1, 2. Hadia zahöli-höli dödö salua ba wa’auri Gelia?

FAGOHI Gelia itörö dalu deu me arakhagö bongi. Aröu nasa lala itörö awena irugi Yezere’eli, mendrua manö me no atua ia. Hiza’i, lö irasoi wa’amarase ba wagohisa, börö me ikhamö ia ”tanga Yehowa”. Lö irai irasoi wa’abölö simane da’a. Khalaigö atö, awena sibai ihulö gureta Razo Gahabi nidöni kudo nifili ba sagabölö!​—Baso I Razo 18:46.

² Iada’a, toröi furi Razo Gahabi ba aröu nasa danö nitörö Gelia. Khalaigö me ifakifu-kifu hörönia Elia börö deu, ilau fagohi ba ikhalaigö zahöli-höli dödö salua ba wa’aurinia. Lö aombö dödöda, da’a ngaluo wa’amöna sebua khö Lowalangi Gelia sotöi Yehowa, hegöi ba wamosumange satulö. No aröu furi italu’i Hili Garemeli si no musindro ba tobini ba lawuo saitö. Ba da’ö i’oguna’ö ia Yehowa wokalaisi niha samosumange Ba’ali, iforoma’ö dandra sahöli-höli dödö. Ngaotu zama’ele’ö si lö sökhi ba sofaya khö Mba’ali sinangea tehori. Aefa da’ö, mangandrö Gelia khö Yehowa ena’ö tebato mbaŵa lökhö salua ba zi tölu fakhe a matonga ba danöra. Andrö wa moteu!​—I Raz. 18:18-45.

3, 4. (a) Hana wa itugu tedou wa’aro dödö Gelia me fagohi ia numalö ba Yezere’eli? (b) Hadia wanofu nifatunöda?

³ Me fagohi Gelia wanörö talu deu numalö ba Yezere’eli, fa’aröunia 30 kilometer, tatu itugu tedou wa’aro dödönia. Tola manö iwa’ö tödönia Elia wa da’a ginötö nibalo-baloinia. Tatu mangesa dödö Gahabi! Me no oya ni’ila Gahabi, lö tola lö’ö iröi wanömba Ba’ali; lö itehegö sa’ae ifatörö ia ratunia sotöi Izebela, ba ibato wamakao ono mbanua Yehowa.

⁴ Sindruhusa, na so zalua si tefaudu ba zomasi ita, tatu itugu tedou wa’aro dödöda. Takhalaigö wa itugu sökhi wa’aurida ba tola manö tawa’ö, lö sa’ae abula dödöda. Andrö lö ahöli-höli dödöda na simane da’ö gera-era Gelia, börö me ”simane amuatada gamuatania”. (Yak. 5:17) Sindruhunia, lö sawai nasa gabula dödö Gelia. Ha ba zi hauga za, ata’u ia ba awuwu wa’abölönia  irege omasi ia mate. Hadia zalua ba hewisa Yehowa wanolo sama’ele’ö andre ena’ö ifuli so khönia wamati ba fa’abarani? Datafaigi.

5. Me no aefa zalua ba Hili Garemeli, hadia ifaha’ö ia Ahabi ba wamosumange Yehowa ba hewisa wa ta’ila?

⁵ Me ofeta Gahabi ba gödonia ba Yezere’eli, hadia no mangesa dödönia? Tabaso, ”Ba i’ombakha’ö khö Gizebela Ahabi fefu nilau Gelia, awö wa no ahori ibunu si’öli zama’ele’ö andrö.” (I Raz. 19:1) Faigi atö waö-waönia sanandrösa ba zalua me luo da’ö, Ahabi andrö lö itötöi döi Yehowa, Lowalangi Gelia. Molo’ö Ahabi si lö famati, tandra sahöli-höli dödö salua me luo da’ö, no nifalua niha—”nilau Gelia”. Lö ifosumange Lowalangi Yehowa. Ba hadia nifalua wo’omonia somasi fahö’ö andrö?

6. Hadia goroisa nifa’ema Gizebela khö Gelia, ba hadia geluaha goroisa da’ö?

⁶ Möi yawa ndro Gizebela! Ba wofönunia, ifa’ema goroisa khö Gelia, ”Ndra mulau khögu lowalangi andrö zomasi ira, na tenga mane wa’alaŵa luo mahemolu ufatörö ba nosou nifatörö ba noso zama’ele’ö andrö fefu.” (I Raz. 19:2) Sindruhu-ndruhu fa’amate si hokha mbuda da’a. Tola tamane, fahölu Gizebela wa mate ia na lö a’ozu ibunu Gelia ba zi ha ma’ökhö, ba wolau balö zama’ele’ö andrö khö Mba’alinia. Khalaigö atö ba dalu deu toho me bongi da’ö, tokea Gelia ba naha wemörönia si öna-öna ba Yezere’eli me irongo duria sata’u ia moroi khö ngoni-ngoni ratu. Hewisa dödönia?

7. Hadia lua-lua wameta’u Gezibela khö Gelia, ba hadia nifalua Gelia?

⁷ Na no fakhamö ikhalaigö Elia wa awai sa’ae wasuwöta ba wolawa fanömba Ba’ali, i’anemai taya dötönafönia ba ginötö da’ö. Lö tebulö fatandro Gizebela. No ato nawö Gelia nibunu börö faretania ba iada’a inötö khö Gelia. Hadia lua-luania wameta’u Gizebela khö Gelia? Imane Sura Ni’amoni’ö, ”Ata’u ia.” Hadia ikhalaigö Elia wa’amate sata’u ia ni’anga-anga Gizebela? Na da’ö manö ni’angeraigönia, lö ahöli-höli dödöda wa taya wa’abaraninia. Si no tatu, ”Ilau mofanö, ba wangorifi ya’ia”—ilau moloi.​—I Raz. 18:4; 19:3.

8. (a) Hadia gabula dödö si fagölö salua khö Gelia faoma Fetero? (b) Hadia wamaha’ö si tola tahalö moroi khö Gelia hegöi Fetero?

⁸ Tenga ha Elia zi no irai lafeta’u ba gotalua niha samati. Ara aefa da’ö, alua göi khö Wetero. Duma-dumania, samuza  inötö itolo Wetero Yesu ena’ö faoma mowaö-waö ira ba dete nidanö. Hiza’i, sinenge andrö ibörögö ’itöngö nangi’ irege taya wa’abaraninia ba ibörögö ahöndrö ia. (Baso Matai’o 14:30.) So wamaha’ö si sökhi khöda moroi ba duma-duma Wetero andre hegöi Elia. Na lö omasi ita taya wa’abaranida, böi ta’era-era manö ngawalö de’ala sata’u ita. Moguna ta’osambua’ö dödöda ba Gumbu dötönafö ba fa’abölö.

9. Tutunö hewisa döröwa Gelia ba hadia nirasoinia me ilau moloi.

⁹ Ata’u Gelia ba ilau moloi tanö miraya kira-kira 150 kilometer numalö ba Mbere-seba, banua sahatö tanö raya Yehuda. Iröi ba da’ö ngoni-ngoninia ba möi ia ba danö si mate ha ya’i-ya’ia. Ba waö-waönia imane mofanö ia ”ma’ökhö fofanö”, tola takhalaigö me mofanö ia arakhagö moluo, lö ni’ohenia gönia. Me tolazi dödönia si fao fa’ata’u, iforege wanörö lala si ka’aö hewa’ae aukhu zino. Me itugu oyo ba aekhu haga luo tanö ba gaekhula, tebai ia sa’ae. Ilau mudadao ba mbörö da’uli—ha da’ö zi tobali lumö ba danö si mate andrö.​—I Raz. 19:4.

10, 11. (a) Hadia geluaha wangandrö Gelia khö Yehowa? (b) Na ö’oguna’ö ayati si no tesura, khalaigö hewisa dödö niha samati tanö bö’ö me göna ira fa’ide-ide dödö.

¹⁰ Börö wa’afatö dödönia, mangandrö Gelia ena’ö mate ia. Imane, ”Tenga si sökhi moroi khö ndra tu’agu ndra’odo!” Aboto ba dödönia wa no tobali gawu-gawu ba töla ndra tuania ba lewatö, lö la’ila lafalua zi sökhi gofu ha’ökhö. (Zango. 9:10) Iwa’ö tödönia wa lö moguna ia sa’ae. Andrö wa mu’ao ia, ”Noa sa’ae.” Hadia guna wa’auri?

¹¹ Hadia moguna ahöli-höli dödöda na ide-ide dödö ndra matua samati andrö? Tatu manö lö’ö. No tesura ba Zura Ni’amoni’ö wa so ösa ndra matua hegöi ira alawe si lö faröi si no irai göna fangabu dödö irege omasi ira mate, duma-dumania Rebeka, Yakobo, Moze, ba Yobi.​—I Moz. 25:22; 37:35; IV Moz. 11:13-15; Yob. 14:13.

12. Na ide-ide dödöu, hewisa lala wolo’öu duma-duma Gelia?

¹² Ba ginötö andre, no so ita ba ”mbaŵa si lö sökhi”, andrö lö ahöli-höli dödöda na ato niha hegöi ono mbanua Lowalangi si lö faröi, göna ira fangabu dödö. (II Tim. 3:1) Na tolazi dödöu,  o’ö duma-duma Gelia: Tutunö nösi dödöu khö Yehowa. Böi olifu’ö, Yehowa andrö ”Lowalangi wondrara dödö”. (Baso II Korindro 1:3, 4.) Hadia irara dödö Gelia?

13, 14. (a) Hewisa wangoguna’ö Yehowa samösa mala’ika ba wangoroma’ö fa’omasinia khö zama’ele’ö sabu tödö? (b) Hana wa terara dödöda me abölö i’ila ita Yehowa hegöi si tebai tafalua?

¹³ Molo’ö ya’ugö, hewisa dödö Yehowa ba zorugo me i’ila zama’ele’ö ni’omasi’önia no ileagö ia ba mbörö da’uli ba danö si mate ba mangandrö-ngandrö fa’amate? Lö moguna tatahö-tahö. Me no mörö Gelia, ifatenge mala’ikania Yehowa. Isusugi Gelia, no ihaogö-haogö wotufa ba imane, ”Faoso, lau manga!” Maoso Gelia ba manga ia, börö me no ihenaigö gönia mala’ika andrö—kue nibogö ba idanö safusi. Hadia i’andrö saohagölö khö mala’ika andrö? Itutunö ba waö-waönia wa manga ia, ibadu nidanö, ba ifuli ilau mörö. Hadia afatö sibai dödönia irege lö omasi ia fahuhuo? Si no tatu, ifuli zui isusugi ia mala’ika andrö ba zi mendrua, te arakhagö moluo. Sakalitö, ifangaösö Gelia, ”Faoso, a göu,” aefa da’ö ibe’e wehede omasiö, ”aröu sibai nasa döröwau.”​—I Raz. 19:5-7.

¹⁴ Börö wa’aboto ba dödö si otarai Lowalangi, i’ila mala’ika andrö hezo edöna möi Gelia. I’ila göi wa afökhö döröwa Gelia na ha fa’abölönia samösa i’odaligö. Omuso dödöda me tafosumange Lowalangi sangila ohitö dödöda hegöi si tebai tafalua, si töra moroi ba wangi’ilada! (Baso Zinunö 103:13, 14.) Hewisa me no manga Gelia?

15, 16. (a) Me no itema Elia gö moroi khö Yehowa, hadia nifaluania? (b) Hana wa moguna ta’andrö saohagölö nifalua Yehowa ba wamönökhi ö wamati ba nono mbanuania iada’a?

¹⁵ Databaso, ”Ba maoso ia, manga ia ba ibadu nidanö, ba mowaö-waö ia ba wa’abölönia ba gö andrö, öfa wulu ngaluo ba öfa wulu mbongi, irugi hili Lowalangi andrö, Horebi.” (I Raz. 19:8) Fuasö Gelia öfa wulu ngaluo ba öfa wulu wongi, simane Moze te önö abad fatua lö ya’ia, hegöi Yesu arakhagö fulu abad aefa da’ö. (II Moz. 34:28; Luk. 4:1, 2) Lö taya wa’abu dödönia ba gö andrö, hiza’i abölö ia si fao tandra sahöli-höli dödö. Khalaigö atö, itörö tanö wo’anöröi tanö si mate, si lö irai latörö niha, ngaluo numalö ngaluo, migu numalö migu, arakhagö sara waŵa a matonga!

¹⁶ I’abölö’ö nono mbanuania Yehowa iada’a, tenga ba gö si fao tandra sahöli-höli dödö, hiza’i so zabölö moguna. Ihenaigö  khöra gö wamati. (Mat. 4:4) Tola abölö ita ba wamati na tafaha’ö ita sanandrösa khö Lowalangi moroi ba Daromalinia hegöi ba ngawalö nibaso si no mufa’anö molo’ö Sura Ni’amoni’ö. Ö wamati andre te lö iheta fefu gabula dödö, hiza’i ibe’e khöda wa’abölö ba wanaögö si tebai molo’ö ya’ita. Möi nasa fanuturu lalada ba ”wa’auri si lö aetu”.​—Yoh. 17:3.

17. Hezo möi Gelia ba hana wa moguna sibai nahia andrö?

¹⁷ Itörö tanö Elia arakhagö 320 kilometer ofeta ba Hili Horebi, ba da’a me mböröta iforoma’ö ia Lowalangi Yehowa khö Moze ba gotalua za’a-sa’a mao si hola-hola, i’oguna’ö samösa mala’ika. Ba da’a göi ibe’e Goroisania Yehowa ba ndraono Gizara’eli. Ba da’ö isöndra nahania Elia ba dögi gara.

18, 19. (a) Hadia wanofu nibe’e mala’ika Yehowa, ba hadia wanema li Gelia? (b) Hadia zi tölu dane-dane niwa’ö Gelia si möi fangide-ngide’ö dödönia?

¹⁸ Ba Horebi, ”humede” Yehowa, i’oguna’ö samösa mala’ika ba wame’e fanofu si öna-öna: ”Hadia nihalöu ba da’e, Elia?” Te no ihaogö-haogö wame’e fanofu da’a, andrö wa itutunö nösi dödönia Elia. Imane, ”Sindruhu-ndruhu wa olohu ndra’o khö Yehowa, Lowalangi ngahönö; börö me no laröi mbu’usa limö andrö iraono Gizara’eli, no ladudugö naha wame’e sumange khöu, ba no labunu si’öli ndra sama’ele’ö andrö khöu, irege hatö ya’o zi toröi, ba la’alu-alui lala wamunu ya’o.” (I Raz. 19:9, 10, Terjemahan Dunia Baru [NW]) Moroi ba wehede Gelia andre oroma wa so tölu dane-dane hadia mbörö wa ide-ide dödönia.

¹⁹ Si oföna, imane Elia wa zaya-zaya gölö fefu halöwönia barö da’a. Hewa’ae no hauga fakhe ’olohu ia khö Yehowa’, i’ofönai’ö wangamoni’ö töi Lowalangi hegöi famosumange ya’ia moroi ba danö bö’ö, i’ila Elia wa itugu lö sökhi lagu nono mbanuania andrö. Lö famatira ba omasi ira mamadaö, ba itugu tedou manö wamosumange faya. Si dua, iwa’ö tödönia wa hatö ya’i-ya’ia. Imane, ”Hatö ya’o zi toröi”, hulö na ya’ia niha safuria zamosumange Yehowa. Si tölu, ata’u Gelia. Ato nawönia sama’ele’ö si no labunu, ba faduhu dödönia wa ya’ia aefa da’a. Te abua khö Gelia wanutunö ösi dödönia andrö, hiza’i lö aila ia mazui i’amoni’ö döinia. Börö me ibokai dödönia khö Lowalangi ba wangandrö, tobali ia duma-duma ba niha si lö faröi.​—Zin. 62:9.

20, 21. (a) Tutunö hadia ni’ila Gelia ba mbawa dögi gara ba Hili Horebi. (b) Hadia rahu-rahu nihalö Gelia me no i’ila wa’abölö Yehowa?

²⁰ Hadia nifalua Yehowa ba wa’ata’u Gelia hegöi ba  wa’aombö-aombö dödönia? Ifarou ia mala’ika wozizio ba mbawa dögi gara. I’o’ö da’ö Elia hewa’ae lö i’ila hadia zalua. Ba zi lö mudöna-döna, tohare nangi sabölö-bölö! Abölö-bölö sibai irege fabali hili ba aboto gara ba tatu afökhö dalinga zamondrongo. Khalaigö me iduhö hörönia Elia, igogohe mbarunia sebua ba sabua moroi ba guli gurifö ena’ö lö i’oloi’ö angi. I’alui göi lala ena’ö lö alabu ia börö me ibörögö mohisi danö ba zi fasui ya’ia ba wa’abölö-bölö ndruru danö! Fatua lö ihonogö ia, tohare galitö sebua irege mangawuli ia ba dögi gara ena’ö lö akhozi ia ba wa’aukhu galitö.​—I Raz. 19:11, 12.

²¹ Da’a zamasugi ba dödöda wa lö hadöi Yehowa ba ngawalö zalua moroi ba wa’abölö dalu mbanua sahöli-höli dödö. I’ila Elia wa Yehowa andrö tenga simane lowalangi dalu mbanua si fao fa’abölö gelemu simane Ba’ali ”samofanö lawuo”, mazui solohe teu, nifosumange niha selungu. Yehowa andrö Umbu wa’abölö sahöli-höli dödö ba dalu mbanua, ba abölö nasa ia moroi ba niwöwöi dangania. Lö göi itaha ia sorugo! (I Raz. 8:27) Hewisa wa möi fanolo Gelia da’a? Törö tödöu wa’ata’unia. Börö me fa’awö khönia Yehowa, Lowalangi fondrege zabölö, lö ata’u Gelia khö Gahabi hegöi khö Gizebela!​—Baso Zinunö 118:6.

22. (a) Ba ”wehede nihaogö-haogö” andre, hewisa wa faduhu dödö Gelia wa moguna sibai ia? (b) Kira-kira hezo moroi ”wehede nihaogö-haogö” andrö? (Faigi nisura ba gahe zura.)

²² Me no taya galitö andrö, izumaigö lö nini-nini ba irongo Elia ”wehede nihaogö-haogö”. Ifuli itutunö nösi dödönia Elia si mendrua. * Te da’a mbörö waterara dödönia. Tatu manö, monönö wa’aterara dödönia nasa ba ”wehede nihaogö-haogö” andrö. Ifaduhu’ö khönia Yehowa wa moguna sibai ia. Hewisa lalania? Ya’ia me i’ombakha’ö gohitö dödönia Lowalangi ba zi so föna sanandrösa ba wanuwö sanömba Ba’ali ba mbanua Gizara’eli. Tenga zaya-zaya gölö hölöwö Gelia barö da’a börö me lö si tola mombatogö ohitö dödö Lowalangi. Baero da’ö, fao  Gelia ba wamalua ohitö dödö andrö börö me ifuli ifatenge ia Yehowa ba wamalua faretania si no izara-zara.​—I Raz. 19:12-17, NW.

23. Hadia zi dombua lala ni’asogö Yehowa ba wanolo Elia me hulö zi lö awö-awö ia?

²³ Hewisa dödö Gelia me hulö zi lö awö-awö ia? So dombua nifalua Yehowa ba da’a. Si oföna, ifaretakö Gelia ba wombayoini Elisa tobali sama’ele’ö fogatinia. Ira matua sawuyu-wuyu moroi khönia andre tobali awönia ba sanolo ya’ia ba zi hauga fakhe. Sindruhu-ndruhu moguna sibai wondrara dödö andre! Si dua, i’ombakha’ö Yehowa duria somuso dödö, ”Ba fitu ngahönö zi tosai iraono Gizara’eli ube’e, dozi balöduhi si lö irai aköi föna Mba’ali andrö, ba dozi bawa, si lö irai fa’ago khönia.” (I Raz. 19:18) Sindruhunia tenga ha samö-samösa Gelia. Terara dödönia me irongo so ngahönö niha si lö faröi si lö omasi manömba Ba’ali. Moguna khöra wanolo moroi khö Gelia hegöi duma-duma wa’alöfaröinia si lö tebulö khö Yehowa me göna ia fa’ogömi dödö. Tatu omuso dödö Gelia me irongo li genoni Yehowa andrö, ’fehede nihaogö-haogö’ moroi khö Lowalangi.

24, 25. (a) Hewisa wa tola tarongo ”wehede nihaogö-haogö” moroi khö Yehowa iada’a? (b) Hana wa faduhu dödöda itema Elia wondrara dödö nibe’e Yehowa khönia?

²⁴ Simane Elia, te ahöli-höli dödöda wa’abölö nösi dalu mbanua soroma ba nifazökhi Lowalangi, ba no sinangea da’ö. Fa’abölö Zamazökhi oroma moroi ba niwöwöinia. (Rom. 1:20) Irugu iada’a, i’oguna’ö Yehowa wa’abölönia si lö ola ba wanolo ono mbanunia si lö faröi. (II Nga. 16:9) Hiza’i, fahuhuo khöda Lowalangi si oföna ba Zura Ni’amoni’ö, Taromalinia. (Baso Yesaya 30:21.) Tola muwa’ö, Sura Ni’amoni’ö hulö ”wehede nihaogö-haogö” na tabali’ö fanuturu lalada iada’a. Ba nga’örö-nga’örönia si sökhi andre, ibe’e khöda wotu Yehowa, famarou dödö, ba ena’ö faduhu dödöda ba wa’omasinia.

²⁵ Hadia terara dödö Gelia zalua ba Hili Horebi andrö? Tatu manö! Ifuli owölö-ölö zama’ele’ö si lö faröi andre ba lö ata’u ia wolawa famosumange faya. Na lö olifu ita ”wondrara dödö andrö, nirongoda ba zura”, ya’ia da’ö Taromali Lowalangi si no i’ehehaini, tola ta’o’ö wamati Gelia.​—Rom. 15:4.