1, 2. (a) Hadia gangetula nihalöda ero samösa? (b) Hadia nifalua malaʼika si lö faröi me so zangalulu khönia?

DOZI ita moguna tabeʼe wanema li ba wanofu daʼa: Haniha nifosumangegu? Ato zangumaʼö wa abua wameʼe fanema li, ba alangu dödöra börö me oya sibai wanema li sinangea mufili. Sindruhunia, ha dombua zinangea mufili, mamosumange Lowalangi Yehowa mazui mamosumange Afökha Satana.

² Omasi Zatana na mufosumange ia. Oroma daʼa me itandraigö Yesu. Simane nifatunöda ba Faza 1, edöna mamuala Zatana khö Yesu yaʼia daʼö me ibeʼe fefu wamatörö ba gulidanö andre. Hadia göi niʼandrö Gafökha? Iʼandrö khö Yesu ’enaʼö mangalulu ia hewaʼae ha sakali manö’. (Mat. 4:9) Hizaʼi, malaʼika samaʼema angilata khö zinenge sotöi Yohane, lö omasi ia nifosumange. Faböʼö sibai ia moroi khö Gafökha. (Baso Wamaʼeleʼö 22:8, 9.) Me ituhi danö Yohane ba mangalulu ia, imane ono Lowalangi andrö si fao fangide-ngideʼö, ”Böi angalulu khögu!” Lö imane, ’Angalulu khögu,’ hizaʼi, ”Khö Lowalangi angalulu.”

3. (a) Hadia gohitö dödö wa mufazökhi mbuku daʼa? (b) Hadia nitutunöda iadaʼa?

³ Ohitö dödö wa mufazökhi mbuku Famosumange Satulö yaʼia daʼö enaʼö itugu taʼosambuaʼö dödöda ba wamosumange Lowalangi  Yehowa, moloʼö niwaʼö malaʼika andrö. (5 Mo. 10:20; Mat. 4:10) Datafuli tatörö tödöda zi no tatutunö sanandrösa ba wamosumange satulö moroi ba wamaʼeleʼö hegöi angilata Hezekieli. Börö wanolo moroi ba ayati Zura Niʼamoniʼö, tola taʼila maʼifu zalua ba zi so miföna, yaʼia daʼö ba ginötö göna fefu niha gulidanö fanandraigö safuria. Fanandraigö daʼa dania zotatugöi haniha zauri ba ginötö tebohouni wamosumange satulö khö Yehowa sagötö faʼara.

4. Tutunö tölu ngawua duho siföföna si so ba mbuku Hezekieli.

⁴ Moroi ba mbuku Hezekieli, no tafahaʼö ita wa tenga ha fameta gesuanö ba wamalua famosumange satulö. Hizaʼi, moguna (1) ha khö Yehowa mangalulu ita, (2) lö tebulö tafalua wamosumange si lö raʼiö, ba si (3) taforomaʼö waʼomasi khö nawöda zamösana. Nehegö hewisa göi wangabakhaiʼö tuho si tölu ngawua andre ba gangilata hegöi famaʼeleʼö nitutunöda ba mbuku Wamosumange Satulö.

5-9. Hadia zi no tafahaʼö yaʼita sanandrösa wa ha khö Yehowa mubeʼe zumange?

⁵ Faza 3: * Ba gangilata sahöli-höli dödö sanandrösa ba gureta zorugo, no modadao Yehowa yawa ndra malaʼika sagabölö, ba no ifasui dadaomania andrö dumi. Moroi ba daʼa, sambua zi tola tahalö khöda famahaʼö yaʼia daʼö ha Fondrege Zabölö zinangea tafosumange.​—Hez. 1:4, 15-28.

⁶ Faza 5: Tokea ita ba gangilata sanandrösa ba gosali Yehowa si no tetaʼunöisi! Ba daʼö lafosumange nadu iraono mbanuania. Moroi ba daʼa tafahaʼö ita wa lö hadöi si tobini föna Yehowa. Oroma khönia na so zamalua sala hewaʼae lö niha sangila. Afökhö sibai dödönia ba niha si no faröi ba hasambalö ihuku ira.​—Hez. 8:1-18.

⁷ Faza 7: Mofönu Yehowa ba soi ’sangoʼaya’ iraono Gizaraʼeli. (Hez. 25:6) Daʼa zangoromaʼö wa hasambalö ihuku gofu haniha zamalua si lö sökhi ba nono mbanuania. Baero daʼö, moroi ba gamakhaita ndraono Gizaraʼeli ba soi böʼö, tafahaʼö ita wa gofu hadia ia zalua khöda, datarorogö waʼalöfaröida khö Yehowa. Lö taʼaohasi ba dödö goi-goi Yehowa ha börö nösi nomoda si tenga si sara lala wamati. Lö göi taʼodaligö waʼakayoda mazui talulu waʼaurida khö ndra samatörö ba gulidanö andre. Lö ebua dödö zambuana ita ba ha khö Yehowa talulu waʼaurida börö me sinangea mufosumange ia.

⁸ Faza 13 ba 14: Angilata sanandrösa ba gosali si so ba hili sabölö alawa, daʼö zangoromaʼö wa moguna taʼoʼö goi-goi Yehowa fondrege zalawa. Moguna tafaduhuʼö wa abölö alawa ia moroi ba lowalangi tanö böʼö.​—Hez. 40:1–48:35.

 ⁹ Faza 15: Ba gangilata Hezekieli, Izaraʼeli hegöi Yehuda muʼamaedolagö simane ira alawe sohorö-horö. Daʼa zamasugi ba dödöda wa ogoro sibai Yehowa wohorö ba wamati.​—Hez., faza 16, 23.

10-14. Hadia manö zi no tafahaʼö yaʼita wa moguna hasara dödöda ba wamalua famosumange si lö raʼiö?

¹⁰ Faza 8: Ba zi hauga angilata, ifabuʼu Yehowa wa ifataro khöra ”samösa gubalo” ba wondrorogö ono mbanuania. Daʼa zangabakhaiʼö wa yaʼita fefu soloʼö khö Yesu, moguna falulu fohalöwö ita, teʼosambuaʼö ba tarorogö wahasara dödö.​—Hez. 34:23, 24; 37:24-28.

¹¹ Faza 9: Ifaʼeleʼö Hezekieli wa teʼefaʼö nono mbanua Lowalangi moroi ba Mbabilona, ba mangawuli ira ba mbanuara si no tebohouni. So wamahaʼö ba niha somasi mangomusoiʼö tödö Yehowa iadaʼa moroi ba wamaʼeleʼönia andrö. Niha samosumange Yehowa lö tola löʼö laheta ira moroi ba agama sofaya hegöi fondrönisi dödö si tola manaʼunöisi yaʼira. Hewaʼae faböʼö-böʼö agamada ba zilalö, faʼebua gokhöta mazui banuada, lö tola löʼö tarorogö wahasara dödöda. Fahasara dödö andrö zangoromaʼö wa ono mbanua Lowalangi ita.​—Hez. 11:17, 18; 12:24; Yoh. 17:20-23.

¹² Faza 10: Angilata sanandrösa ba döla si no oköli ba ifuli auri, daʼö zangoromaʼö wa moguna so khöda wahasara dödö. Hawaʼomuso dödöda börö me no tobali ita ono mbanua Yehowa si no tebohouni! Sindruhu-ndruhu wa no töi sebua khöda me falulu fohalöwö ita tobali sambua ngawawa zaradadu sato!​—Hez. 37:1-14.

¹³ Faza 12: Siʼo si dua rozi si no teʼosambuaʼö, ifaʼeleʼö sanandrösa ba wahasara dödö. Simane si no tefaʼeleʼö, teʼosambuaʼö niha nibayoini ba mbiri-biri tanö böʼö. Tobali fangaroʼö wamati daʼa! Hewaʼae fawuka gulidanö andre börö me faböʼö-böʼö agama ba fatiusa ba politik, lö tebulö teʼosambuaʼö ita börö waʼomasi ba faʼalöfaröida.​—Hez. 37:15-23.

¹⁴ Faza 16: So wamangelama sabölö moguna moroi ba gangilata sanandrösa khö ndra matua solohe naha fena hegöi ira matua si daönö solohe fangöna ba wamunu. Tatema wamotandro wa si teʼorifi ita, ha na lö tebulö tafalua wamosumange satulö sagötö alua ”wamakao sabölö-bölö”.​—Mat. 24:21; Hez. 9:1-11.

15-18. Hana wa lö aetu taforomaʼö waʼomasi ba hewisa lalania?

¹⁵ Faza 4: Moroi ba gangilata sanandrösa khö ndra malaʼika si daöfa, tafahaʼö ita ba gamuata Yehowa, si oföna faʼomasi. Na fahuhuo ita si fao faʼomasi mendrua manö ba nifaluada, no taforomaʼö wa Lowalangida yaʼia daʼö Yehowa.​—Hez. 1:5-14; 1 Yo. 4:8.

 ¹⁶ Faza 6 ba 11: Börö waʼebua waʼomasi Lowalangi ba niha, andrö wa ituyu ndra sanaro, duma-dumania Hezekieli. Börö me Lowalangi andrö no faʼomasi, lö omasi ia na tekiko fazamösa ba ginötö ihori wamatörö Zatana ba gulidanö. (2 Fe. 3:9) No töi si sökhi khöda na taʼoʼö waʼomasi Lowalangi ba wamalua halöwöda yaʼia daʼö na tatuhini ndra sanaro ba ginötöda andre.​—Hez. 33:1-9.

¹⁷ Faza 17 ba 18: Iʼila Yehowa wa ato niha sanimbagö faʼahakhö dödönia ba samorege enaʼö tehori nono mbanuania si lö faröi. Börö waʼomasi Yehowa ba nono mbanuania, andrö wa iʼoʼawögö ira ba ginötö tohare ’Gogi moroi ba danö Magogi’ ba wanuwö yaʼira. Ba börö me taʼomasiʼö nawöda niha, tefarou dödöda ba wamangelama niha sato wa hasambalö ihori zamakao ono mbanuani Yehowa.​—Hez. 38:1–39:20; 2 Te. 1:6, 7.

¹⁸ Faza 19, 20, ba 21: Oroma waʼomasi Yehowa ba nono mbanuania ba gangilata sanandrösa ba nungo nidanö fangorifi hegöi fombagi tanö. Itutunö khöda ba gangilata andrö mbua waʼomasi Yehowa fondrege zebua yaʼia me itehegö waʼauri Nononia ba wangefaʼö horöda irege tasöndra waʼauri soʼahonoa ba tobali ösi nomonia. Sambua lala si sökhi si tola tafalua ba wangoromaʼö faʼomasi ba nawöda niha, yaʼia daʼö na tatutunö khöra dötönafö ba zi so miföna nifabuʼu Yehowa ba niha samati khö Nononia.​—Hez. 45:1-7; 47:1–48:35; Fam. 21:1-4; 22:17.

19. Hadia manö nifalua Yesu sagötö Famatörö si Saribu Fakhe? (Faigi göi kotak ”Fanandraigö Safuria”.)

¹⁹ Sagötö Mamatörö Yesu ba zi Saribu Fakhe, isusugi niha si no mate si miliaran faʼato ba itayaigö waʼabu dödö niʼasogö ’nudu’ yaʼia daʼö faʼamate. (1 Ko. 15:26; Mrk. 5:38-42; Hal. 24:15) Sindruhu-ndruhu wa ogömi waö-waö waʼauri niha iʼotarai mböröta börö gabula dödö salua. Hizaʼi, niha nisusugi Yesu dania tebeʼe khöra ginötö ba wamalua satulö irege sökhi waö-waö waʼaurira. Börö höli si no ibeʼe, iheta fefu lua-lua ngawalö wökhö, fasuwöta hegöi faʼolofo. Itolo göi ita ba wangeheta waʼa wamakao andrö yaʼia daʼö horö ondröita moroi khö Gadamo. (Rom. 5:18, 19) Yesu dania ’zamakiko halöwö Gafökha’. (1 Yo. 3:8) Hadia zalua aefa daʼö?

20. Hadia nifalua Yesu hegöi awönia si 144.000 ba wangoromaʼö fangide-ngideʼö sahöli-höli dödöda? Tutunö. (Faigi gambara ba wamobörö wamahaʼö.)

²⁰ Baso 1 Korindro 15:24-28. Na no aefa zi saribu fakhe, moʼahonoa fefu niha. Tobali Faradaiso gulidanö simane ohitö dödö Yehowa ba wamobörö. Ba luo daʼö, iforomaʼö wangide-ngideʼö sahöli-höli dödö Yesu hegöi awönia si 144.000. Lafuli latouʼö Wamatörö andrö khö Yehowa. Laʼefasi wamatörö si no lagogohe sagötö zi saribu fakhe andrö, ba tenga nifaso mazui  nifarou ira wamalua daʼö. Fefu howu-howu niʼasogö Wamatörö andrö lö tebulö irugi zi lö aetu.

21, 22. (a) Hewisa gulidanö andre dania na no aefa Wamatörö si Saribu Fakhe? (b) Hadia mbörö wa iʼefasi Zatana hegöi malaʼika si lö sökhi andrö Yehowa?

²¹ Aefa daʼö, so nifalua Yehowa sahöli-höli dödö sangoromaʼö wa ifaduhusi tödö nono mbanuania si so ba gulidanö. Ifaretakö enaʼö laʼefasi Zatana hegöi malaʼika si lö sökhi moroi ba ”mbaho sabakha sibai”, nahia nikuru yaʼira sagötö zi saribu fakhe. (Baso Wamaʼeleʼö 20:1-3.) Laʼila dania wa no faböʼö sibai gulidanö. Fatua lö alua Hamagedo, ato niha nifaelungu Zatana ba aboto wahasara dödö niha gulidanö börö watiusa ba fanahö-nahö dödö. (Fam. 12:9) Hizaʼi, na no aefa Wamatörö si Saribu Fakhe, ahori teʼosambuaʼö fefu niha samosumange Yehowa amaedola zi sambua omo ba faoma laʼomasiʼö nawöra. No tobali Faradaiso gulidanö safönu faʼahono dödö.

 ²² Hadia mbörö wa ihalö gangetula Yehowa ba wangefasi Satana awö ndra malaʼika si lö sökhi ba mbanua safönu faʼahono dödö andrö? Börö me ato nono mbanua Yehowa sauri ba luo daʼö, lö irai tetandraigö waʼalöfaröira. Ato ba gotaluara zi tesusugi si lö faʼaboto ba dödö sanandrösa khö Yehowa fatua lö mate ira. Ba Waradaiso dania, tenga ha faʼauri nibeʼe Yehowa khöra hizaʼi ibönökhi fefu zoguna ba mboto hegöi ba wamati. Börö me so ira ba gotalua niha sangomasiʼö ba sangai halöwö khö Yehowa, lö irai tedönisi dödöra ba wamalua si lö sökhi. Andrö, tola manö ifobahulu ira Satana simane nifaluania khö Yobi me föna, iwaʼö wa lafosumange Lowalangi ha börö me ilumöʼö ba ifahowuʼö ira. (Yob. 1:9, 10) Börö daʼö, fatua lö isura döida Yehowa ba mbuku waʼauri sagötö faʼara, ibeʼe khöda ginötö ba wangoromaʼö faʼalöfaröida khönia ba tafaduhuʼö wa yaʼia andrö Ama ba Samatörö yaʼita.​—Fam. 20:12, 15.

23. Hadia zi tola lafili ero samösa niha?

 ²³ Ifuli tebeʼe ginötö khö Zatana ba zi lö arara ba wamaelungu niha enaʼö laböhöli wamosumange Lowalangi. Hadia wanandraigö salua ba niha? Faduhu dödöda wa tebeʼe ginötö ba niha ba wotatugöi sinangea lafili, simane Adamo faoma Khawa mböröta. Si tola lafili yaʼia daʼö (1) latemaʼö goi-goi Yehowa, latuhini wamatörönia ba lafosumange ia, mazui (2) mamadaö ira khö Lowalangi ba fao ira khö Zatana.

24. Hana wa mufotöi ndra samadaö andrö Gogi ba Magogi?

²⁴ Baso Wamaʼeleʼö 20:7-10. Niha samadaö na no aefa zi saribu fakhe, lafotöi ira Gogi ba Magogi. Fakhili-khili gamuatara simane niha samadaö ba wamaʼeleʼö Hezekieli, sanuwö ono mbanua Lowalangi ba wamakao sabölö-bölö. Yaʼira andrö ’Gogi moroi ba danö Magogi’, angowuloa soi solawa famatörö Yehowa. (Hez. 38:2) Simane yaʼira, niha samadaö na no aefa zi saribu fakhe andrö mufotöi ira ”fefu soi”. So zadöni dödöda si tola tahalö rahu-rahu moroi ba döira andrö. Ba Wamatörö si Saribu Fakhe, lö hadöi saʼae nola-ola soi. Teʼosambuaʼö fefu ita ba soi wamati ba so ita ba zi sambua famatörö yaʼia daʼö Famatörö Lowalangi. Börö me mufotöi ira ”fefu soi” hegöi Gogi ba Magogi  ba wamaʼeleʼö andrö, tola tawaʼö wa aʼozu Zatana ba wamoto fahasara dödö nono mbanua Lowalangi ba mamadaö ira. Hizaʼi, lö hadöi si tola mamaso yaʼira ba wangoʼawögö Satana. Dozi niha si no moʼahonoa, tola lafili hadia zomasi dödöra.

25, 26. Hawaʼato dania zi fao khö Zatana, ba hadia zalua khöra?

²⁵ Hawaʼato dania zangoʼawögö Satana? Faʼatora ”simane gawu ba nasi”. Hadia daʼa geluahania wa ato dania niha samadaö? Löʼö. Nehege mbuʼusa li nitema Gaberahamo me föna. Ifabuʼu Yehowa khö Gaberahamo wa faʼato ngaʼötönia dania ”simane gawu ba nasi”. (1 Mo. 22:17, 18) Hizaʼi, faʼato ngaʼötönia ha 144.001. (Gal. 3:16, 29) Lö ato sibai ira andrö na mufaedogö waʼatora ba niha gulidanö. Simane daʼö göi zi faʼawö khö Zatana, lö ato sibai ira na mufaedogö waʼatora ba niha gulidanö. Lö tobali ira tandrawa sebua ba nono mbanua Yehowa si lö faröi.

²⁶ Lö tetehegö ba niha samadaö andrö enaʼö auri ira sagötö faʼara. Lö saʼae tebeʼe khöra ginötö enaʼö lasöndra waʼauri, fao ira na tehori Zatana hegöi ira malaʼika si lö sökhi. Sauli itörö tödöda gangetula si lö sökhi nihalöra hegöi lua-luania.​—Fam. 20:10.

27-29. Hewisa waʼauri niha ba zi so miföna si no manörö fanandraigö safuria?

 ²⁷ Baero daʼö, so niha sanau ölö saefa moroi ba wanandraigö safuria. Tesura döira ba ”zura wangorifi” sagötö faʼara. (Fam. 20:15) Fefu nono Yehowa si lö faröi si no amaedola zi sambua omo, khönia labeʼe zumange börö me yaʼia zinangea lasuno.

²⁸ Khalaigö dötönafö ba zi so miföna: Ero maʼökhö ösöndra waʼomuso dödö ba halöwö nifaluamö hegöi fahuwusa saro. Lö irai tefakao ndraʼugö hegöi ösi nomou. Moʼahonoa ndraʼugö ba lö saʼae öʼodaligö höli enaʼö ösöndra wahuwusa si sökhi khö Yehowa. Dozi niha tola fahuwu ira khö Lowalangi ba lö hadöi sanaisi yaʼira. Ba sabölö tohudenia, moʼahonoa wamosumange satulö si no tebohouni, ba zorugö hegöi ba gulidanö!

²⁹ Hadia so ndraʼugö ba daʼö dania? So, asala lö öböhöli wamalua si tölu ngawalö wamahaʼö si oföna moroi ba mbuku Hezekieli, yaʼia daʼö ha khö Yehowa mangalulu ndraʼugö, lö tebulö öfalua wamosumange si lö raʼiö, ba öforomaʼö waʼomasi khö nawöu. Baero daʼö, so sambua tö nasa wamahaʼö safuria moroi ba wamaʼeleʼö Hezekieli. Hadia daʼö?

30, 31. Hadia geluahania ngawua wehede ”aboto ba dödöra wa yaʼo Yehowa” (a) ba nudu Lowalangi? (b) ba nono mbanua Lowalangi?

³⁰ Ngawua wehede ”aboto ba dödöra wa yaʼo Yehowa” asese mutötöi ia ba mbuku Hezekieli. (Hez. 6:10; 39:28) Ngawua wehede  daʼö zangoromaʼö wa fasuwö nudu Lowalangi ba mate ira. He na faduhu dödöra he na löʼö, hasambalö lafaduhuʼö wa so Yehowa andrö. Hizaʼi, tenga ha daʼö manö. Aboto göi ba dödöra dania geluaha döinia solakhömi, ”Yaʼia Mbörö Wa Alua”. Ilawa dania ira ”saradadu sabölö” yaʼia daʼö ”Yehowa samatörö saradadu zorugo”. (1 Sa. 17:45; 2 Mo. 15:3) Alimagö sibai, ba luo daʼö awena aboto ba dödöra wa lö hadöi si tola manaisi Yehowa ba wamalua ohitö dödönia.

³¹ Ba nono mbanua Lowalangi, ngawua wehede ”aboto ba dödöra wa yaʼo Yehowa” daʼö zangoromaʼö wa lasöndra waʼauri sahono dödö. Ibaliʼö ita ononia Yehowa ba moʼahonoa woloʼöda amuatania simane ohitö dödönia ba wamobörö. (1 Mo. 1:26) Iadaʼa, no tobali Amada sebua faʼomasi Yehowa ba Kubalo solumöʼö yaʼita. Ba zi lö ara tö, yaʼia zi tobali Razoda si no möna ba wokalaisi udunia. Gasa-gasa wombaloi daʼö, angerönusi wamahaʼö moroi ba mbuku Hezekieli. Dataforomaʼö ba wehede hegöi ba gamuata si ero maʼökhö wa no aboto ba dödöda haniha Yehowa ba hewisa ia. Na tafalua daʼö, lö khöda faʼataʼu ba ginötö teʼefasi nangi wangohori ba wamakao sabölö-bölö. Tafaöga mbawada börö me lö ara tö teʼefaʼö ita. (Luk. 21:28) Fatua lö alua ginötö daʼö, datatolo niha gofu hezo toröi ira, enaʼö aboto ba dödöra ba laʼomasiʼö Lowalangi si ha sambua sinangea mufosumange, yaʼia daʼö Lowalangi sangokhögö töi solakhömi, Yehowa.​—Hez. 28:26.