zedöna mamunu Ahasiwero. Itörö tödönia zalua andrö; no lara’u ba lahuku niha sedöna mamunu ya’ia. Hiza’i, hewisa niha sangombakha famunu razo andre mböröta—Morodokhai? Tokea razo, ba manofu ia hadia zumange si no labe’e khö Morodokhai. Fanema linia? Lö nibe’e khönia hadia ia.​—Baso Gesitera 6:1-3.

13, 14. (a) Hewisa wa ibörögö lö sökhi zalua khö Hamano? (b) Hadia niwa’ö wo’omo Hamano hegöi si fahuwu khönia?

¹³ Afatö dödö razo, isofu haniha zanolo ya’ia ba wa’olifunia andrö. Haniha na tenga Hamano, sahulö tohare ba gödo razo. Te lö khönia fombaloi ba wanguma’ö khö razo ena’ö itehegö lahuku Morodokhai. Hiza’i, fatua lö iwa’ö da’ö isofu khönia razo hewisa lala ba wamosumange niha somasi ia. Iwalingagö ya’ia Hamano. Börö da’ö, i’anga-anga Hamano lala wamosumange fondrege zebua: Be’e khö ndra matua da’ö mbaru sebua ba wa’arazo. Aefa da’ö, farou samösa pejabat sebua wolohe ya’ia wamasui Zusa si fao kudo razo, ba mu’ombakha’ö wehede famosumange föna niha sato. Khalaigö atö nidanö mbawa Hamano me irongo wa niha nifosumange andrö Morodokhai! Ba, haniha nituyu razo wangombakha fehede famosumange nibe’e khö Morodokhai? Hamano!​—Gesi. 6:4-10.

¹⁴ Abua gölö Hamano wamalua halöwö sogoro ia andrö, ba gösö ilau mofanö fao fekökö-kökö. Iwa’ö khönia fo’omonia hegöi si fahuwu khönia wa mo’alama da’a; kala dania ia wolawa Morodokhai niha Yahudi andrö.​—Gesi. 6:12, 13.

15. (a) Hadia mbua wa’ebolo dödö Gesitera? (b) Hana wa sökhi na taforoma’ö gamuata ’fanötöna’?

 ¹⁵ Börö me ibaloi saharitö Esitera wangombakha angandröwania khö razo, fakhamö i’anga-anga Hamano wamosumange si möi fangailania samösa. Tola manö börö Lowalangi Yehowa wa lö i’ila mörö razo. (Gamd. 21:1) Andrö lö ahöli dödöda me ifarou ita Taromali Lowalangi ba wangoroma’ö ’fanötöna’! (Baso Mikha 7:7.) Na tabalazigö Lowalangi, ta’ila wa abölö sökhi lala si’otarai khönia moroi ba ni’era-erada samösa.

16, 17. (a) Hawa’ara irugi ’inötö khö Gesitera ba wehede’? (b) Hana wa fabö’ö Gesitera moroi khö Wasi, fo’omo razo si oföna?

¹⁶ Lö sa’ae itandraigö Esitera wa’ebolo dödö razo; ba gowasa si mendrua, hasambalö i’ombakha’ö fefu. Hiza’i, hewisa wamaluania? Ibe’e khönia ginötö razo; ifuli isofu hadia gangandröwa Gesitera. (Gesi. 7:2) Iada’a irugi ’inötö ba wehede’.

¹⁷ Tola takhalaigö me mangandrö Gesitera bakha ba dödönia, aefa da’ö imane, ”Na no falukhado wa’ebua dödö wamaigiu, ya’ugö, razo, ba na atulö khö razo, ba alakha la’orifi ndra’o, börö wangandrögu andre, ba he iwama, börö zomasido andrö.” (Gesi. 7:3) Faigi atö si oföna ifaduhu’ö ba dödö razo wa i’osinangegö gangetula nihalö razo. Fabö’ö sibai Gesitera moroi khö Wasi, si no irai tobali ratu, sangailasi fo’omonia! (Gesi. 1:10-12) Baero da’ö, lö isalaikö razo me no ifaduhusi tödö Hamano. Ha da’ö ni’andrö Gesitera ena’ö ilumö’ö ia razo moroi ba wa’amate.

18. Hewisa wanutunö Gesitera abula dödönia khö razo?

 ¹⁸ Tatu tokea dödö razo ba gangandröwa da’ö. Haniha zi barani mama’ala ratunia? Itohugö Esitera, ”Noa sa mu’amawa ndra’aga, ya’odo andre ba iwama, ba wangohori ya’aga, ba wamunu, ba wamakiko. Na ni’amawa sawuyu ira matua ba sawuyu ira alawe na atö ndra’aga, ba lö hede-hedegu ena’ö; tenga sa sinangea nuduma andrö, wa te’ala razo ibe’e.” (Gesi. 7:4) Faigi atö, lö ibini’ö Esitera wanutunö abula dödönia, hiza’i inönö göi wanguma’ö wa lö hede-hedenia na fangosawuyu nifalua khöra. Tobali, na lö ifatunö Esitera da’a, alua wa’amate niha soya si tobali fa’arugi khö razo.

19. Hadia wamaha’ö nihalöda khö Gesitera sanandrösa ba wondrönisi tödö niha?

¹⁹ Nifalua Gesitera tobali duma-duma khöda ba wondrönisi tödö niha. Na samuza inötö ötutunö gabula dödöu ba niha ni’omasi’öu mazui khö ndra samatörö, tetolo ndra’ugö na so khöu wa’ebolo dödö, famosumange, ba lö famini tödö simane Esitera.​—Gamd. 16:21, 23.

20, 21. (a) Hewisa wangombakha Gesitera fa’alösökhi Hamano, ba hadia nifalua razo? (b) Hadia nifalua Hamano me no oroma wa si manga mböli sonekhe ia?

²⁰ I’andrö Ahasiwero ena’ö latutunö khönia, ”Haniha da’ö ba heza so, sama’amöi ba dödönia folau da’ö?” I’anemai ituturu Esitera niha andrö ba imane, ”Uduma andrö si fatiu tödö khöma, ba ya’ia Hamano andre, si lö sökhi!” Izumaigö lö nini-nini. Ata’u Hamano. Khalaigö me oyo mbawa razo ba mofönu ia börö  me awena i’ila wa niha sabe’e dödönia, da’ö zangakali ya’ia ba woteka sura si möi fama’ala wo’omo ni’omasi’önia! Gösö möi razo baero ba kabu mbunga ba wangai fa’ahono dödö.​—Gesi. 7:5-7.

²¹ Me no oroma zi manga mböli sonekhe andre, mangalulu Hamano ba gahe ratu. Me mangawuli yomo razo, i’ila Hamano ba gaso dadaoma Gesitera mangandrö-ngandrö tolo, mofönu sibai ia ba ifobahulu Hamano wa edöna ihoröni ratu yomo ba nomo razo. Amaedola dandra wa’amate da’a khö Hamano. La’ohe ia baero, ba labalugö mbawania. Aefa da’ö, samösa genoni razo sangombakha wa no ifazökhi gatunga salawa Hamano famunu Morodokhai. I’anemai ifaretakö Ahasiwero ena’ö latawi Hamano ba da’ö.​—Gesi. 7:8-10.

22. Hewisa duma-duma Gesitera wamaha’önia ya’ita ena’ö böi afatö dödöda, böi so wa’aombö dödö, mazui taya wamatida?

²² Ba gulidanö si lö fa’atulö andre, tawalinga lö irai so wa’atulö. Hadia no irai örasoi zimane da’ö? Lö irai afatö dödö Gesitera, lö irai awuwu ia, ba lö göi si taya wamatinia. Me irugi inötö, barani ia fahuhuo ba wango’awögö sindruhu, ba aefa da’ö itou’ö ba danga Yehowa. Datafalua göi zimane da’ö! Lö irai tebulö Yehowa irugi iada’a. Tola alau ibe’e niha si lö sökhi ba dandrawa nilaura samösa simane Hamano.​—Baso Zinunö 7:12-17.

23. (a) Hadia zulö nibe’e razo khö Morodokhai hegöi khö Gesitera? (b) Hewisa wama’ele’ö safuria moroi khö Yakobo alua khö Mbeniyami? (Faigi kotak ” Fama’ele’ö si No Alua”.)

²³ Ba gafuriata, aboto ba dödö razo haniha Morodokhai andrö sindruhunia—tenga ha ilumö’ö razo moroi ba niha sedöna mamunu ya’ia, hiza’i ama sangebua Esitera. Ituyu ia Ahasiwero tobali perdana menteri fogati Hamano. Ibe’e khö Gesitera nomo Hamano awö gokhötania soya sibai ba Morodokhai zi tobali satua baomo.​—Gesi. 8:1, 2.

24, 25. (a) Hana wa lö ahono nasa dödö Gesitera hewa’ae no oroma gamuata Hamano? (b) Hewisa Gesitera ba wombelegö nosonia zui?

 ²⁴ Iada’a, me no aefa ba de’ala Gesitera hegöi Morodokhai, hadia ahono dödönia? Tola manö, na ha fa’aurinia i’era-era. Me luo da’ö, fareta Hamano ba wamunu niha Yahudi no mufa’ohe’ö ba zi sagörö öri andrö. No ifazaumba dahö-dahö Hamano, mazui Wuri—te simane faetasa—ba wotatugöi inötö si tefaudu ba wamunu niha sato. (Gesi. 9:24-26) Hewa’ae hauga waŵatö awena alua, hiza’i hasambalö a’ozu. Hadia tola latimbagö wama’ala andrö?

²⁵ Börö me tenga ha fa’aurinia ni’era-era Gesitera, ifuli ibelegö nosonia ba wangondrasi razo hewa’ae lö mukaoni ia. Iada’a, mege-ege ia börö soinia, i’andrö khö razo ena’ö lö a’ozu fareta sata’u ia andrö. Hiza’i, huku nibe’e ba döi razo Persia tebai mufawu’a. (Dan. 6:13, 16) Andrö, itehegö khö Gesitera hegöi Morodokhai wame’e huku si bohou. Lafa’ohe’ö misa gangombakhata si mendrua, ena’ö lahonogö ira fefu niha Yahudi. Möi denge-tenge ba zi sagörö öri andrö, la’ohe duria si sökhi ba niha Yahudi. Iada’a, so dötönaföra. (Gesi. 8:3-16) Tola takhalaigö niha Yahudi ba zi sagörö öri andrö me lafa’anö fakakera ba we’amöi fasuwö. Na lö fareta si bohou da’a, lö tola lafalua da’ö. Hiza’i, sabölö moguna, hadia fao ”Yehowa ngahönö” ba nono mbanuania?​—I Zam. 17:45.

26, 27. (a) Hawa’ebua wa’amöna nibe’e Yehowa ba nono mbanuania ba wolawa udura? (b) Hadia wama’ele’ö salua ba wa’amate nono Hamano?

 ²⁶ Me no irugi inötö si no mutatugöi andrö, no lafa’anö ira ono mbanua Lowalangi. Fa’awö göi khöra zohalöwö ba gödo Persia, börö me no tehöngö Morodokhai niha Yahudi si no tobali perdana menteri si bohou. Ibe’e wa’amöna ba nono mbanuania Yehowa. Tatu ilumö’ö nono mbanuania moroi ba wa’amate, lö zi lö kala nudura fefu. *—Gesi. 9:1-6.

²⁷ Baero da’ö, lö ahono dödö Morodokhai tobali satua baomo ba nomo Hamano na lö mubunu ndraononia si dafulu ono matua si lö sökhi. Andrö labunu ira. (Gesi. 9:7-10) Börö da’ö, alua wama’ele’ö Zura Ni’amoni’ö sanandrösa ba wangohori niha Gamaleki si no mama’uduni ono mbanua Lowalangi. (V Moz. 25:17-19) Te fao ndraono Hamano ba gotalua niha safuria moroi ba soi ni’elifi andrö.

28, 29. (a) Hana wa omasi Yehowa na fao Gesitera hegöi ono mbanuania ba wasuwöta? (b) Hana wa tobali howu-howu khöda duma-duma Gesitera iada’a?

²⁸ Hewa’ae nasa awuyu-wuyu, so noro sebua si tebai itimbagö Esitera—fao ia göi wotatugöi so’amakhaita ba wasuwöta hegöi famunu. Tatu abua da’ö. Hiza’i, ohitö dödö Yehowa ena’ö telumö’ö nono mbanuania moroi ba wa’atekiko, börö me no itatugöi wa moroi ba soi Gizara’eli tumbu Mesia nifabu’u, si tobali fanötöna niha ba zi sagörö ulidanö! (I Moz. 22:18) Aboto ba dödö nono mbanua Lowalangi iada’a wa Mesia, Yesu, no möi ba gulidanö, itegu zolo’ö khönia ena’ö böi fao ira ba wasuwöta.​—Mat. 26:52.

²⁹ Hewa’ae simanö, fao niha Keriso ba wasuwöta ba wamati; iforege Satana wamakiko famatida khö Lowalangi Yehowa. (Baso II Korindro 10:3, 4.) Duma-duma Gesitera no sambua howu-howu khöda iada’a! Simane ya’ia, dataforoma’ö wamati ba fa’atua-tua hegöi fa’ebolo dödö na fahuhuo ita ba niha bö’ö, lö ata’u, ba ta’o’awögö nono mbanua Lowalangi, böi ha tana khöda ta’alui.