Famaʼeleʼö Zura Niʼamoniʼö hegöi sejarah, daʼö zangoromaʼö wa no ibörögö mamatörö Yesu tobali Razo ba zorugo me 1914. Iʼotarai daʼö, tebörögö ngaluo safuria ba gulidanö Zatana. Hadia nifalua Yesu me no tobali ia Razo? Hadia iʼanemaiʼö iʼefaʼö zoloʼö yaʼia ba gulidanö andre moroi ba Mbabilona Sebua? Hadia ifataro ”zawuyu si lö faröi ba satua-tua” me 1914 ba ibörögö wangowuloi basitö?​—Mat. 24:45.

Sindruhunia lö nasa. Ifaʼeleʼö sinenge sotöi Fetero wa fanguhuku andrö ”tebörögö ba nomo Lowalangi”. (1 Fe. 4:17) Ifaʼeleʼö göi Maleakhi wa möi Yehowa ba gosalinia fao ’tenge-tenge mbuʼusa li andrö’, yaʼia daʼö Ono Lowalangi. (Mal. 3:1-5) Ba daʼö dania teʼazökhi ba tetandraigö nono mbanua Lowalangi. Hadia alua zi no tefaʼeleʼö andrö? Alua! Hadia dandrania?

 Sejarah zangoromaʼö wa iʼotarai 1914 irugi wamobörö ndröfi 1919 no tetandraigö ba teʼazökhi Nono Zekola Zura Niʼamoniʼö (töi ndra Samaduhuʼö Yehowa me luo daʼö). Me 1914, ato nono mbanua Lowalangi zafatö tödö börö me lö alua waʼatua danö ba ndröfi daʼö simane nitötönara. Monönö nasa waʼafatö dödöra me 1916 börö waʼamate Charles T. Russell, sondröniaʼö ono mbanua Lowalangi sowölö-ölö. Niha si fao tödö khö dalifusöda Russell, fatuwu ira khö zondröniaʼö si bohou yaʼia daʼö Joseph F. Rutherford. Alua watötöisa ba arakhagö fabali organisasi me 1917. Te börö wamobahulu ndra sondröniaʼö ba gereja, laʼetuʼö hukuma ndra talifusöda Rutherford hegöi awönia si dafitu, ba lafakuruʼö ira me 1918. Muduhö göi Gödo Sebua ba Brooklyn. Ba daʼö taʼila wa lö muʼefaʼö nono mbanua Lowalangi moroi ba Mbabilona Sebua!

Hadia zalua me 1919? Alio sibai tebulö zalua me luo daʼö, tola tawaʼö otu a walu ngafulu derajat! Me böröta ndröfi daʼö, laʼefasi ba gurunga Rutherford hegöi ira awönia. Iʼanemaiʼö latohugö halöwöra! Lö ara aefa daʼö, lahalö gangetula ba wamalua angowuloa sebua si tebai muʼolifugö ba lafazökhi göi sambua majalah si bohou tuhonia The Golden Age (töinia iadaʼa Faoso!). Wa lafazökhi majalah daʼa soguna ba wanuriaigö. Aefa daʼö lafataro samösa zondröniaʼö ero sambua banua niha Keriso samarou tödö ndra talifusöda sanuriaigö. Enaʼö göi mofozu organisasi ba wanuriaigö, andrö lafazökhi Bulletin (töinia iadaʼa Faʼauri Niha Keriso ba Fanuriaigö—Waö-Waö Halöwö ba Gangowuloa).

Hadia zi tobali rahu-rahu? Atulö wa döfi 1919 andrö döfi si tebai muʼolifugö yaʼia daʼö iʼefaʼö Keriso zoloʼö khönia moroi ba Mbabilona Sebua. Ifataro zawuyunia si lö faröi ba satua-tua. Tebörögö wangowuloi basitö ba itugu monönö manö ba sahöli-höli dödö.