KOTAK FAMAHAʼÖ 19B
Elea Side-ide Tobali Ungo Nidanö Sebua!
Iʼosisi nungo nidanö andrö Hezekieli sangele moroi ba naha niʼamoniʼö khö Yehowa. Börö dandra sahöli-höli dödö, tobali ungo nidanö sebua nidanö andrö ha ba zi dua kilometer! Ba zi sandrohu ungo nidanö daʼö iʼila döla geu sebua hogu sowua si tola muʼa ba si tobali dalu-dalu. Hadia geluahania daʼö fefu?
Ungo Nidanö Solohe Howu-Howu
ME GÖTÖ FÖNA: Me no mangawuli niha niʼoloiʼö ba mbanuara, fao ira ba wamohouni famosumange satulö ba gosali irege lö aetu tefahowuʼö ira
BA GINÖTÖDA IADAʼA: Me 1919, tebohouni wamosumange satulö irege lö aetu mangele howu-howu ba wamati ba nono mbanua Lowalangi si lö faröi, töra moroi ba zilalö
BA ZI SO MIFÖNA: Na no aefa Hamagedo, ifangele howu-howunia Yehowa, howu-howu ba wamati hegöi howu-howu ba mboto
Idanö Fangorifi
ME GÖTÖ FÖNA: Ifangele howu-howunia Yehowa ba nono mbanuania soloʼö oroisania ba iʼorifi ira, aefa daʼö iʼohe ira ba nahia si fahöna gö ba wamati
BA GINÖTÖDA IADAʼA: Börö me itugu monönö waʼebolo waradaiso wamati, itugu ato niha zorasoi faʼamangele howu-howu wamati sabölö-bölö moroi khö Yehowa ba ifuli tesusugi ira ba wamati
BA ZI SO MIFÖNA: Miliaran niha nisusugi fao dania ira ba niha niʼorifi moroi ba Hamagedo ba fahöna khöra howu-howu Yehowa zamösana
Eu Sangaʼasogö Balazo hegöi Dalu-Dalu
ME GÖTÖ FÖNA: Ba danö si no tebohouni, tebeʼe gö wamati ba nono mbanua Yehowa si lö faröi ba tefadöhö ira me no ara ba wökhö wamati
BA GINÖTÖDA IADAʼA: Tobali folumöʼö nono mbanua Lowalangi gö wamati si no fahöna enaʼö lö mofökhö mazui olofo ira ba wamati simane niha sato ba gulidanö andre
BA ZI SO MIFÖNA: Keriso hegöi awönia si 144.000, latolo fefu niha enaʼö moʼahonoa ira ba lö mofökhö sagötö faʼara!
